Read Sangir MANGA RATU HUMOTONG 21 Bible Online

MANGA RATU HUMOTONG 21 - Sangir bible

MANGA RATU HUMOTONG 21

¹Su rěduhu wal᷊oarị u Ratu i Ahab su Yisreel piạ bawaelangu anggorẹ̌ sěmpẹ̌tong tataghuanengu sěngkatau arenge i Nabot.

²Su sahěllo i Ahab nẹ̌bera si Nabot, ”Gěllịko wawaelangu anggorẹ̌ ene si siạ, batụu waelẹ̌ ene e masandigu wal᷊oarịku. Iạ kai luěnningu mẹ̌suang manga rukụ sene. I kau e sarung makahombang bawaelangu anggorẹ̌ limembong kapiane kere laawenge, arau kamagengu mapulu tangú iạ e hědo měměllị mạengu arěgane mẹ̌tatahino.”

³I Nabot simimbang, ”Baelu anggorẹ̌ ini e kai pusakạ u manga i upungku. Su arengu Mawu Ruata, iạ e tawe wotonge měgěllị si Tuang!”

⁴Su naunge piạ sěsile ringangu limangehẹ̌ ual᷊ingu nakaringihẹ̌ apang niwerang Nabot si sie, i Ahab napul᷊ẹ kụ bọu ene rimal᷊oka su katatikilange apidu nẹ̌bilingu ghatine kụ mạdiri kumaěng.

⁵I Izebel kawinge nakoạ sol᷊ong anune kụ nakiwal᷊o, ”Unụe i kau e nẹ̌sasěsilẹ̌? Unụ e tawe mapulu kumaěng?”

⁶I Ahab simimbang, ”Iạ e ral᷊akisẹ̌ naungku si Nabot. Iạ e mědẹ̌dorong si sie tadeạu i sie mẹ̌bal᷊ụ u waelu anggore si siạ, arau iạ e měnal᷊iu ringangu wawaelangu anggorẹ̌ e wal᷊ine, kereu ene e kẹ̌kapulune e, kaiso i sie kawe mạdiri!”

⁷”I kau karạ kai ratung Israelẹ̌!” angkuěng i Izebel. ”Kụ ini e pẹ̌bangungke kụ kaěngko. Pakal᷊uasẹ̌ko naungu, u iạ hědong měngonggọu wawaelangu anggorʼi Nabot ene si kau e!”

⁸Tangu Izebel němohẹu suratẹ̌ su areng i Ahab dingangu něnděkạ u mětěrain datu su suratẹ̌ ene. Suratẹ̌ ene niringọ e su manga těmbonange ringangu pangahạu kawanua su Yisreel.

⁹Kụ ini e lohon suratẹ̌ ene, ”Bohangko tadeạu kawanua e mẹ̌puhědang dingangu oroko i sire apẹ̌tampung! Su ral᷊ungu pẹ̌sasombang ene gěllirewe kal᷊aianeng su horone i Nabot.

¹⁰Kụ dolohẹ̌ko tau ral᷊akisẹ̌ darua e pẹ̌těngon sie ringangu pěngěnsilʼi sie u i sie kai něngane Ruata ringangu ratu. Bọu ene wawako i sie sol᷊ong likudu soa, ringangu wahungengkom batu i sie sarang mate!”

¹¹Parentan Izebelẹ̌ ene nituhukangu manga těmbonange ringangu pangahạu kawanuang Yisreel.

¹²I sire němpěmohang tadeạu kawanua e mẹ̌puhědang. Bọu ene i sire něngoro taumata apẹ̌tampung dingangu i Nabot nighělirangu tampạ su horone.

¹³Taumata ral᷊akisẹ̌ duang katau kimaiang nẹ̌těngon Nabot, kụ su těngon lawọ i rẹ̌dua e něngěnsilʼi sie u i sie kai seng něngane Ruata ringangu ratu. Ual᷊ingu ene i sie niwawa sol᷊ong likudu soa kụ bọu ene niwahungangu watu sarang nate.

¹⁴Habaru pěmamate si Nabot nipakiul᷊ị si Izebel.

