Read Sangir MANGA RATU HUMOTONG 20 Bible Online

MANGA RATU HUMOTONG 20 - Sangir bible

MANGA RATU HUMOTONG 20

¹Piạ sěhěllo i Benhadad, datun Siria, něnampungu kal᷊awọu sordadone, kụ dingangkewen sire ratu wal᷊ine kal᷊awọe těllum pul᷊o dua su kataune ringangu karetan sekẹ, ore lai kawal᷊on sire, i sie nělikụ kụ něngalo soan Samaria.

²Mase i sie něndolohu taumata sol᷊ong anung Ahab, datung Israel, su soa ene ringangu tatanatane kere ini,

³”Datu i Benhadad měnẹ̌nuntụ tadeạu i kau měnarakang u wul᷊aeng, sal᷊aka, manga kawingu, ringangu manga anạu apam matoghasẹ̌ si sie.”

⁴I Ahab simimbahẹ̌, ”Paul᷊ịko su mawu Ratu i Benhadad u iạ e seng mal᷊uasẹ̌. I sie wotonge měnaghuang si siạ dingangu kal᷊awọu apan tẹ̌taghuanengku.”

⁵Bọu ene apan darolohang ene nẹ̌sul᷊e kapia su anung Ahab baugu měhabaru pandungange wal᷊ine wọi Benhadad. Kai kere ini pandungange ene, ”Nạung kạngerẹ datung kami e mạnuntụ tadeạu i kau e měnarakang u wul᷊aeng dingangu sal᷊aka ringangu manga kawingu ore lai manga anạ u si sie.

⁶Arawe orasẹ̌ ini e i sie sarung měndolohu manga pěrwira ipěnggaleda wal᷊oarị u ringangu manga wal᷊en sawohị u, ringangu apěngal᷊ạewe měnsang apa kụ tumuhụ si sire e kawe maarẹ̌ga. I sire sarung duměnta sini rịěllo tempone manga kere ini.”

⁷Tangú Ratu i Ahab nẹ̌kui kěbị pangahạ u Israel dingangu nẹ̌bera, ”I kamene pẹ̌sahidi hala u tau ini e mẹ̌měnning u mapakawinasang kitẹ. I sie mạnuntụ tadeạu iạ e apẹ̌narakangu manga kawingku ringangu manga anạku, ringangu wul᷊aeng arau sal᷊akaku, dingangu iạ e tawe měnuhudu apan tẹ̌tuntukange ene.”

⁸Apan těmbonange ringangu kawanuane nẹ̌bera u, ”Abe kahimang si sie, Tuang! Abe tuhụ kapulune.”

⁹Ual᷊ingu ene i Ahab simimbahẹ̌ su manga rarolohang i Benhadad ene kere ini, ”Paul᷊ịko su mawu, ratunu ene, u iạ e mal᷊uasẹ̌ bue su tẹ̌tuntukang e humotong e, arawe tuntutang e karuane ini e tawe takụ kireěng.” Tangú němpẹ̌dal᷊engke manga rarolohang ene, bọu e nẹ̌sul᷊e kapia su anung Ahab dingangu nẹ̌bera u,

¹⁰”Ratung kami e sarung měndolohu sordado mal᷊awọ baugu apěnggoghahẹ̌ soanu, hakịu awune ringangu manga korọ u soanu e masueng hengkẹ e si sire e tumbạeng dingangu l᷊imang sire e. I sie nẹ̌salu tadeạu manga mahan duata e měhukung, sarang kate měmate si sie, kereu i sie tawe mẹ̌koạ hal᷊ẹ̌ ene!”

¹¹Datu i Ahab simimbang, ”Paul᷊ịko su Ratu i Benhadad: Sordado tutune e sarung piạ pěndangu lụlesạ samurim pẹ̌sasekẹ, bal᷊inewe kal᷊amona e.”

