Read Sangir MANGA RATU KARUANE 14 Bible Online

MANGA RATU KARUANE 14 - Sangir bible

MANGA RATU KARUANE 14

¹Su taung karuane su parentan Yoas ahusi Yoahas su Israel, i Amazia ahusi Yoas naratu su Yehuda.

²Su tempo ene i sie umbure ruam pul᷊o l᷊ima su taunge, kụ i sie nẹ̌parenta su Yerusalem duam pul᷊o sio su taunge karěngụ e. I ninange ute i Yoadan bọu Yerusalem.

³I Amazia mẹ̌kẹ̌koạ apam makal᷊uasẹ̌ naungu MAWU, kai i sie wal᷊inewe kere i Daud i upunge. Mẹ̌sul᷊ung i amange,

⁴i sie mal᷊ain tawe něnggolang kal᷊awọu tampạ u pěnaněmbaěng mahan duata, hakịu kawanua e měngkate těbe měmpěnarakang u sasěmba ringangu měmpạnutung buwụ sene.

⁵Tawe nararěnnạ sarangke natoghasẹ̌ kal᷊aianenge, i Amazia něhukungu papate su manga sawohị apan němpamate si amange.

⁶ Arawe manga anạu sawohị ene e tawe nipatene, ual᷊ingu i sie tụtuhụ titam MAWU su ral᷊ungu Bukẹ̌ i Musa wawerane, ”Kumbahang měhukungu papate su taumata maghurang ual᷊ingu kakanoạ dal᷊akisẹ̌ nikoạ u manga anạ i sire, ringangu kumbahang měhukungu papate su manga rariọ ual᷊ingu kakanoạ u ghaghurang i sire ral᷊akisẹ̌ e. Pẹ̌sěngkatau e kětạembeng botonge ihukungu papate ual᷊ingu karal᷊akisẹ̌ nạung nikoạ e hala.”

⁷Su ral᷊ungu pẹ̌seketang sěmbaụ kụ piạ i Amazia němate si sire sordadong Edom 10.000 su kataune su Wal᷊ang Mapěhadẹ̌, kụ němul᷊aho soan Sela. Soa ene nisěbạ e Yokteel. Sarang orasẹ̌ ini soa ene arenge Wědang Yokteel.

⁸Bọu ene i Amazia něngoro rarolohang sol᷊ong anung Yoas datung Israel mědeạu pěmẹ̌mihing si sie mẹ̌sekẹ.

⁹Kaiso Ratu i Yoas něhabaru sasimbahe ini, ”Sěnsul᷊e tempo manga sumpinị su Wawul᷊urangu Libanon něndingọ u habarẹ̌ ini su kalun cěmara, ”Ei kalun cěmara, gěllịko anạu mahuala e su anạku mědeạu makoạ kawinge.” Kaiso wọu ene nasaheko sene binatang u kěhu sěmbaụ kụ něnanahida sumpinị ene.

¹⁰I kau Amazia, seng naobotẹ̌ ěng, ual᷊ingu i kau kawe seng nakawatạ tau Edom. Kụ kai wal᷊inewe seng nasukụ kal᷊auntu ene tangú? Mapiawe katanạ su wal᷊e i kau e! Kai waugu apạ e i kau měngkate tumbạ u mělẹ̌haghu apa makasilakạ batangengu ringangu kawanuanu?”

¹¹Kaiso i Amazia ratung Yehuda e tawe nẹ̌pandung kal᷊awọu waweran Yoas datung Israel. Ual᷊ingu ene, Ratu i Yoas dingangu taumatane němpẹ̌buạ sol᷊ong Bet-Semes su Yehuda kụ nẹ̌sekẹ dingangi Amazia paịse.

¹²Sordadong Yehuda kinawatạ dingangu sordadone nahuntal᷊ang sol᷊ong bal᷊eng sěmbaụ-sěmbaụ.

¹³I Yoas něnamẹ si Amazia, wọu ene nakoạ sol᷊ong Yerusalem kụ něnggoghahẹ̌ meselu soa ene nandune manga rua hasụ su metere, nanětạ bọu Tukadu Pasěllangeng i Efraim sol᷊ong Tukadu Pasěllangeng Bukune.