¹⁵Ta nararěnnạ sarang Izebel nakaringihẹ̌ habarẹ̌ ene e nẹ̌berạ e i sie si Ahab u, ”I Nabot seng nate. Kụ ini e rakọ e al᷊ạ bawaelangu anggorẹ̌ ene kụ tawe mapulu iwal᷊ụ e si kau.”

¹⁶I Ahab mal᷊ighạ-lighạ nẹ̌běngkal᷊ẹ̌ dimal᷊eng kụ něngal᷊ạ baelu anggorẹ̌ ene e nakoạ darotonge.

¹⁷Bọu e angkuěngu MAWU si Elia, nabi wọu Tisbe ene,

¹⁸”I Ahab datun Samaria ene, orasẹ̌ ini e ene su waelu anggorʼi Nabot kụ kai mapulu měngal᷊ạ baelẹ̌ ene makoạ tataghuanenge, kụ dakọ e tamai,

¹⁹kụ paul᷊ịko si sie, u Iạ e MAWU, něhengetang kere ini, ’Seng němate, bědangko l᷊ai něhampasẹ̌. Ual᷊ingu ene rahanu sarung lanukang u asu su tampạ u manga asu měmpělẹ̌lanu dahang Nabot!’ ”

²⁰Piạ i Ahab nakasilo si Elia, i sie nẹ̌bera, ”Ei rokạ kasueěnge i kau e nakaěbạ si siạ!” ”Kahěngang bue,” angkuěng i Elia. ”Batụu i Tuang nẹ̌karaki nẹ̌koạ dal᷊akisẹ̌ su matam MAWU,

²¹kai ini nipěhengetang u MAWU e si Tuang, ’Iạ e kai maparěntang hombang su watangengu. I kau sarung ipakal᷊iu, mase apang manga esẹ su ral᷊ungu walagu, maghurang dingangu mangudạ, Takụ ipakapuạ.

²²Balagu e sarung ipakakoạ kere walagu Ratu i Yerobeam anạ i Nebat dingangu kere walagu Ratu i Baesa anạ i Ahia, ual᷊ingu i kau e seng nakakariadin tau Israel nẹ̌dosa kụ nakawodaị dal᷊angehẹ̌-Ku.’

²³ Dingangu mạanung Izebel, MAWU e nẹ̌berau, wal᷊unangu wadange sarung kinaseng u asu su ral᷊ungu soan Yisreel.

²⁴Balạewe i sai wọu tal᷊oaran balagu e kụ nate su soa e sarung kinaseng u asu, dingangu apan nate su l᷊ikudu soa e sarung kinasengu manga manụ u winalangeng.”

²⁵Tawẹ běke piạ taumata kụ mẹ̌kẹ̌karaki měkoạ dal᷊akisẹ̌ su matam MAWU mẹ̌sul᷊ungu kere nikoạ i Ahab. Kěbị karal᷊akisẹ̌ ene e nikoạ e ual᷊ingu sasahowong u kawinge i Izebel.

²⁶I Ahab mẹ̌kẹ̌koạ dosa makạkahina: i sie mẹ̌sẹ̌suba mahan duata kere kẹ̌koatengu tau Amori, kụ kai i sire apan seng niuseru MAWU nipasěbang bọu ěntanang Kanaan su tempon tau Israel nakasuẹ̌ su wanua ene.

²⁷Bouten i Elia e nasuem berane, i Ahab něnggehẹ e pakeange kụ něndehọ e kahiwune wọu karong kere tialang pẹ̌sasěsile, mase nẹ̌puhědang. Tempong kạtikị e mal᷊aing měděndehọu kahiwune karong, mase kereu rumal᷊eng, gatine měngkai hanesẹ̌ lụlahunsusa.

²⁸MAWU e něhengetang su Nabi Elia,

²⁹”I kau e seng nakasilo kereapa i Ahab kụkakohom batangenge su těngo-Ku? Ual᷊ingu ene, Iạ e tawe maparěntang hombang karěngụ u i sie e wědam biahẹ̌. Su tempong anạ e ute wuhụewe Iạ maparěntang hombang ene waugu walage.”