Read Sangir MANGA RATU HUMOTONG 9 Bible Online

MANGA RATU HUMOTONG 9 - Sangir bible

MANGA RATU HUMOTONG 9

¹Sarangke nasuẹeng koạ e Wal᷊em MAWU kahian Salomo ringangu wal᷊en datu ore lai kal᷊awọu apang nilahingide,

² MAWU e nẹ̌těngkatodẹ u watangengʼE kapia si sie mẹ̌sul᷊ungkewen nạung nariadi su Gibeon.

³MAWU e něhengetang si sie, ”Kakal᷊iomanengu e seng Takụ nikaringihẹ̌, kụ ual᷊ingu ini e tangú bal᷊e kụ seng nirarisị u ini e nakoạ tampạ těntani waugu mẹ̌kal᷊iomaneng si Siạ sarang marěngụ-děngụ. Iạ e sarung mẹ̌kakělla ringangu měndiagạ tampạ ini.

⁴Kereu i kau e měmunara waugu Iạ e ringangu naung burẹ̌si ringangu katul᷊idẹ̌ e kere i amangu i Daud, dingangu i kau e rụmaringihẹ̌be kal᷊awọu tita ringangu manga hengetang-Ku,

⁵ tangú Iạ e sarung mapakasěhụ u kědo-Ku si amangu i Daud u anạ pulunge mẹ̌bẹ̌bawěllasẹ̌ e sarung hanesẹ̌ měpẹ̌parenta Israel.

⁶Kaiso kamagengu i kau e arau hitenu e kawe tumal᷊ikudẹ̌ si Siạ e ringangu tawe rumaringihẹ̌ su manga tita-Ku ringangu manga hengetang-Ku ringangu i kau měněmba manga ruata wal᷊ine,

⁷tangú Iạ e sarung měnguserẹ̌ umatẹ̌-Ku Israel bọu wanua kụ seng Takụ nionggọ si sire. Iạ e sarung lai měněntangu wal᷊e ini e kụ seng Takụ nitantu makoạ tampạ u pẹ̌kakal᷊iomanengang si Siạ. Suapan tampạ tau Israelẹ̌ e sarung hinakaneng dingangu pahul᷊ěgeěng.

⁸ Bal᷊eng pẹ̌kakal᷊iomanengang ini e sarung makoạ niěndukang u ěnnạe hakịu walạewe i sai masahe sene e sarung huměkosẹ̌ dingangu humiubẹ̌. I sire sarung mẹ̌berau, ’Unụe MAWU e nẹ̌koạ kerene su wanua ini ringangu su wal᷊e ini?’

⁹Bọu e taumata sarung sumimbang, ’Ual᷊ingu i sire naněntangu MAWU, Ruatan sire, kụ seng němpěnondang upung i sire niapasěbang bọu Misirẹ̌. I sire něněmba ruata wal᷊ine. Kai ual᷊ingu ene hakịu MAWU e naparěntang hombang ini e si sire.’ ”

¹⁰I Salomo namětị Bal᷊em MAWU ringangu istanan datu e su ral᷊ungu ruam pul᷊o su taunge karěngụ e.

¹¹Kal᷊awọu kalun cěmaran Libanon dingangu kalun cěmara wiasa ringangu kal᷊awọu wul᷊aeng apang gẹ̌gausang i Salomo waugu koạ u wal᷊e ene e seng nighěllirang u Ratu i Hiram si sie. Sarangke hal᷊ẹ̌ ene nasuẹ e, Datu i Salomo i nẹ̌gěllị e si Hiram soa ruam pul᷊o su waụ e su wanuang Galilea.

¹²Tangú tamaị e i Hiram němanda, kaiso i sie tawẹ karal᷊uasẹ̌ su ghaghěllị ene.

¹³I sie nẹ̌bera si Salomo, ”Anạu sěmbaụku, kai kere ini tangú kakakoạ u soa nionggọu si siạ e?” Kai ual᷊ingu ene hakịu wanua ene nisěbạ Kabul.[10]

¹⁴Limembo wọu 4.000 su kilone wul᷊aeng kụ niringọ i Hiram si Salomo.

