Read Sangir MANGA RATU HUMOTONG 7 Bible Online

MANGA RATU HUMOTONG 7 - Sangir bible

MANGA RATU HUMOTONG 7

¹I Salomo namětị lai istana waugu watangenge. Pěmamangung istana ene děngụ e mapul᷊o těllu su taunge.

²Su istana ene i Salomo nẹ̌koạ huange isẹ̌sẹ̌bạ, ”Bal᷊eng Kěhung Libanon.”[7] Ukurange: nandune 44 su metere, wěnahe 22 su metere dingangu rangẹ e 13,5 su metere. Bal᷊e ene piạ dihine wọu kalun cěmarang Libanon těllung tente; pẹ̌sěntara ute tahạ 15 su wuane rihine, ringangu su wowone nisangetangu manga kaso wọu kalun cěmarang Libanon. Manga lotenge nikoạ bọu kalu mẹ̌sul᷊ung kụ něhěmbung kewe manga kaso e.

⁴Darěndung sěmběkane kaihi ringangu koaneng bọu pẹ̌kakomol᷊ang ene piạ manga janelane: těllun tara su rarěndung sěmbaụ tụtatěngo těllun tara wọu rarěndunge wal᷊ine. Bingkem manga tukadẹ̌ dingangu manga janelane pinẹ̌buku ěpạ mananandụ.

⁶I Salomo němangung lai ”Wal᷊eng Pilarẹ̌.” Nandune wal᷊e ene 22 su metere ringangu wěnahe 13,5 su metere. Su těngom bal᷊e ene piạ huange piạ pilarẹ̌ e ringangu piạ tumbal᷊atunge.

⁷Bal᷊e wal᷊ine ute kai ”Wal᷊eng Kal᷊aianeng” kụ mal᷊aing isẹ̌sẹ̌bạ Wal᷊eng Pěnggaghutaěng. Bal᷊e ini e tangú, wọu lantene sarang manga kasone, niěmboěngu kalun cěmarang Libanon. Seng su wal᷊e ini e i Salomo měmutusu kal᷊awọu pěrkarang pěnggaghutaěng.

⁸ Katatanakeng i Salomo e nikoạ kere manga ghodoěng bal᷊ine kụ kaěbakeng su pilarẹ̌ e wal᷊ine su l᷊ikudu Wal᷊eng Pěnggaghutaěng. Baugu kawinge, kụ kai sangiangu ratum Misirẹ̌ e, i Salomo mal᷊aing němangung godoěng gahị e mẹ̌sul᷊ung.

⁹Kasěllahu bangunang ene, nasowa l᷊ai kasariang bal᷊unange, wọu pondasine sarang atụ e, nikoạ bọu watu maral᷊enggihẹ̌. Manga watu ene nịdariahi su pěngangal᷊iang batu, kụ nịpẹ̌papotọ tuhụ ukurange; watuhu ral᷊unge ringangu watuhu l᷊ikude niteneng lahaghari.

¹⁰Pondasing manga ghodoěng ene e nikoạ bọu manga watu ghaghuwạ maral᷊ěgadẹ̌. Manga watu ene piạ u 3,5 su metere nandune, piạ u l᷊ai 4 u meterẹ̌.

¹¹Su wowone nisaketang u manga watu wal᷊ine maral᷊ěgadẹ̌ kụ nipotọ tuhụewe ukurange, bọu ene niěmboěngu kalung cěmarang Libanon.

¹²Meselu rělahu istana ringangu meselu rělahe watuhu ral᷊unge su Wal᷊em MAWU e, ore lai meselu wal᷊e su těngom Bal᷊em MAWU sěmbaụ-sěmbaụ e niěmboěngu kalun cěmarang Libanon pẹ̌sěhaweng su wowom batu pẹ̌tahạ těllu haweng.

¹³Su soan Tirus piạ sěngkatau esẹ isẹ̌sẹ̌bạ si Huram. I sie mambeng kahěngang pande ringangu mal᷊awọ ěbạ e su hal᷊ẹ̌ u mẹ̌koạ kal᷊awọu haghing apal᷊iwụ bọu tambaga. Bahakạ i amange kai tau Tirus dingangu lai pande mẹ̌koạ apal᷊iwụ bọu tambaga. I ninange ute kai hěnton Naftali. Datu i Salomo seng dimolohu taumata tamai piněněnsomahẹ̌ si Huram mědeạu apạděnta kụ apẹ̌němbonang patikụ hal᷊ẹ̌ u pẹ̌kakoạ apal᷊iwụ bọu tambaga. Tangú riměntạe i Huram kụ nẹ̌koạ e apan nighausang i Salomo.