¹²Sasimbangi Ahab ene e niul᷊ị si Benhadad su tempong i sie ringangu manga ratu wal᷊ine kụ nakoạ sěndinganenge kụ kạpěnginunge su ral᷊ungu pẹ̌darasengang i sire. Nakaringihẹ̌ ene e, i Banhadad nẹ̌parenta su manga pěrwirane apědẹ̌dariahi měngalo soan Samaria. Tangú i sire e němpẹ̌dariahị e.

¹³Těntal᷊ang ene, sěngkatau nabi e nakoạ sol᷊ong anun Datu i Ahab kụ nẹ̌bera, ”MAWU něhengetang: ’I kau nakasilo sordado mal᷊awọ ene tangú? Iạ e sarung měngonggọu kal᷊auntu si kamene mạmatạ si sire sahěllo ini. I kau e sarung masingkạ u Iạ e MAWU.’ ”

¹⁴”I sai tangú harusẹ̌ sumekẹ kal᷊imona?” angkuěng i Ahab. Nabi ene simimbang, ”Sordado mangangudạ, tumataking manga těmbonangu wanua. Kerene angkuěng u MAWU.” ”Kụ i sai tangú harusẹ̌ makoạ těmbonangu pěngangalo ene?” Saụ e wue nikiwal᷊ong datu kapia. ”Mawu ratu sẹ̌sane,” sasimbangu nabi ene.

¹⁵Tangú ratu e mal᷊aing napasěbangu manga sordado mangangudạ e tumataking manga těmbonangu wanua. Kěbị kal᷊awọe 232 su kataune. Bọu ene i sie nẹ̌koạ lai kerene su sordadong Israel. Kěbị kal᷊awọe 7.000 su kataune.

¹⁶Pěngangalo e nitětạ dokeng ěllo piạ i Benhadad dingangu ratu i sire těllum pul᷊o dua su kataune nakoạ sěndinganenge ene kạpanginunge sarang něngkawukang su ral᷊ungu pẹ̌darasengang i sire.

¹⁷Apan timol᷊ọ kal᷊imona e ute kai sordado kawuhuang ene e. I sire apang nirolohʼi Benhadad apẹ̌pẹ̌pahimang dokạ e, naul᷊ị si Benhadad u piạ sordado sěngkamonaěng kạpahunděntane sol᷊ong anun sire e wọu l᷊antehu Samaria.

¹⁸I Benhadad nẹ̌parenta tadeạu sordadon sekẹ ene e pakisamẹ biahẹ̌, abe pẹ̌dia walạewe měnsang i sire ruměnta mẹ̌sekẹ arau kawe mẹ̌dame.

¹⁹Manga sordado kawuhuang kụ niapasěbang u Ratu i Ahab ene e nanětạ e nẹ̌kakanoạ bọu soan Samaria, nitol᷊eěngu sordadong Israel.

²⁰I sire sěngkatau-sěngkatau e němpěmate rokạ tẹ̌tatěngoěng e. Tau Siria e nahuntal᷊ang, sẹ̌sahusuangu tau Israel. Arawe i Benhadad e nakatal᷊ang. I sie nělingkạ simake kawal᷊o ringangu pirang katau wọu sordado piạ kawal᷊one.

²¹Datu i Ahab mal᷊aing limintụ nẹ̌těngkal᷊aụ dingang su pẹ̌seketang kụ něnggagholọ kal᷊awọu karetan sekẹ dingangu němate manga kawal᷊one. Su ěllo ene tau Siria e kinawatạ marasai.

²²Mase nabi e riměnta su anung Ahab kụ nẹ̌bera, ”Orasẹ̌ ini e tangú mapiawe i tuang kapul᷊ẹ kụ panoghasẹ̌ batangeng kụ pěhingidẹ̌ko pakarasagẹ̌, batụu ratun Siria sarung duměnta kapia měngalo su musungu malělubẹ̌ e tuhụ e.”

²³Manga pěrwiran Datu i Benhadad nẹ̌bera si Benhadad, ”Manga ruata sẹ̌sěmbaěng u tau Israel kụ kawasa su wawul᷊urange, hakịu ene i kitẹ e ikẹ̌kawatạ u bansa ene. Kaiso i kitẹ e mambeng makawatạ si sire, kereu i kitẹ e mẹ̌sekẹ su tenene.

