Read Sangir MANGA RATU KARUANE 13 Bible Online

MANGA RATU KARUANE 13 - Sangir bible

MANGA RATU KARUANE 13

¹Su taung karuam pul᷊o těllune pẹ̌paparentan Datu i Yoas ahusi Ahazia su Yehuda, i Yoahas ahusi Yehu naratu su Israel, kụ i sie nẹ̌parenta su Samaria mapul᷊o pitu su taunge karěngụ e.

²Mẹ̌sul᷊ungu Ratu i Yerobeam kụ nẹ̌parenta kal᷊amonan sie, i Yoahas nẹ̌dosa su MAWU kụ nakawodaị tau Israel mal᷊aing nẹ̌dosa. I sie tawẹ běke něměllọu kakanoạ e ral᷊akisẹ̌.

³Ual᷊ingu ene MAWU e limangehẹ̌ su Israel hakịu i Sie napakawalang Hazael datun Siria ringangu i Benhadad ahuse, masau susul᷊ene mạmatạ Israel.

⁴Mase i Yoahas nẹ̌kal᷊iomaneng su MAWU, kụ MAWU e nakaringihẹ̌ kakal᷊iomanenge ene, ual᷊ingu MAWU e nakasilo kai apạ e mahěgisẹ̌ datun Siria měnědạ tau Israel.

⁵MAWU e něngonggọu sěngkatau těmbonange su tau Israel, kụ měliwirʼi sire wọu kawasan Siria, hakịu i sire nẹ̌biahẹ̌ lai marěmasẹ̌ kere nạung kal᷊imona.

⁶Manimbe kerene tau Israel tawe něngědo mẹ̌koạ dosa kụ nitětạ u Ratu i Yerobeam. I sire tatapẹ̌ mẹ̌kẹ̌koạ dosa ene, ringangu napakawalan tul᷊adang mahan duata wawine i Asyera tatapẹ̌ ene su Samaria.

⁷Buntuangu sekẹ u Israel seng niupu kahian datun Siria, hakịu Ratu i Yoahas kětạeng něnaghuang sordado piạ kawal᷊one i sire limam pul᷊o, karetan sekẹ mapul᷊o, ringangu sordadon sire mapul᷊o hiwu su kataune.

⁸Běkene wal᷊ine ute mạanun Datu i Yoahas dingangu patikụ saghedu kawawahanine niwohẹ su ral᷊ungu bukẹ̌ u Wěkem Mararatung Israel.

⁹I sie napohong kụ nilěbing su Samaria. I Yoas ahuse naratu něngaweng si sie.

¹⁰Su taung katěllum pul᷊o pitune su parentan Datu i Yoas su Yehuda e, i Yoas ahusʼi Yoahas nakoạ datung Israel kụ nẹ̌parenta su Samaria mapul᷊o ěnnung su taunge karěngụ e.

¹¹I sie mal᷊aing nẹ̌dosa su MAWU, ual᷊ingu tụtuhụ karal᷊akisu Ratu i Yerobeam kụ nakawodaị tau Israel nẹ̌koạ dosa.

¹²Běkene wal᷊ine mạanung Datu i Yoas, nasowa l᷊ai hal᷊ẹ̌ u pẹ̌tatěngesẹ e su ral᷊ungu pẹ̌sasekẹ dimokạ si Amazia ratung Yehuda, niwohẹ su ral᷊ungu bukẹ̌ u Wěkem Mararatung Israel.

¹³I Yoas nairị dingangu nilěbing su pěndal᷊ẹ̌bingang u mararatu su Samaria. I Yerobeam karuane ahuse naratu něngaweng si sie.

¹⁴ Su tempo sěmbaụ piạ Nabi i Elisa e masakị matědụ, kụ Datu i Yoas diměnta rimal᷊inggohọ si sie. Ene i sie nakasilọ e si Elisa kụ seng maraning mate, datu ene kimiạ dingangu nẹ̌bera, ”Amangku, Amangku, tumatatawang Israel masaria e!”

¹⁵”Al᷊ạko naěnakeng dingangu horom papitị!” laorong Elisa e si sie. Ene i Yoas něngal᷊ạe,

¹⁶bọu ene i Elisa e něngoro si sie pẹ̌dẹ̌dariahi měmitị. Datu e selain sadia, kụ i Elisa e něměllọeng l᷊imane su wowong l᷊iman datu.

¹⁷Bọu ene natol᷊ẹewe kere su laoron nabi ene, datu e něnopẹ e janela kụ timatěngo sol᷊ong Siria. ”Ěnạ e kụ pitị e!” angkuěng i Elisa. Tawe nararěnnạ sarangke ratu e sem bọu naparal᷊engu horom papitị ene, nabi e nẹ̌kiạ e, ”Seng i kau e papitị u MAWU. Ringangu papitị ene MAWU e sarung makawatạ Siria. I kau e sarung měsekẹ dumoka tau Siria su Afek sarangkewe i kau e makawatạ si sire.”

¹⁸I Elisa e rimolohu Ratu i Yoas piněngal᷊ạ manga papitị e wal᷊ine ringangu nipakipitị e su ěntana. Datu e měngkatewe němitị ěntana těllu sul᷊e, wọu e něngirul᷊e.

¹⁹I Elisa limangehẹ̌ kụ nẹ̌bera, ”Tumuhụ hinone i kau e harusẹ̌ měměbahẹ̌ sarang lima sul᷊e arau ěnnungu sul᷊e, tangú i kau e wotongewe makapěngal᷊iaesẹ̌ tau Siria. Arawe orasẹ̌ ini e i kau sarung makawatạ tumbạeng těllu sul᷊e.”

²⁰Tawe nararěnnạ wọu ene i Elisa e nairị kụ nilěbing. Su tempo ene manga ghapaěngu tau Moab tiasa e kai měmpẹ̌ngalo wanuang Israelẹ̌ e sěnsul᷊e su ral᷊ungu sěntaung.

²¹Piạ su sěhěllo, piạ e pirang katau kapẹ̌lěbinge tau nate, sěngkělěndịu i sire nakasilo ghapaěngu tau Moab narěnta. I sire měngkatewe lighạ něhipe maietẹ̌ ene su ral᷊ungu lěbing i Elisa e wọu ene timal᷊ang. Sěngapang maietẹ̌ ene nasenggehẹ̌ su manga ruhing Elisa e, maietẹ̌ ene e nẹ̌biahẹ̌ kapia wọu ene rimarisị.

²²Karěngụu pẹ̌paparentang Yoas, i Hazael datun Siria e měnẹ̌nědạ tau Israel.

²³Kai arawe MAWU e tụtal᷊ěntụu manga umatʼE ringangu mangampung i sire. I Sie tawe mapakawalan sire ipakaupu, kaiso kawe mẹ̌tul᷊ung i sire, natuhụewe su kědonʼE ringangi Abraham, Ishak, dingangu i Yakub. Sarang orasẹ̌ ini tawẹ běke i Sie miwul᷊eng umatʼE.

²⁴Bọu ene i Hazael datun Siria e nairị, kụ i Benhadad ahuse naratu.

²⁵Mase i Yoas datung Israel němatạ si Benhadad těllu sul᷊e ringangu něngal᷊ạ kapia manga soa apan seng nipul᷊ahong Benhadad, su tempong pẹ̌paparentan Datu i Yoahas i amang i Yoas.