¹⁵Datu i Salomo e měpẹ̌pakẹ u koạ u munara sihasa waugu mamětị Bal᷊em MAWU, istanan datu, meselu Yerusalem dingangu měngambungu ěntana su sěmběkan timuhẹ̌ bọu Wal᷊em MAWU. I sie mẹ̌pẹ̌pakẹ u koạ u hal᷊ẹ̌ mẹ̌sul᷊ung baugu měmangung kapia soang Hazor, Megido ringangu Gezer. (

¹⁶Soang Gezer e kai soa nạung kal᷊imona e nialoěng dingangu kinawatạ u ratum Misirẹ̌, bọu e pamanuane pinate mase soane nitutung. Soa ene wọu e nighěllịu ratum Misirẹ̌ e su ahuse wawine kere poroseěng su ěllong pẹ̌kakawinge ringangu Ratu i Salomo.

¹⁷Kụ seng i Salomo e němangung kapia soa ene.) Kụ ual᷊ingu pěl᷊ahal᷊ẹ̌ u sihasa e lai i Salomo e němangung kapia Bet-Horon su tol᷊ene,

¹⁸Baalat, Tamar su wanua l᷊inggin Yehuda,

¹⁹manga soang pẹ̌bawiahẹ̌, manga soa waugu pěngangomol᷊ang karetan sekẹ dingangu kawal᷊one. Patikụ hingidu pěmamangung su Yerusalem, Libanon, dingangu su kạguwạu wanua paparentaěnge seng nikoạ e.

²⁰Baugu hal᷊ẹ̌ sihasa ene i Salomo napasěbangu manga hěnton tau Amori, Het, Feris, Hewi ringangu Yebus. I sire kai taumata hiten tau Kanaan kụ tawe masuem patene kahian tau Israel piạ i sire nakakaiang su wanua ene. Sarang orasẹ̌ ini e hiten sire e wědang nakoạ ěllang.

²²Tau Israelẹ̌ e tawe nịkakoạ ěllang kahian Salomo e; i sire kai nihengkẹ nakoạ sordado, pěrwira, panglima, koměndaěngu karetan sekẹ, dingangu sordadom buntuangu sumasake kawal᷊o.

²³Lima hasụ limam pul᷊o su kataune sawohị nighělirangu wawawaěng měnanahimata taumatang hal᷊ẹ̌ sihasa sural᷊ungkeng kal᷊awọu haghing proyeku pěmbangunang i Salomo.

²⁴Ěntana su sěmběkan timuhẹ̌ bọu Wal᷊em MAWU e niambungang i Salomo sarangke kawinge sangiangu ratum Misirẹ̌ e něngal᷊ing bọu Soan Daud sol᷊ong istana nạung nilanging i Salomo e waugʼi sie.

²⁵ Těllu sul᷊e su ral᷊ungu sěntaung i Salomo e manarakangu sasěmba tẹ̌tongkateng dingangu sasěmban pẹ̌darame su wowom pananěmbaěng kụ seng nipětị e waugu MAWU. I sie mal᷊aing měnẹ̌nawungu wuwụ baugu MAWU. Kerene kakakoạ i Salomo e mạngěnsue pěmamangung Bal᷊em MAWU.

²⁶Baugu wuntuangu kapal᷊u sekẹ, tangú Datu i Salomo e nělanging manga kapal᷊ẹ̌ su Ezion-Geber masandigu Elot su apengu Wěngạ u Akaba, su wanuang Edom.

²⁷Datu i Hiram dimolohu manga sumasake kapal᷊e seng masasingkạ apẹ̌sẹ̌sakaeng dingangu sumasakeng kapal᷊ʼi Salomo.

²⁸I sire nạung bọu němpẹ̌sakaeng sol᷊ong soang Ofir měngal᷊ạ bul᷊aeng 14.000 su kilone ringangu mẹ̌bawawane sol᷊ong anung Salomo.