²⁴Kụ mapiawe ini i Tuang e pěngaweng datu i sire těllum pul᷊o dua ene ringangu manga pěrwiran Tuang e hala.

²⁵Bọu ene kěnangko i Tuang apasěbangu wuntuang kasěllahe kere wuntuang i Tuang seng kinawatạ ene, piạ kawal᷊one ringangu karetan sekẹ kal᷊awọe nạung kerẹewe kal᷊imona. I kitẹ e sarung mẹ̌sekẹ u tau Israelẹ̌ ene su matenene, kụ sěnsul᷊e ini e i kitẹ mambem makawatạ.” Datu i Benhadad e kimire, wọu e timuhụ kal᷊awọu sasasang manga pěrwira ene.

²⁶Su musungu mal᷊ěhubẹ̌ tuhụ e i sie mapasěbangu sordadone kụ nẹ̌kakanoạ sol᷊ong Afek baugu měngalo tau Israel.

²⁷Tau Israel mal᷊aing napakasukụ u sordadone ringangu napasěbang i sire. Bọu e sordadong Israel e nẹ̌kakanoạ timol᷊ọ su ruam buntuang kụ nẹ̌daseng mẹ̌tẹ̌těngon tau Siria ene. Ipẹ̌taran sordadon Siria kụ nẹ̌sawuhẹ̌ napěpidẹ̌ su wanua ene, wuntuangu Israel kakěllaěng kere kambing duang kamonaěng.

²⁸Mase narěntạe sěngkatau nabi su anun Datu i Ahab kụ nẹ̌bera, ”Seng ini e nipěhengetang u MAWU: ’Batụu tau Siria ene e, měngiral᷊ing u Iạ e kětạeng kawasa su wawul᷊urange arawe su tenene tala wue, tangú Iạ e sarung měngonggọu kal᷊auntu si kamene waugu sordadon sire kụ kereneng kasariane. I kau ringangu kawanuanu e sarung masingkạ u kai Iạ e MAWU.’ ”

²⁹Karěngụu pitu ěllo tau Siria ringangu tau Israel tatapẹ̌ su ral᷊ungu pẹ̌darasengang i sire, mẹ̌tẹ̌tatěngo. Su ěllo kapitune i sire nanětạ e něngalo. Su pẹ̌seketang ene e tau Israel napakawihuan tau Siria mahasụ suhiwune su kataune.

³⁰Taumata apang nakal᷊ěsọ, timal᷊ang sol᷊ong soang Afek, kaiso meselu soa ene naopehẹ̌ něngambung si sire ruam pul᷊o pitu hiwu su kataune wọu tal᷊oaran sire. I Benhadad mal᷊aing timal᷊ang u watangenge sol᷊ong soa ene kụ nẹ̌kěmbuni su wal᷊e sěmbaụ su kamarẹ̌ su ral᷊unge.

³¹Manga pěrwirane nahunděnta su anune kụ nẹ̌bera, ”Angkuěngu sěnggạ, mararatung Israel e kai mararatu makakěndagẹ̌. Ual᷊ingu ene tangú, pakawalako i kami mẹ̌těngon datung Israel kụ mẹ̌děndehọ u kahiwu tatialam pẹ̌sasěsilẹ̌ dingangu tal᷊i mạdal᷊awung su l᷊ehẹ tialang sụsasimpěllọ. Karimạko i sie e tawe měmate mawu ratu.”

³²Tangú i sire mal᷊aing něndehọ u kahiwu ringangu nělawungu tal᷊i su l᷊ehẹ i sire, bọu ene tamai nẹ̌těngong Ahab kụ nẹ̌bera, ”I Benhadad e kai ěllang i Tuang. I sie kụkakindoạ u mal᷊owọko i Tuang e tawe měmate si sie.” I Ahab simimbang, ”Bědangbem biahẹ̌ i sie, anạu sěmbaụku ene?”

