Read Sangir MANGA RATU HUMOTONG 3 Bible Online

MANGA RATU HUMOTONG 3 - Sangir bible

MANGA RATU HUMOTONG 3

¹Datu i Salomo napakariading Misirẹ̌ e sěndinganenge kụ někawingu ahusu ratung Misirẹ̌. Ahusu ratu wawine ene e niwawang Salomo sol᷊ong Soan Daud mẹ̌deạu matanạ sene sarangkewe istanan datu e ringangu Wal᷊em MAWU ore lai těndạ nělikụ Yerusalem nasueng pětị e.

²Ual᷊ingu Wal᷊eng MAWU e tawe niwẹ̌bangung su tempo ene, ute kawanua e wědang měnẹ̌narakang u sasěmban sire suapan tampạ.

³I Salomo e kụkěndagu MAWU ringangu tụtol᷊e manga tatul᷊adang amange, kai tangú i sie wědang mạmotọ dingangu mạnarakang u sasěmba binatang e suapan tampạ.

⁴Tampạ u pẹ̌kakal᷊iomanengang něngalembong timeleng e kai kaẹ̌bakeng su Gibeon. I Salomo pẹ̌sěngkakuhuang e mạnarakangu sasěmba sene. Piạ su sahěllo, kerẹ e wiasane, i sie saụ ewe natamai.

⁵Sěhěbi ene MAWU e nẹ̌těngkatodẹ u watangenge si sie su ral᷊ungu ipi kụ nẹ̌bera, ”Salomo, pẹ̌dorongke apạeweng ilẹ̌ěnningu, kụ ene sarung Takụ ionggọ si kau!”

⁶I Salomo simimbang, ”MAWU, i Kau e seng něnodẹu i Kau e masaria kakěndagu si amangku i Daud, ěllangʼU ene. I sie mapia ringangu matul᷊idẹ̌ naunge ringangu masatia si Kau. Kụ nakoạ kere laěking e ute waugu sarang marěngụ i Kau e tatapẹ̌ kụkěndagi sie, i Kau e nẹ̌gěllịu ahusẹ̌ esẹ sěngkatau si sie kụ orasẹ̌ ini e mẹ̌pẹ̌parenta něngaweng si sie.

⁷O MAWU, Ruataku, i Kau e něhengkẹ u iạ nakoạ datu něngaweng si amangku, manịeng iạ bědang tumanịu mangudạ dingangu wěga wue měnsang kai kereapa kakakoạ u mẹ̌parenta.

⁸Iạ e kai nẹ̌biahẹ̌ sutal᷊oarang bansa seng nipile-Nu nakoạ umatʼU e hala. I sire kai sěmbaụ bansa masěllahẹ̌ kụ sen tawe karekenang kakěpal᷊e.

⁹Ual᷊ingu ene, MAWU, mal᷊owọko iạ deng gěllirangu kapelesa takụ gẹ̌gausang baugu mẹ̌parenta umatʼU ini e su kaadile ringangu mědeạu makakoạ mẹ̌dal᷊ahaedu měnsang sude mapia ringangu sude ral᷊akisẹ̌. Mạeng bal᷊inewe kerene ute, mariadiwe kereapa kụ iạ makapẹ̌parentawe umatʼU masěllahẹ̌ ini e?”

¹⁰Mawu e mal᷊uasẹ̌ su rorong i Salomo ene,

¹¹ringangu něhengetang si sie, ”Ual᷊ingu i kau e kawe nẹ̌dorong kapelesa waugu mẹ̌parenta su kaadile kụ bal᷊inewe umurẹ̌ manandụ arau kakakalạ baugu watangengu hala e arau papate waugu manga sědụ u e,

¹²tangú rorongu ene sarung Takụ daringihang. Iạ e sarung mapakariading kau něngalembong pelesa ringangu něngalembong piạ kasingkạ e matimu wọu i sai-sai, bae su tempo něngkal᷊iu arau lai su tempo ramahi.

¹³Sarangkewe apang tawe rarorongangu e mal᷊aing sarung Takụ ionggọ si kau: kanandung pẹ̌bawiahu i kau e sarung makalạ dingangu něngalembo adateng němal᷊iu manga ratu lai wal᷊ine.