¹⁵I Huram nẹ̌koạ dihi rarua wọu tambaga sěmbaụ-sěmbaụ e pẹ̌tahạ ual᷊u meterẹ̌ dangẹ e, huwaenge 5,3 su metere, dingangu su wěnehu tambaga e 7,4 su sentimetere. Manga rihine ene tawẹ lohone su ral᷊unge.

¹⁶Baugu manga rihi ene, i sie nẹ̌koạ těmbọu rihi rarua wọu tambaga, sěmbaụ-sěmbaụ 2,2 su metere karangẹ e

¹⁷mẹ̌pẹ̌pangawẹu ghal᷊oghong karangẹ e 1,8 su metere. Apan těmbọu rihi ene nilěgahengu wuan dělima ruang tara nikoạ bọu tambaga. Kěbị e tangú rua hasụ su waụ e wuan dělima su těmbọu rihi sěmbaụ. Mase i Huram nẹ̌koạ anangu hante wọu tambaga ringangu něměllọu ene su wowong manga rihi ene. Pẹ̌tahạ pitum baụ anangu hante su wowong dihine sěmbua, dingangu su wowong anangu hante ene lai piạ laěmpahe mal᷊imbolong sěmbaụ. Su wowong laěmpahe mal᷊imbolong ini e,

²¹manga těmbọ u rihi kụ kere paghudu bungang ghal᷊oghong ene nịsasangẹ su manga rihi tamai ene. Manga rihi ene, nipararisị su těngon tukadẹ̌ sasuěkang sol᷊ong Bal᷊em MAWU — sěmbaụ su sěmběkan timuhẹ̌, bal᷊ine ute su sěmběkan sawěnahẹ̌. Dihi su sěmběkan timuhẹ̌ e isẹ̌sẹ̌bạ Yakhin,[8] dingangu su sěmběkan sawěnahẹ̌ e isẹ̌sẹ̌bạ Boas.[9] Kerene kakakoạ e i Huram něngěnsue pẹ̌kakoạ manga rihi ene.

²³Bọu ene i Huram nẹ̌koạ běnsadẹ̌ tambaga mal᷊imbolong sěmbaụ, ukurange tangu: dal᷊unge 2,2 meterẹ̌, běnahu tal᷊oarane 4,4 su metere, ringangu lokonge 13,2 su metere.

²⁴Biwihe su l᷊ikude nangělikụ e nilěgahengu wuang labu ruan tara, kụ nicorẹ̌ sěngkacorẹ̌ dingangu wěnsadẹ̌ ene.

²⁵Běnsadẹ̌ ene nipěllọ su wowong pal᷊ukang sapi tambaga mapul᷊o dua su waụ e — tatěllu tụtatěngo sol᷊ong sawěnahẹ̌ tatěllu sol᷊ong timuhẹ̌, tatěllu sol᷊ong bahẹ, dingangu tatěllu sol᷊ong dakị.

²⁶Su wenehu wěnsadẹ̌ ene 75 su milimetere. Biwihe mẹ̌pẹ̌papangawẹ biwihu lainumang mạl᷊ěde sol᷊ong likude mạngawẹ bungangu ghal᷊oghong mẹ̌měsị. Běnsadẹ̌ ene kẹ̌kal᷊ohoěngu manga 40.000 su litere.

²⁷I Huram mal᷊aing nẹ̌koạ kareta tambaga mapul᷊o, sěmbaụ-sěmbaụ nandune 1,8 su metere, běnahe 1,8 su metere, dangẹ e 1,3 su metere.

²⁸Manga kareta ene nikoạ bọu manga pěpal᷊ẹ̌ pinẹ̌buku ěpạ nisakẹ su ral᷊ungu bingke.

²⁹Manga pěpal᷊e ene nilẹ̌gahengu awẹ u singa, niketạ sapi ringangu kerub. Su manga wingkene — rasị dingangu wawa e piạ gambaru manga singa ringangu sapi ene — kạsasangẹ ketạu tuhẹ u bungang.

³⁰Apang kareta e piạ rodane tambaga ěpạ u waụ dingangu asẹ̌ u roda wọu tambaga lai. Su wukune ěpạ bọu kareta e piạ dihi tatuilẹ̌ dulang bọu tambaga dal᷊ěgahe tuhẹ u bungang su l᷊ikude.

³¹Su pusigu rihi ěpạ tatungkal᷊ẹ̌ ene piněhěmpukangu bingke marimbolong sěmbaụ baugu tatanudẹ̌ dulange. Manga rihi tatanudẹ̌ ene e timol᷊ọ karangẹ e 44 su sentine su wowong pěpal᷊ẹ̌ nẹ̌buku ěpạ ene, dingangu 22 su sentine su al᷊unge. Su mohongu bingke ene piạ ketạe.

³²Dangẹ u manga rodane manga 66 su sentine; kạpapěllọ su al᷊ungu manga pěpal᷊ẹ̌. Asẹ̌ u rodane ringangu karetane nakoạ sěmbahageang.

