Read Sangir MANGA RATU KARUANE 10 Bible Online

MANGA RATU KARUANE 10 - Sangir bible

MANGA RATU KARUANE 10

¹Datu i Ahab něhanạ nẹ̌pulung su soan Samaria sarung kakěpal᷊e pitum pul᷊o su kataune. Ual᷊ingu ene i Yehu něndingọ u surate sol᷊ong Samaria, su manga ghaghurang lumaontol᷊ẹ̌ manga anạ dingangu pulung i Ahab dingangu l᷊ai su manga mangangawasa ore lai manga těmbonangu kawanua su soa ene. Bawerang suratẹ̌ ene e kere ini,

²”Anạ pulung i Ahab kai su ral᷊ungu kakakěllaěng i kamene, dingangu i kamene kai měnẹ̌naghuang karetan sekẹ, kawal᷊o, aghidẹ̌, dingangu soa piạ těndạ e. Ual᷊ingu ene, pakasahawụ sarang i kamene makatarimạ u suratẹ̌ ini e,

³pěmilẹ e kapiaěnge wọu tal᷊oaran anạ pulung i Ahab ene kụ hengkẹ e i sie pakakoạ datu, bọu e pẹ̌tohạbe tumatawang si sie.”

⁴Měngangawasa Samaria e něngkatakụ. I sire nẹ̌bera, ”Datu i Yoram dingangu Ratu i Ahazia e mal᷊ain tawe makakarokạ si Yehu něngalembọete i kitẹ!”

⁵Ual᷊ingu ene těmbonangu istana ringangu matimadu soa ringangu manga těmbonangu kawanua ore lai manga ghaghurang lumaontol᷊ẹ̌ manga anạ pulung i Ahab ene něndingọ u habarẹ̌ ini si Yehu, ”I kami e tumuhụ si Tuang dingangu sadia mẹ̌koạ kal᷊awọu apang ilẹ̌oron Tuang si kami. I kami e tawe měhengkẹ i sai-sai makoạ datu. Pẹ̌koạ e apam mapia su matan Tuang.”

⁶Mase i Yehu něndoho lain suratẹ̌ si sire, wawerane, ”Kereu i kamene e ringangku, mase tumuhụ kal᷊awọu titaku, patẹ e anạ pulung i Ahab ene, kụ dịěllo su orasẹ̌ kere ini e paringangko kal᷊awọu tẹ̌mbo i sire su anuku su Yisreel.” I sire pitum pul᷊o su kataune anạ pulung i Ahab ene měmpẹ̌tẹ̌tanạ dingangu manga těmbonangu kawanua su soan Samaria, ringangu tẹ̌tangkianeng i sire.

⁷Bọuten nakatarimạ suratʼi Yehu, manga těmbonangu kawanuang soan Samaria e němpěmate si sire pitum pul᷊o su kataune anạ pulung i Ahab ene wọu e kal᷊awọu tẹ̌mbo i sire e nitaho su ral᷊ungu patanga kụ niringọ sol᷊ong anung Yehu su Yisreel.

⁸Sarangke hal᷊ẹ̌ ene nihabarẹ̌ si Yehu, i sie něngoro tadeạu i sire apan těmbonange ene e pakikoạ duang kamonaěng su pasěllangengu soa, ringangu niwala sene sarang mal᷊ukadẹ̌.

⁹Deng mal᷊uka-l᷊ukadẹ̌, siměbangke i Yehu sol᷊ong tukadu pasěllangeng, bọu e nẹ̌bera si sire apam měmpẹ̌tẹ̌tampung sene, ”Seng iạ e nẹ̌sěkongkolu rumokạ Datu i Yoram, dingangu měmate si sie; i kamene e tawẹ sal᷊ane su hal᷊ẹ̌ ene. Kaiso kal᷊awọu taumata ini e, wal᷊inewe iạ němate.

¹⁰Seng ini e karal᷊ahẹ e u kal᷊awọu apa nipěhengetangu MAWU e mạanung anạ pulung i Ahab sarung mariadi. MAWU e seng nẹ̌koạ apan nipěhengetange wọʼi Elia ěllangʼE.”