¹⁴Kụ kereu i kau, kerẹewe nạung i amangu i Daud, dụdaringihẹ̌ si Siạ dingangu tụtol᷊e manga tita-Ku, Iạ e sarung měngonggọu umurẹ̌ manandụ si kau.”

¹⁵Ene nẹ̌bangungke, i Salomo kụ nakahěngangke u Mawu Ruata e seng nẹ̌bisara si sie su ral᷊ungu ipi. Tangú nẹ̌sul᷊ẹ e i sie sol᷊ong Yerusalem, bọu ene rimarisị su těngong Petim Pẹ̌dariandim MAWU ringangu něnarakangu sasěmba tinongkạ dingangu sasěmbang pẹ̌darame. Bọu e i sie namětị sal᷊iwang baugu kal᷊awọu sawohị e.

¹⁶Piạ su sěhěllo, duang katau wawine tahasundal᷊ẹ̌ diměnta nẹ̌těngon Datu i Salomo.

¹⁷Sěngkatau wọu i sire nẹ̌bera, ”Tuangku Mawantugẹ̌, iạ dingangu tau wawine ini e mạtanạ su wal᷊e sěmbaụ. Tawẹ apa taumata wal᷊ine kụ matanạ dingang i kami. Pira tempo tamai nal᷊iu e, iạ namantelu rariọ esẹ sěngkatau. Dua ěllo tuhụ e bawine ini e mal᷊aing namantelu anạ e esẹ lai sěmbaụ.

¹⁹Piạ sěhěbi i kami kạpahuntikị e, bawine ini bal᷊inewe nẹ̌tatudẹ nangěpisẹ̌ anạ e sarangkewe nate.

²⁰Kẹ̌kal᷊oarane nạung iạ kạtikị e i sie nẹ̌bangung něngal᷊ạ anạku wọu sěndihangku. Anạku ene nipěllọ e su katatikilange, mase anạ e nạung seng nate ene e, nipěllọ e su katatikilangku.

²¹Sěngkariọěllone mal᷊ukadẹ̌ e piạ iạ nẹ̌bangung kụ mapasusung anạku ene, takụ kinaěbakeng i sie sen nate. Ene iạ bọuteng kimakěllạ, nal᷊ahẹ u i sie wal᷊inewe anạku.”

²²”Konti,” angkuěngu wawine wal᷊ine ene, ”Biahẹ̌ ini e kai anạku, arawe nate ute kai anạu!” ”Tala!” angkuěng u wawine humotong ene. ”Nate ini e anạ u, arawe wiahẹ̌ e anạku!” Kerene i sire němpẹ̌darendehẹ̌ su těngon datu.

²³Tangú angkuěngu Ratu i Salomo, ”I kamene sěngkatau-sěngkatau němpěngaku u rariọ kụ biahẹ̌ ini e anạ u kụ bal᷊inewe ěndaị seng nate.”

²⁴Ene wọuten nẹ̌bera kerene datu e rimolohu taumata niapěngal᷊ạ peda.

²⁵Bọu e ratu nẹ̌parenta, ”Potọ e rariọ biahẹ̌ ěndaị pahiạ darua kụ gěllị e pẹ̌sěmpotọ si rẹ̌dua wawine ěndaị sěngkatau-sěngkatau.”

²⁶Nakaringihẹ̌ parenta ene, tangú i ninangu rariọ tutune e nẹ̌bera, ”Mẹ̌dorong ampung, Tuang, abe pate rariọ ene. Gěllị e si sie.” Tau wawine ěndaị e něbera kerene ual᷊ingu i sie makěndagẹ̌ tạ sihinge su anạ e. Arawe wawine sěngkataụ e wue ute nẹ̌bera u, ”Ore, měngkate potọ, tadeạu seng tawẹ u makaěbạ sarang sěngkatau wọu i kami!”

²⁷Tangú něberạ e i Salomo, ”Abe pate rariọ ene! Sarakangke su wawine humotong ěndaị — seng i sie i ninange tutune něngědihẹ̌.”

²⁸Ene tau Israel nakaringihẹ̌ putusang i Salomo su ral᷊ungu pěrkara ene, i sire měngkawe naherang dingangu maadatẹ̌ si sie. U, nal᷊ahẹ u Ruata e seng něngonggọu kapelesa si sie mědeạu adilẹ̌ kakanoạ e.