Read Sangir MANGA RATU HUMOTONG 6 Bible Online

MANGA RATU HUMOTONG 6 - Sangir bible

MANGA RATU HUMOTONG 6

¹I Salomo nanětạ e namětị Bal᷊em MAWU su wul᷊ang Ziw, mangal᷊ene su wul᷊ang karuane, su taung kaěpạ e su tempong i sie nẹ̌parenta, kụ 480 su taunge samurin tau Israel naněntangu Misirẹ̌.

²Ukurang u Wal᷊em MAWU e su wahageang dal᷊unge ute kai kere ini: nandune 27 su metere, wěnahe 9 meterẹ̌, dingangu rangẹ e 13,5 su metere.

³Su wahageang těngone wọu Wal᷊em MAWU e piạ pẹ̌kakomol᷊ang kụ nandune 4,5 su metere ringangu wěnahe 9 meterẹ̌, kawěnahewem bal᷊e ene lai.

⁴Su meselu wal᷊e ene piạ manga lohangu janela kụ naměnahẹ̌ sol᷊ong dal᷊unge.

⁵Su piạ likudu Wal᷊em MAWU ene nal᷊ikụ e su meselẹ̌, su l᷊ikude, nikoạ e manga kamarẹ̌ měsẹ̌sasusung. Kai těllu haweng dangẹ e, kụ pẹ̌sěhaweng tangu kai 2,2 su metere.

⁶Su hawenge humotong, běnahu apang kamarẹ̌ e 2,2 su metere arawe su hawenge karuane 2,7 su metere, ringangu su hawenge katěllune ute 3,1 su metere. Mesele watuhu wawa e něngalembong kasuwenehe wọu meselu hawenge suwowone, hakịu manga sal᷊awakung kamarẹ̌ nitapị ene e nẹ̌dal᷊ahěmpụ u meselu Wal᷊em MAWU e, kụ tawe nělohang meselẹ̌ ene.

⁷Baugu manga sal᷊awaku ene e nikoạ bọu kalun cěmarang Libanon. Manga tukadu kamarẹ̌ tapị kụ su hawenge wawa e kaěbakeng su sěmběkan timuhẹ̌, mase waugu hawenge karuane ringangu katěllune piạ tukadẹ̌ nipihu. Bọu ene i Salomo e němasẹ̌ loteng u wal᷊e ene. Baugu ene tangú nẹ̌pakẹ u manga kasone ringangu pěpal᷊e wọu kalun cěmarang Libanon. Karěngụ u Wal᷊em MAWU ene kẹ̌koateng, apawe tawe ikararingihẹ̌ tingihu rarupa, wal᷊iung arau manga pakakasẹ̌ uase, batụu manga watu ipẹ̌pakẹ baugu bangunang ene e seng nịdariahi kal᷊imona su tempon deng bědang pěngal᷊iange. Kerene kakakoạ i Salomo e nẹ̌koạ Bal᷊em MAWU ene sarangkewe nauadipẹ̌.

¹¹Tangú MAWU e něhengetangke si Salomo,

¹²”Kereu i kau e satia wue tumuhụ kal᷊awọu tita-Ku ringangu laoro-Ku e, ute Iạ e sarung mapakasěhụ u apan seng Takụ nikědo si amangu i Daud.

¹³Iạ e sarung matanạ su ral᷊ungu wal᷊e nikoạ u ini e sutal᷊oarang umatẹ̌-Ku Israel. Iạ e sarung tawe maněntang i sire.”

¹⁴Kai kere ini kakakoạ i Salomo nangěnsue pẹ̌kakoạ Bal᷊em MAWU ene:

¹⁵Kal᷊awọu meselẹ̌ batuhu ral᷊unge nipikungu kalun cěmarang Libanon, nanětạ bọu lantene sarang lotenge. Lantene nikoạ bọu kalun cěmara wiasa.

¹⁶ Su ral᷊ungu wal᷊e ene watuhu l᷊ikude nikoateng kamare kụ němasẹ̌ u ral᷊ansene piněměta, nikoạ bọu kalun cěmara, nanětạ bọu lante sarang loteng. Kamarẹ̌ ene e nisěbạ Huange Kasusiange; nandune sio meterẹ̌.

¹⁷Huange su těngon Huange Kasusiange ene e isẹ̌sẹ̌bạ Huange Masěllahẹ̌, kụ nandụ e 18 su metere.

¹⁸Meselu wal᷊e ene watuhu ral᷊unge kěbị nipikungu kalun cěmarang Libanon, hakịu manga watum meselẹ̌ tawe kạdiongeng nikasilo. Dal᷊apisẹ̌ ene nilẹ̌gaheng u ukiru wuan labu ringangu manga bungang měmẹ̌měsị.