³³Manga rodane e mẹ̌sul᷊ungu rodang karetan sekẹ; lokongu roda, taralin, asẹ̌ e ringangu pungu taralin dodane kěbị e nikoạ bọu tambaga.

³⁴Kai ěpạ dihi tatuilẹ̌ suapam bukune su al᷊ungu kareta ene. Manga rihi ene tabidạu sěmbaụ dingangu karetane.

³⁵Su wowong kareta ene nal᷊ikụ e piạ bawiwihe wěnahe 22 su sentine. Dihi tatuile ringangu kal᷊awọu manga pěpal᷊e nakoạ sěmbaụ dingangu karetane.

³⁶Manga rihi tatuile ringangu manga pěpal᷊e ene nilěgahengu gambaru kerub, singa, ringangu kalum palěm su apan tampạ kụ piạ tampạ e piạ loahe waugu ene, nitakinangkol᷊aing kanteng manga bungang pinakal᷊ikụ.

³⁷Kerene kakakoạ u manga kareta ene nikoạ. Kěbị e mẹ̌sul᷊ung — pastakane ringangu ukurange.

³⁸ I Huram nẹ̌koạ l᷊ai dulang gaghuwạ mapul᷊o, sěmbaụ baugu apang kareta. Apang dulang e piạ kěhị u tatengane 1,8 meterẹ̌ dingangu kal᷊ohoěngbeng akẹ 800 su litere.

³⁹I Huram něměllọu kareta limam baụ su sěmběkan timuhẹ̌ bọu Wal᷊em MAWU, ringangu limam baụ su sěmběkan sawěnahẹ̌. Běnsadẹ̌ tambaga e nipěllọ e su wukune su sěmběkang mahai.

⁴⁰I Huram mal᷊aing nẹ̌koạ manga kaha, sikopẹ̌ dingangu lainumang. Bọu ene nasuẹ e kal᷊awọu munarane waugu Ratu i Salomo gunang Bal᷊em MAWU. Seng ini e manga apal᷊iwụ apan nikakoạ e: Dihi ghěguwạ darua Těmbọu rihi rarua kere paghudu lainumang nipěllọ su wowong dihi rarua ene Anangu hante suapan těmbọ u rihi ene Ěpạ u hasụ su waụ e dělima tambaga nipẹ̌dal᷊ensung su ral᷊ungu ruan tara nipělikụ anangu hante suapan těmbọ u rihi Kareta mapul᷊o Dulang gaghuwạ mapul᷊o Běnsadẹ̌ tambaga Sapi tambaga mapul᷊o dua su waụ e tatuilẹ̌ běnsadẹ̌ ene Manga kaha, sikopẹ̌ dingangu lainumang. Kal᷊awọu manga apal᷊iwụ baugu Wal᷊em MAWU nikoạ i Huram baugu Ratu i Salomo, nikoạ bọu tambaga, dingangu lẹ̌ěmukang sarang kumuhenabẹ̌.

⁴⁶Datu něngoro apẹ̌kẹ̌koạ manga apal᷊iwụ tamai ene su pěmaměmbingang manga uase su wěllạu Sukot dingangu Sartan su Wal᷊ang Yordan.

⁴⁷I Salomo tawe něngoro apěnimbang manga apal᷊iwụ tambaga ene, batụu tumanịu mal᷊awọ dekenange. Kụ běhạ u manga apal᷊iwụ ene e tawe nikahěnganeng.

⁴⁸ Datu i Salomo lai něngoro pinẹ̌koạ manga apal᷊iwụ bal᷊ine wọu wul᷊aeng baugu Wal᷊em MAWU. Kụ ini e manga apal᷊iwụ apan nikoạ e ene: Pananěmbaěng Medam borotẹ̌ kụ isẹ̌sěmba su Mawu Ruata Dal᷊aedu sol᷊o mapul᷊om baụ kụ nipěllọ su těngong Huange Kasusiange, kụ limam baụ su sěmběkan timuhẹ̌ dingangu limam baụ su sěmběkan sawěnahẹ̌ Manga bungang Manga sol᷊o Manga sasipị Manga lainumang Apal᷊iwụ u papědung sol᷊o Manga mangko Manga l᷊amạu tatawung kamania Manga l᷊amạu tětuhẹ̌ Manga henselu tukadu Huang Kasusiange dingangu manga tukadu l᷊ikudu Wal᷊em MAWU.

⁵¹ Sarạeng Datu i Salomo e nasuẹeng pětị e Wal᷊em MAWU e, i sie něngomol᷊ẹ̌ su ral᷊ungu manga gudangu wal᷊e ene, kal᷊awọu sal᷊aka, wul᷊aeng, dingangu manga apal᷊iwụ bal᷊ine apan seng nisěmbang Daud i amange su MAWU.