Read Sangir MANGA RATU KARUANE 1 Bible Online

MANGA RATU KARUANE 1 - Sangir bible

MANGA RATU KARUANE 1

¹Sarangke i Ahab datung Israel napohong, banuang Moab e něnggohaeng su Israel.

²Piạ sěhěllo Datu i Ahazia bọu Israelẹ̌ e nanawo wọu tanumbal᷊e wowone rasị su wal᷊oarị e su Samaria, hakịeweng i sie e nal᷊esẹ gẹ̌guwạ. Tangú i sie něndolohu taumata pinakiwal᷊o su Baal-Zebub mahan duatan soang Ekron su Pilistin, měnsang i sie mapia arau tala.

³Kai malaekatu MAWU e rimolohʼi Elia, nabi wọu Tisbe, tamai nẹ̌sombangu manga rarolohangu Ratu i Ahazia ene mědeạu apẹ̌berau, ”Unụe kai su Israel kai tawẹ apa Ruata, hakịu i kamene kawe mapulu mẹ̌dorong tatul᷊ada su Baal-Zebub, mahang duatan soan Ekron ene?

⁴Paul᷊ịko su ratu, u MAWU e něhengetang kere ini, ’I kau e tawe mapia wọu sakị u, i kau e sarung mate!’ ” Bọuteng i Elia e něndal᷊engu parentam MAWU e,

⁵nẹ̌sul᷊ẹ e manga rarolohang ene e sol᷊ong anun datu, bọu e ratu e nakiwal᷊o, ”Unụe i kamene nẹ̌sul᷊e?”

⁶I sire simimbang, ”Sěngkatau esẹ e riměnta mẹ̌sombang i kami, ringangu něndolohʼi kami e kapia apạul᷊ị su ratu u MAWU e něhengetang kere ini si Tuang, ’Unụe kai tawẹ apa Ruata su Israel, hakịu i kau kawe něndolohẹ̌ apẹ̌dẹ̌dorong tatul᷊ada su Baal-Zebub, mahan duatang soan Ekron? I kau e tawe mul᷊e wọu sakị u e, i kau e sarung mate!’ ”

⁷”Kereapa awẹ u tau ene?” angkuěngu ratu.

⁸ ”Kakingkaeng dingangu papehẹ e kai wọu pisị,” angkuěng i sire. ”O, ene i Elia!” angkuěngu ratu.

⁹Bọu e i sie rimolohu sěngkatau pěrwira ringangu taumatane limam pul᷊o su kataune, tamai apạnamẹ si Elia. Pěrwira ene rimal᷊eng kụ bọu ene nakaěbạ si Elia kạkaiange su wul᷊ude sěmbua. ”Ei ěllangu Mawu Ruata,” angkuěngu pěrwira ene, ”datu e nangoro si kau e apạl᷊intụ!”

¹⁰ ”Kereu iạ ini e mambeng ěllangu Mawu Ruata e,” angkuěng i Elia, ”katěntungko putung bọu l᷊angị kụ panutung pakahěngisẹ̌ si kau ringangu kal᷊awọu taumatanu!” Su tempo ene lai natěntungke putung kụ něhěngisẹ̌ pěrwira ene ringangkeweng taumatan sire limam pul᷊o su kataune.

¹¹Bọu e ratu něndolohu sěngkatau pěrwira wal᷊ine ringangu taumatane i sire limam pul᷊o su kataune. I sire rimal᷊eng, kụ nẹ̌bera si Elia, ”Ei, ěllangu Mawu Ruata, datu e něngoro si kau apạl᷊intụ lai su orasẹ̌ ini!”

¹²”Kereu iạ e mambeng ěllangu Mawu Ruata e,” angkuěng i Elia, ”ute katěntungko putung bọu l᷊angị kụ apěnutung si kau pakahěngisẹ̌ dingangu kal᷊awọu taumatanu!” Su tempo ene l᷊ai natěntungke putung bọu anun Duata e kụ něhěngisewe pěrwira ene ringangu taumatane i sire limam pul᷊o.

¹³Sěnsul᷊eko l᷊ai ratu e rimolohu sěngkatau pěrwira ringangu taumatane i sire limam pul᷊o. Pěrwira ene e naawị e su wul᷊ude kụ sarangke nahumpạu těngong Elia e i sie nẹ̌tumpěkuhẹ̌ kụ nẹ̌bera, ”Ampunge wue i kami e, o ěllangu Mawu Ruata! Tal᷊ěntuke wue iạ dingangu taumataku ini e. Kumbahang bue i kami pateěng!

¹⁴Pěrwira wal᷊ine rarua e ringangu taumatan dẹ̌dua e nasue nahěngisu putung bọu l᷊angị, kaiso iạ e gụgahiorọ u tal᷊ěntuke wue iạ!”

¹⁵Su tempo ene lai nẹ̌berạe malạekatu MAWU e si Elia, ”Kumbahang matakụ! Tol᷊eị e i sie lumintụ bọu bul᷊ude ini.” Ual᷊ingu ene rimal᷊engke i Elia ringangu pěrwira ene nakoạ sol᷊ong anun datu.

¹⁶Bọu e angkuěng i Elia su ratu, ”MAWU e něhengetang, ’I kau e rimolohu taumata pědẹ̌dorong tatul᷊ada su Baal-Zebub mahan duatang soang Ekron tabidạu su Israelẹ̌ e tawẹ apa Ruata pakiwal᷊oěng. Ual᷊ingu ene i kau e tawe mul᷊e wọu sakị u i kau e sarung mate!’ ”

¹⁷Tangú nate e i Ahazia kere piněhengetangu MAWU e si Elia. Ual᷊ingu i Ahazia e tawẹ apa anạ e esẹ, tangú i Yoram anạ u sěmbaụ e[1] nakoạ datu něngaweng si sie. Ene e nariadi su taung karuane su parentang Yehoram anạ i Yosafat, datung Yehuda.

¹⁸Běkene wal᷊ine mạanung apang kinoạ u Ratu i Ahazia e niwohẹ su ral᷊ungu bukẹ̌ u Wěkem Mararatung Israel.