Read Sangir MANGA RATU KARUANE 12 Bible Online

MANGA RATU KARUANE 12 - Sangir bible

MANGA RATU KARUANE 12

¹Su taung kapitune su parentan Datu i Yehu su Israel, i Yoas nakoạ datung Yehuda. I sie nẹ̌parenta su Yerusalem ěpạ u pul᷊o su taunge karěngụ e. I ninange isẹ̌sẹ̌bạ si Zibya wọu soam Bersyeba.

²Al᷊amatu pěnaněntirong Imang i Yoyada, i Yoas kanandum biahe mẹ̌kẹ̌koạ e apam makal᷊uasẹ̌ naungu MAWU.

³Kětạembeng kawe unụe tampạ u pananěmbaěng mahan duata e kawe tawe nigaghoghahe, hakịu kawanua e kawe wědang měnẹ̌narakangu sasěmba ringangu měnẹ̌nawungu kamania sene.

⁴ Piạ su sěhěllo i Yoas e nẹ̌kui manga imang dingangu něngoro si sire pẹ̌děndesọu roitẹ̌ kụ seng kinaěbakeng bọu apang sasěmba su Wal᷊em MAWU, baewe roitu sasěmba, ringangu roitewe lai gaghěllị ual᷊ingu naung mal᷊uasẹ̌.

⁵Apang imang harusẹ̌ maěmpigẹ̌ su roitẹ̌ apang nisěmbang taumata apang tẹ̌tangkianenge. Roitẹ̌ ene sarung paketang baugu ipěngul᷊ị apang něngkagholang su Wal᷊em MAWU e.

⁶Sarang taung karuam pul᷊o těllune su parentan Yoas, manga imang mal᷊aim bědang tawe nangul᷊ị Bal᷊em MAWU nagholang.

⁷Ual᷊ingu ene i Yoas nẹ̌kui Imang i Yoyada ringangu manga imang bal᷊inẹ, kụ něbera, ”Unụe i kamene wědan tawe lai nạngul᷊ị Bal᷊em MAWU nagholang tangú? Manětạ bọu sěhěllo ini i kamene tawe ipakawala měndesọ doitẹ̌ rẹ̌deakeng i kamene. Kěbị e harusẹ̌be sarakang i kamene ipěngul᷊ị Bal᷊em MAWU.”

⁸Manga imang e kimire waugu tawe měnampungu roitẹ̌ bọu kawanua, ringangu tawẹ lai ral᷊uase su pěngangul᷊ị Bal᷊em MAWU.

⁹Tangú i Yoyada něngal᷊ạ kasẹ̌ sěmbaụ mase nikoateng lohange su tatakạ e, bọu ene nipěllọe su rěduhu pananěmbaěng su sěmběkane koaneng bọu tukadẹ̌ sasuěkang sol᷊ong Bal᷊em MAWU. Kal᷊awọu roitẹ̌ nisěmba su Wal᷊em MAWU e nitaho su ral᷊ungu kasẹ̌ ene kahiam manga imang apang kapěmẹ̌munarane su tukadẹ̌ sasuěkang.

¹⁰Balạewe suapang kasẹ̌ u roitẹ̌ ene e mapenẹ kụ, i tulị u ratu e ringangu Imang Karangetange su mongo kụ měndekeng doitẹ̌ ene wọu pikunang.

¹¹Mạeng seng kal᷊awọe nawohẹ, doitẹ̌ ene isarakang su manga měnanitị hal᷊ẹ̌ u pěngangul᷊ị Bal᷊em MAWU. Bọu ene manga měnanitị ene němaehẹ̌ apam basẹ̌ u kalu, ringangu basẹ̌ u bangunang,

¹²mělahal᷊ẹ̌ u watu dingangu měmamakang batu. Manga měnanahimata ene lai kụ němpěmělli kalu ringangu watu, ore lai měngatorẹ̌ kal᷊awọu urusangu maněbang apa-apa waugu pěngangul᷊ị ene.

¹³Kai roitẹ̌ ene e tawe naghaing sarang kadidị-didị baugu pinẹ̌koạ manga lainumang sal᷊aka, mangko, slompretẹ̌, manga sol᷊o, arau lai apal᷊iwụ bal᷊ine wọu wul᷊aeng arau sal᷊aka.

¹⁴Kěbị e niwaehẹ̌ su manga basẹ̌ dingangu piněměllị kakoạ u bangunang kụ hinong paketang.

¹⁵ Manga měnanitị u hal᷊ẹ̌ ene e mamben těngadẹ̌ kapěngumbalaěng bue, kụ tawahal᷊uasu pẹ̌dorongang habaru kakěpal᷊u roitẹ̌ e wọʼi sire.

¹⁶ Doitẹ̌ bọu sasěmba laaweng dugi ringangu wọu sasěmba ampungu rosa e tawe nitaho su ral᷊ungu kasẹ̌ ene. Doitẹ̌ ene nionggọ su manga imang.

¹⁷Su tempo ene i Hazael datun Siria něngalo ringangu nakakaiang su soang Gat. Bọu ene i sie piạ ěnninge lai měngalo Yerusalem.

¹⁸Tangú Yoas něndohon doitẹ̌ tatubusẹ̌. Doitẹ̌ ene kinaěbakenge wọu kal᷊awọu sasěmba nạung seng bọu nisarakang su MAWU kahian Yoas sẹ̌sane, ringangu kahian Yosafat, i Yoram, dingangu i Ahazia, nạung mararatu apang mẹ̌pẹ̌parenta kal᷊amonan sie. Kerene lai wọu kěbị bul᷊aeng su ral᷊ungu kasẹ̌ u Wal᷊em MAWU ringangu istanan datu. Tangú i Hazael tawe nisěhụ něngalo Yerusalem.

¹⁹Bọu ene manga sawohị u kararatuangu Yehuda e němpẹ̌komol᷊ẹ̌ dumokạ Datu i Yoas. Duang katau wọu tal᷊oaran sire kụ i Yozakar anạ i Simeat, dingangu i Yozabad anạ i Somer němate si Yoas su wal᷊e sěmbaụ kụ nipětị su wowong ěntana niambung su sěmběkan dakị wọu Yerusalem, sural᷊eng dumẹ̌sung sol᷊ong Sila. I Yoas nilěbing su pěndal᷊ěbingangu mararatu su Soan Daud. I Amazia ahuse naratu něngaweng si sie. Bẹ̌ke wal᷊ine e mạanun Datu i Yoas niwohẹ su ral᷊ungu bukẹ̌ u Wěkem Mararatun Yehuda.