¹¹ Bọu ene i Yehu e němate kal᷊awọu anạu sěmbaụ i Ahab bal᷊ine apam mạtanạ su Yisreel, dingangu kal᷊awọu sawohị, hapị kantalẹ̌, dingangu manga imange, tawẹu sarang sěngkatau niwala wiahẹ̌.

¹²I Yehu naněntangu Yisreel bọu e nakoạ sol᷊ong Samaria. Su wěntan dal᷊eng, su tampạ isẹ̌sẹ̌bạ, ”Soam Mělal᷊ukadẹ̌”,

¹³i sie nẹ̌sombangu anạu sěngkataun Ahazia ratun Yehuda pirang katau e. I sie nakiwal᷊o, ”I sai i kamene?” ”I kami e anạu sěmbaụ i Ahazia,” angkuěng i sire. ”I kami e kai makoạ sol᷊ong Yisreel baugu mẹ̌tiwo kal᷊awọu ral᷊ohom bal᷊en datu ringangu manga anạ pulungu Ratu wawine i Izebel.”

¹⁴”Samẹ e wiahẹ̌ i sire!” laoron Yehu su taumatane. Tangú i sire ene nisamẹ, bọu e nipate su rěduhu pahighi sěmbaụ kụ mamara, kěbị e ěpạ u pul᷊o dua su kataune. Tawẹu sarang sěngkatau nilěmbe wiahẹ̌.

¹⁵I Yehu něněpasu raral᷊enge. Su wěntan dal᷊eng, i sie nisěnsomahengʼi Yonadab anạ i Rekhab. I Yehu nẹ̌gěllịu adatẹ̌ si sie ringangu nẹ̌bera, ”Kai wal᷊inewe sěngkanaung tangú i kitẹ e? Mapulu wue i kau měnongkạ si siạ?” ”Ore,” sasimbangi i Yonadab. ”Mạeng kerene, mahịe i kitẹ mẹ̌papangumpaedẹ̌ l᷊ima,” wawal᷊isʼi Yehu. I sire nẹ̌papangumbelẹ e l᷊ima, ringangu i Yehu e nẹ̌tul᷊ung i Yonadab niapasake su ral᷊ungu karetane,

¹⁶kapẹ̌bẹ̌berane, ”Mahịe tol᷊e ringangu sahidị e hala měnsang kereapa karadinge iạ e waugu MAWU.” Bọu e i sire sěngkasake su kareta sol᷊ong Samaria.

¹⁷Nahumpạ e paị sene i Yehu němate kal᷊awọu anạu sěmbaụ i Ahab, tawe nal᷊ěmbe sarang sěngkatau. Hal᷊ẹ̌ ene nariadi natuhụ kere suapan nipěhengetangu MAWU e si Elia.

¹⁸I Yehu něndolohu kawanuan Samaria nipẹ̌tampung mase i sie nẹ̌bera, ”Datu i Ahab tawe tumanịu marading mẹ̌tangkiang munara waugu Baal, iạ sarung limembong karadinge wọu i sie.

¹⁹Ual᷊ingu ene tampungke kěbị apan nabim Baalẹ̌ e ringangu apang mẹ̌sasubane ringangu manga imange; kụ kumbahangbe piạu kawul᷊eěng. Iạ e sarung měnarakangu sasěmba masaria waugu Baal. I sain tawe ruměnta sarung ihukung pakapate.” Kaiso ene kětạemben tahuakal᷊ʼi Yehu mědeạu měmate kal᷊awọu apang měnaněmba Baal.

²⁰I Yehu nẹ̌gěllịu parenta ini: ”Pěloahẹ̌ko sěhěllo kạdiongeng baugu maněmba Baal!” Tangú taumata e něloahe sěhěllo ene,

²¹kụ i Yehu e němohangke su kạguwạu Israel. Su ěllo ene riměntạe kal᷊awọu apam měnaněmba Baal, kụ tawẹ u sarang sěngkatau matěntang. I sire simuẹ̌ su ral᷊ungu pananěmbaěng su Baal ringangu němenẹ godoěng ene wọu těngone sol᷊ong likude.