³³Kerene, manga pěrwirang Benhadad ene kạpangampal᷊e tialane mapia wọʼi Ahab. Kụ piạ i Ahab nẹ̌berang ”anạu sěmbaụ,” i sire apidu simimbang u, ”Kahěngang, i Benhadad e kai anạu sěmbaụ i Tuang.” Bọu e angkuěng i Ahab, ”Ěntudẹ̌ko ramahi i sie!” Ene i Benhadad nasongọ e, i Ahab němaringang i sie simake su kareta.

³⁴Mase angkuěng i Benhadad si sie, ”Iạ sarung měnul᷊eng kal᷊awọu soa apan seng nipul᷊ahong amangku e wọu i amang i tuang e si tuang. I tuang e wotonge lai mamětị pungu pal᷊ahumbal᷊ụ su soan Damsyik kerẹewe seng nikoạ i amangku e su Samaria.” Sasimbang i Ahab, ”Iwanggilẹ̌ su pẹ̌kakědon Tuange, ute iạ e mapakal᷊iwirʼi Tuang.” Bọu ene i Ahab kai nẹ̌koạko riandi ringangi Benhadad bọu e něměllọ i sie.

³⁵Ual᷊ingu parentam MAWU e, sěngkatau nabi wọu tal᷊oaran nabi sěnggal᷊ipoho něngoro ringange piněměbahẹ̌ si sie. Kaiso ringange ene e mạdiri.

³⁶ Bọu e nabi ene nẹ̌bera, ”Ual᷊ingu i kau e tawe timuhụ parentam MAWU, i kau e sarung těmboěngu singa tạ kararěnane bọu i kau e mapul᷊ẹ bọu ini.” Kahěngang. Sarětạeng i sie rimal᷊eng bọu ene, i sie nitěmboěngken singa.

³⁷Bọu e nabi ene nakoạ sol᷊ong anun taumata wal᷊ine ringangu nẹ̌bera, ”Pěmẹ̌bahẹ̌ si siạ!” Tangú tau ene něměbahẹ̌ pinakaihạ-ihạ sarangkewe nal᷊esẹ.

³⁸Bọu ene nabi ene něnukuse ghatine ringangu hekạ sěngkauhẹ̌, tadeạu tawe ikakiral᷊an taumata, kụ bọu ene i sie rimarisị su wiwihu ral᷊eng kạpěngampal᷊e ratung Israelẹ̌ masahe.

³⁹Arakutẹu ratu e nasahẹ e, nabi e měngkate nẹ̌bera si sie, ”Mawum Batangeng Bẹ̌bantugang, su tempong iạ nạung kapẹ̌sẹ̌sekẹ e su pẹ̌seketang e, sěngkatau sordado e ramahi něnondang sěngkatau wọu rokạ kụ kinasamẹ e nitonda si siạ. Sordado ene e nẹ̌bera, ”Lukadewe pakapia tau ini e. Mạengu i sie tumal᷊ang, ute i kau e hinong pateěng apěngaweng si sie arau apěmaehẹ̌ těllu hiwu su kal᷊ěpane wọu roitẹ̌ sal᷊aka e.”

⁴⁰Kaiso tuhụ e piạ iạ nạung měngkate su katasibune e, tau ene e timal᷊ang u watangenge.” Datu e simimbang, ”I kau e seng něnawong hukumangu e hala. Harusẹ̌ i kau měnal᷊udẹ̌ ene.”

⁴¹Nabi ene e nělekesẹ̌ko hekạ tatukusẹ̌ gatine, mase ratu e nakakiral᷊a si sie kere sěngkatau nabi.

⁴²Tangú nẹ̌berạe nabi ene su ratu, ”Seng ini e nipěhengetangu MAWU: ’Taumata kụ Takụ ilẹ̌oro pakịpate e kutẹu kawe nipakawalanu e timal᷊ang. Ual᷊ingu ene i kau e harusẹ̌ mate kere laaweng e. Těntarang kamene e sarung mawinasa kahiang pěmamalang kamene su těntarang sekẹ e niapatal᷊ang.’ ”

⁴³Kụ datu e napul᷊ẹ e sol᷊ong Samaria piạ sěsile ringangu piạ langehe.