Read Sangir MANGA RATU KARUANE 11 Bible Online

MANGA RATU KARUANE 11 - Sangir bible

MANGA RATU KARUANE 11

¹Piạ e i Atalya masingkạ u Ratu i Ahazia e, anạ e seng napohong, i sie nẹ̌parenta tadeạu kal᷊awọu walagʼi Ahazia e pakịpate.

²I Yoas ahusʼi Ahazia e uade nipate lai ringangu manga ahusu ratu lai wal᷊ine, kaiso i sie nakatal᷊ang batụu niambang i Yoseba tantene. I Yoas dingangu mẹ̌tatahanạ e niparingang mase niwuni su kamaru tatikilang su Wal᷊em MAWU.

³Ěnnungu taung karěngụe i Yoseba mělẹ̌hiking dariọ ene su ral᷊ungu Wal᷊em MAWU piạ i Atalya naratu.

⁴Su taung kapitune, manga pěrwira lukadu watangeng u ratu wawine e ringangu manga lukadu istana e nikuiangu Imang i Yoyada mědeạu mẹ̌sombang i sie su Wal᷊em MAWU. Sene i sie něngoro si sire pinẹ̌salu waugu mẹ̌koạ apang ilěhingidẹ̌. I sie napasilon Yoas, ahusu Ratu i Ahazia, si sire,

⁵ringangu něngonggọu parenta ini, ”Kereu i kamene měmunara su ěllong Sabatẹ̌, sěngkatěllung kapahiakeng bọʼi kamene e harusẹ̌ pělukadẹ̌ su istana,

⁶sěngkatěllung kapahiakenge lai e su tukadu Pasěllangeng u Sur, dingangu lembone e su tukadu pasěllangeng su l᷊ikudu manga lukadẹ̌ bal᷊ine.[13]

⁷I sire ruang kamonaěng apan seng nal᷊iu wọu koạ u munara su ěllon Sabatẹ̌ e, pakal᷊ukadẹ̌ bue su Wal᷊em MAWU ringangu peda tạ homane baugu tumatawang Datu i Yoas. I kamene harusẹ̌be pěmpẹ̌taking si sie walạewe měnsang sol᷊ong apa, dingangu apan taumata kụ měnal᷊ukạ humaung si kamene, ute harusẹ̌be pateng kamene.”

⁹Manga pěrwira ene tụtuhụ parentang Yoyada ringangu němaringangu taumatan sire su anune apang hinong pẹ̌koạ munara ringangu nal᷊iu wọu munarang ěllong Sabatẹ̌ ene.

¹⁰I Yoyada nẹ̌gěllịu manga wěngko ringangu manga kěllung u Ratu i Daud mạdaresọ su ral᷊ungu Wal᷊em MAWU, su manga pěrwira ene.

¹¹Mase manga lukadẹ̌, sěngkatau-sěngkatau ringangu pedane kạtatěde něngal᷊ạ tampạ i sire nangělikụ těngong Bal᷊em MAWU mědeạu mengěllung datu e.

¹²Bọu ene i Yoyada němaringang si Yoas siměbang bọu ene něměllọu makota, su těmbọe ringangu něnarakangu bukẹ̌ u Titam Mawu si sie. I Yoas niruị datu ringangu hal᷊ẹ̌ ene niwohang su kawanua. Kěbị e němpẹ̌tal᷊okạ dingangu němpẹ̌gio, ”Biahẹ̌ datu e!”

¹³Datu wawine i Atalya e nakaringihẹ̌ giong manga lukadẹ̌ dingangu kawanua. Dingangu masahawụ i sie nakoạ sol᷊ong Bal᷊em MAWU, kụ sene lawọ taumata němpẹ̌tampung.

¹⁴ I sie nakasilo ratu wuhu ene rụdarisị su tukadẹ̌ sasuěkang sol᷊ong Bal᷊em MAWU kụ sene i sie ruikangu pangkate, niliwungangu manga pěrwira ringangu měnaniụ slompretẹ̌. Kal᷊awọu kawanua e němpẹ̌gio mạhul᷊uasẹ̌ apidu apạhěteng slompretẹ̌. Kụ piạ gěnggange i Atalya e něnggaghehẹ e pakeange, apidu němansagẹ̌, ”Kontiang! Kontiang!”

¹⁵I Yoyada e tawe napakawalang Atalya nipate su l᷊ikudu Wal᷊em MAWU, kụ i sie nẹ̌bera su manga pěrwira, ”Paringangke i sie apasěbang kụ pẹ̌těngkaunidẹ̌ su ral᷊ungu wuntuangu lukadẹ̌ dingangu měngkate pate i sai-saim mědeạu měngambang si sie.”

¹⁶I sire něnamẹ si sie, bọu ene niparingang sol᷊ong istana. Sene i sie nipate su těngon tukadu Pasěllangengu Kawal᷊o.

¹⁷Imang i Yoyada e rimolohu Ratu i Yoas dingangu kawanua e nẹ̌koạ pẹ̌dariandi ringangu MAWU, u i sire sarung makoạ umatʼu MAWU. I sie lai rimolohu ratu pinẹ̌koạ pẹ̌dariandi ringangu kawanua.

¹⁸Bọu ene kawanua e něngalo ringangu nělengge pangkunangu Baal. Pananěmbaěng dingangu manga tul᷊adane nịgaghoghahẹ̌, ringangu i Matan, imang u Baal nipate su těngom manga pananěmbaěng ene. I Yoyada e něngoro lukadẹ̌ piněndiagạ Bal᷊em MAWU,

¹⁹mase i sie ringangu manga pěrwira, manga lukadu watangeng u ratu, ringangu manga lukadu istana ore lai kal᷊awọu kawanua e napasaheng Datu i Yoas wọu Wal᷊em MAWU sol᷊ong istana. I Yoas simuẹ̌ bọu Pasěllangeng u Lukadẹ̌, bọu ene naiang su wowong kal᷊aianengu mararatu.

²⁰Kal᷊awọu kawanua e mal᷊uasẹ̌, soa e mal᷊enehẹ̌ dingangu i Atalya e seng nipate.

²¹I Yoas umbure pitu taung su tempong i sie naratu su Yehuda.