¹⁴Kal᷊awọu wul᷊aeng dingangu sal᷊aka ringangu kěbị apal᷊iwụ kụ nikaěbakeng su Wal᷊em MAWU e, ringangu kal᷊awọu arětạ u istana, ringangkewelain pirang katau kinataweng e, nihengkẹ i Yoas sol᷊ong Samaria.

¹⁵Běkene wal᷊ine e tangú mạanun Datu i Yoas, narekeng lai pẹ̌tatěngesẹ e rimokạ si Amazia ratung Yehuda e niwohẹ su ral᷊ungu bukẹ̌ u Wěkem Mararatung Israelẹ̌ e.

¹⁶I Yoas napohong dingangu nilěbing su pěndal᷊ẹ̌bingangu mararatu su Samaria. I Yerobeam karuane ahuse naratu něngaweng si sie.

¹⁷Sarangke i Yoas datung Israel napohong, i Amazia ratung Yehuda e rem bědang nẹ̌biahẹ̌ lai mapul᷊o l᷊ima su taunge.

¹⁸Su Yerusalem piạ komol᷊angu mapulu měmate si Amazia. Ual᷊ingu ene i sie timal᷊ang sol᷊ong Lakhis, kaiso manga rokạ e němpanahusu si sie sol᷊ong pai ene kụ němate. Maietẹ̌ nilurang su kawal᷊o sol᷊ong Yerusalem, bọu e nilěbing su pěndal᷊ěbingangu mararatu su Soan Daud. Tangú kawanuang Yehuda e něnduị i Uzia,[14] ahusʼi Amazia nakoạ datun sire. Su tempo ene i Uzia umbure wuhụ e mapul᷊o ěnnung su taunge. Běkene wal᷊ine mạanun Datu i Amazia e niwohẹ su ral᷊ungu bukẹ̌ u Wěkem Mararatun Yehuda.

²²Su l᷊ikudu kapapohong i amange, i Uzia e němul᷊aho kapia soang Elat dingangu nipětị e kapia.

²³Su taung kapul᷊o l᷊imane su parentang Amazia ahusʼi Yoas baugu Yehuda, i Yerobeam karuane ahusʼi Yoas nakoạ datung Israel, kụ nẹ̌parenta su Samaria ěpạ u pul᷊o ěsa su taunge karěngụ e.

²⁴I sie nẹ̌dosa su MAWU, ual᷊ingu timol᷊e karal᷊akị u Ratu i Yerobeam humotong kụ nakawodaị tau Israel nẹ̌dosa.

²⁵ I Yerobeam karuane ini e němul᷊aho kapia kasěllahu wanuang Israel, bọu ral᷊eng sol᷊ong Hamat, su wahageang sawěnahẹ̌ sol᷊ong Laudẹ̌ Nate su sěmběkan dakị. Ene natuhụ kere su kědom MAWU, Ruatang Israel, limiung ěllangʼE, Nabi Yunus anạ i Amitai tau Gat-Hefer.

²⁶MAWU e nakasilo kereapa sunsarane tau Israel, kụ tawẹ u sarang sěngkatau nẹ̌tul᷊ung i sire.

²⁷MAWU e tawẹ timonane mẹ̌gagholọu Israel sarang marěngụ-děngụ, ual᷊ingu ene i Sie nẹ̌tul᷊ung i sire wọu Ratu i Yerobeam karuane.

²⁸Běkene wal᷊ine mạanun Datu i Yerobeam karuane, hal᷊ẹ̌ u pẹ̌tatěngesẹ e su ral᷊ungu pẹ̌sasekẹ dingangu kereapa i sie němul᷊aho kapia Damsyik dingangu Hamat bọu Yehuda waugu Israel, kěbị e niwohẹ su ral᷊ungu bukẹ̌ u Wěkem Mararatung Israel.

²⁹I Yerobeam karuane napohong dingangu nilěbing su pěndal᷊ěbingangu mararatu. I Zakharia ahuse naratu něngaweng si sie.