¹⁹Huange Kasusiange kụ nikoạ su ral᷊ungu Wal᷊em MAWU ene nisạdia waugu Petim Pẹ̌darianding MAWU.

²⁰ Huange ene, nandune, wěnahe, ringangu rangẹ e mẹ̌sul᷊ung pẹ̌tahạ sio meterẹ̌. Pananěmbaěng su těngong Huange Kasasusiange nikoạ e wọu kalun cěmarang Libanon. Su tukadẹ̌ sasuěkang sol᷊ong huange ene nipěhatedangu hante wul᷊aeng. Kasěllahu ral᷊ungu Wal᷊em MAWU ene kụ nasowa l᷊ai Huange Kasusiange ringangu pananěmbaěnge niěmboěngu wul᷊aeng sahị.

²³ Su ral᷊ungu Huange Kasusiange ene tangú piněměllokangu tul᷊adang kerub[6] darua nikoạ bọu kalun zaitun. Tul᷊ada rarua ene e sěmbaụ-sěmbaụ dangẹ e 4,4 su metere;

²⁴ukurange ringangu wal᷊akane mẹ̌sul᷊ung. Sěmbaụ-sěmbaụ e piạ papanide pẹ̌tahạ dua, kụ papanide sěmbaụ e nandune 2,2 meterẹ̌. Běllạu pondol᷊u papanide rarua e pětahạ 4,4 su meterẹ̌.

²⁷Tul᷊ada rarua ene e nipěllọko mẹ̌sẹ̌sihe su ral᷊ungu Huange Kasusiange hakịu papanide pẹ̌sěmběka wọu apan tul᷊ada ene e nakasenggehẹ̌ darěndung mase papanide sěmběka wal᷊ine ute mẹ̌sẹ̌sasenggehẹ̌ sutal᷊oarang kamarẹ̌ ene.

²⁸Tul᷊adang malaekatẹ̌ darua ene e niěmboěngu wul᷊aeng.

²⁹Kal᷊awọu rarěndungu Wal᷊em MAWU ene watuhu ral᷊unge nilẹ̌gahengu ketạu manga kerub, manga kakaluang u palěm, dingangu manga bungang něměsị.

³⁰Lante su ral᷊ungu Wal᷊em MAWU ene e kěbị e niěmboěngu wul᷊aeng.

³¹Su tukadẹ̌ sasuěkang sol᷊ong dal᷊ungu Huang Kasusiange ene nisangetang u raungu tukadẹ̌ ruang kal᷊ěpa wọu kalung zaitun. Těngom tukadẹ̌ ene watuhu rasị e sahene piạ tal᷊ětuge mahoro sutal᷊oarane.

³²Daukalum tukade ruang kal᷊ěpa ene lělẹ̌gaheng u ketạu kerub, kalung palěm, dingangu manga bungang němpěměsị. Daungu tukade, tul᷊adang kerub dingangu ketạu manga kalum palěm, kěbị e nipikungu wul᷊aeng.

³³Su tukadu sasuěkang sol᷊ong dal᷊ungu huang e su těngone, huang e masaria, nisaketangu bingken tukadẹ̌ nikoạ bọu kalun zaitun, pinẹ̌buku ěpạ tuhụ nandune ringangu wěnahe.

³⁴Kerene lai nikoateng daungu tukade rarua wọu kalun cěmara wiasa, kụ sěmbaụ-sěmbaụ botonge mal᷊ěku.

³⁵Manga raungu tukadẹ̌ ene nilěgahengu ketạu kerub, kalum palěm dingangu bungang něměsị. Kal᷊awọu ketạu ene piạ laěmbone wul᷊aeng.

³⁶Su těngong Bal᷊em MAWU e nikoateng tanumbal᷊e su ral᷊unge. Tanumbal᷊e ene nilikutangu meselẹ̌ mědẹ̌dal᷊ahaweng: su wowong lěnsungu watu pẹ̌tahạ těllu haweng, piạ kalun cěmarang Libanon sěhaweng.

³⁷Pondasing Bal᷊em MAWU ene nipěllọ su wul᷊ang u Ziw, bul᷊ang karuane, su taung kaěpạ e su kawasang Datu i Salomo.

³⁸Dingangu su wul᷊ang u Bul, bul᷊ang kaual᷊une, su taung kapul᷊oěsane su tempong i sie mẹ̌pẹ̌parenta, nauadipẹ̌ Wal᷊em MAWU ene nipětị i Salomo, natuhụewe su karakine. Pěmamětị Bal᷊em MAWU ene děngụ e ghěnnangu pitu taung karěngụ e.