Read Sangir MANGA RATU HUMOTONG 5 Bible Online

MANGA RATU HUMOTONG 5 - Sangir bible

MANGA RATU HUMOTONG 5

¹I Hiram datun Tirus, sěntiniạ mědẹ̌dal᷊ahapị u Ratu i Daud. Ene piạ i Hiram nakaringihẹ̌ u i Salomo kawe seng nakoạ datu něngaweng si Daud i amange, i sie něndolohu rarolohange si Salomo.

²Mase i Salomo e něndingọ u tatanatane kere ini si Hiram,

³”Datu i Hiram Mawantugẹ̌! Semben tantu i Tuang e masingkạ u i amangku i Daud měngkate masau mạsihasa mẹ̌sekẹ ual᷊ingu lẹ̌aloěngu sědụ bọu apan soa mạngělikụ si kami. Dingangu ual᷊ingu MAWU e rem bědang tawe nẹ̌ngonggọu kal᷊auntu si sie němatạ kal᷊awọu sědụ e, i sie tawe nakareạ loahe něndarisị u Wal᷊em pẹ̌kakal᷊iomanengang su MAWU Ruatane.

⁴Kai orasẹ̌ ini e MAWU Ruataku seng něngonggọu pẹ̌darame su kasěllahu paparentaěngku. Iạ e tawẹ apa sědụ, ringangu tawẹ apa lai hombang nạdiadi su wanuaku.

⁵ MAWU e seng nẹ̌kědo kere ini si amangku i Daud, ’Ahusu e sarung Takụ iruị makoạ datu pěngaweng si kau kụ sarung měmětị bal᷊eng pẹ̌kakal᷊iomanengang baugu Iạ.’ Ual᷊ingu ene, i Tuangku Hiram Lẹ̌adateng, iạ e i Salomo seng němutusẹ̌ u waugu měmětị godoěng ene.

⁶I Tuang seng nakahěngang u sutal᷊oarang kawanuaku e tawẹ apa kụ pande měnuwang kalu e kere kawanuang Tuang. Ual᷊ingu ene, iạ mělẹ̌harapẹ̌ u mal᷊owọko i Tuang měndolohu taumatan Tuang apěnuwang manga kalun cěmarang Libanon baugu iạ. Kawanuaku e sarung takụ irolohẹ̌ apẹ̌sasumbala si sire, ringangu měnsang baewe lai pira wawaehe seng nitilakehʼi Tuang baugu taumatan Tuang ene, iạ e mang měmaehẹ̌.”

⁷I Hiram mal᷊uasẹ̌ kahěngang piạ e nakaringihẹ̌ habarẹ̌ ene. I sie nẹ̌bera, ”Karaloko MAWU e sahěllo ini, ual᷊ingu i Sie něngonggọu ahuse sěngkatau pelesa si Daud, tadeạu makoạ datum bansa masěllahẹ̌ ene.”

⁸Mase i Hiram něndohong sasimbange kere ini si Salomo, ”Iạ e seng nakatarimạ u habarʼu rorong i Tuang, kụ iạ e sadia měngganapẹ̌ toneng i Tuang. Iạ e měndiahi kalun cěmarang Libanon dingangu kalun cěmara wiasa e kerẹewe su toneng i Tuang.

⁹Taumataku e sarung mẹ̌bawa kalu ene pakilintụ bọu Libanon sol᷊ong sasị. Kụ sene manga watangu kalu ene sarung ipẹ̌papangikị i sire ipakakoạ hakị kụ ionodi sire pẹ̌batụ biwihu apeng sarangkewe mawunạ u tampạ seng nitantun Tuang. Sene manga hakị ene sarung lukaěng i sire mase ionggọ su taumatan Tuang pakipandunge turusẹ̌. Bọu i Tuang, tangú iạ kai piạ tonengku tadeạu i Tuang pěnadiangkong kaěng baugu kal᷊awọu lohong istanaku.”

¹⁰Tangú i Hiram něngonggọu kal᷊awọu kalun cěmarang Libanon dingangu kalun cěmara wiasa kal᷊awọeweng gẹ̌gausange, si Salomo.

¹¹Kụ baugu mapakaěng u lohong kal᷊awọu istanang Hiram ene e, apan taung i Salomo e mẹ̌gěllịu gandung 322.500 su kilone wěhạ e ringangu 4.400 su literẹ̌[5] kal᷊awọu lanang zaitun tutune, si Hiram.

¹²MAWU e napakasěhụ u kědonʼE ringangu něgěllịu kapelesa si Salomo. Sutal᷊oarang Hiram dẹ̌duang Salomo piạ pěral᷊ahěmpukange mapia, kụ sutal᷊oaran dědua e kai seng mạl᷊aikị su kiren dẹ̌dua.

¹³Datu i Salomo napasěbang u manga esẹ i sire 30.000 wọu kasěllahu Israel baugu hal᷊ẹ̌ u sihasa,

¹⁴ ringangu něhengkẹ i Adoniram nakoạ měnanahimata si sire. I Salomo němahiạ i sire su ral᷊ungu těllung kamonaěng, pẹ̌sěngkamonaěng pẹ̌tahạ 10.000 su kataune. I sire těllung kamonaěng ene e mědẹ̌darol᷊osẹ̌ mạtanạ su Libanon pẹ̌sěmbul᷊ang dingangu pẹ̌tahạ dua wul᷊ang su wal᷊e.

¹⁵I Salomo e mal᷊aing napasěbang u 80.000 su kataune waugu pěmakang batu wọu wul᷊ude kụ 70.000 su kataune pẹ̌masaěng manga watu ene.

¹⁶I sie něhengkẹ u mandorẹ̌ 3.300 su kataune waugu pěnahimata hal᷊ẹ̌ ene.

¹⁷Ual᷊ingu laorone lai i sire němakang manga watu ghagherẹ maral᷊ěnggihẹ̌ baugu pondasing Bal᷊em MAWU.

¹⁸Kerene mělahal᷊ẹ̌ i Salomo e ringangu manga mělahal᷊ẹ̌ i Hiram ore lai i sire wọu soang Gebal něndiahing batu ringangu kalu waugu pěmamětịu Wal᷊em MAWU ene.