²²I Yehu nẹ̌parenta tadeạu měngangurusẹ̌ manga pakeang kakal᷊iomaneng su pangkunang ene mẹ̌gěllịu manga pakeang ene su taumata apang dụděnta sene mẹ̌kal᷊iomaneng su Baal. Bọuten něndal᷊eng u parenta ene,

²³i Yehu simuẹ̌ su pangkunang u Baalẹ̌ ene sěngkasuẹ̌ dingangu i Yonadab anạ i Rekhab, dingangu nẹ̌bera suapan taumata sene, ”Parikẹ̌saiko pakaunsui měnsang kěbị apan diměnta ini e tumbạbeng mạněmba Baal. Kumbahangbe kawe piạ ene sene i sain měmpaněmba MAWU.”

²⁴Mase i Yehu ringangu i Yonadab něněmbang sasěmba su Baal. Su l᷊ikudu godoěng, i Yehu e seng něměllọu ual᷊um pul᷊o su kataune lukadẹ̌ dingangu manga pěrwira. I sie mal᷊aing něngonggọu parenta ini si sire, ”I kamene pěmate kal᷊awọu taumata ene. I saim mapakawalang sěngkatau wọu i sire tumal᷊angu watangenge, sarung pateěng!”

²⁵Pakasahawụ, sarětạeng i Yehu měnarakangu sasěmba, i sie suměbang dingangu nẹ̌bera su manga lukadẹ̌ dingangu manga pěrwirane ene, ”Suẹ̌ e ringangu pate e kěbị i sire. Abe wala sarang sěngkatau makatal᷊ang!” Tangú simuẹ̌ e i sire ringangu pedan sire kạtatěde, kụ němate kal᷊awọu taumata apan sene, bọu ene měnuhudu manga maietẹ̌ ene sol᷊ong likude mase i sire němpẹ̌suẹ̌ sol᷊ong pěnanal᷊eěng su wahageangu dal᷊unge;

²⁶mase něněbangu tul᷊adam Baal bọu e tutungang.

²⁷Tul᷊ada ene ipakaupu ringangu godoěnge mase tampạ ene koateng tampạ u saseaěng sarang orasẹ̌ ini.

²⁸Kerene i Yehu e něnapu pinakawurẹ̌si pananěmbaěng su Baal su Israel.

²⁹ Ual᷊ingu ene MAWU e nẹ̌bera kere ini si Yehu, ”Patikụ apan Takụ nioro si kau, mědeạu pakikoạ su hiteng Ahab, seng nịkakoạ u. Ual᷊ingu ene Iạ mẹ̌kědo u anạ u pulungu sarang hitenu kaěpạ e sarung makoạ datu su Israel.” Kaiso i Yehu e wal᷊inewe ringangu kạguwạu naunge tụtuhụ titam MAWU, Ruatang Israel. I sie tụtuhụ kakanoạ i Yerobeam nakawodaị tau Israel nẹ̌barạdosa kụ naněmba sapi wul᷊aeng nipětị e su Betel dingangu su Dan.

³²Su tempo ene MAWU e nanětạ e napakakạdodọu wanuang Israel. I Hazael datun Siria e němul᷊aho kal᷊awọu wanuang Israel

³³su sěmběkan dakị wọu Sal᷊ụ u Yordan sarang sěmběkan timuhẹ̌ karaung soang Aroër maraning Sal᷊ụ u Arnon, nasowa ěntanang Gilead dingangu Basan, pẹ̌tatanakeng u hěntong Gad, Ruben dingangu i Manasye su sěmběkan dakị.

³⁴Běkene l᷊ai wal᷊ine mạanung Yehu, nasowa l᷊ai tětal᷊u munarang kawawahanine, niwohẹ su ral᷊ungu bukẹ̌ u Wěkem Mararatung Israel.

³⁵I Yehu naratu su Israelẹ̌ e, ruam pul᷊o ual᷊u su taunge karěngụ e. I sie napohong kụ nilěbing su Samaria. Bọu e i Yoahas ahuse naratu něngaweng si sie.