Read Sangir MANGA RATU KARUANE 15 Bible Online

MANGA RATU KARUANE 15 - Sangir bible

MANGA RATU KARUANE 15

¹Su taung karuam pul᷊o pitune su parentan Datu i Yerobeam karuane su Israel, i Uzia[15] anạ i Amazia naratu su Yehuda.

²Su tempo ene i sie umbure mapul᷊o ěnnung su taunge kụ nẹ̌parenta su Yerusalem limam pul᷊o dua su taunge karěngụ e. I ninange isẹ̌sẹ̌bạ si Yekholya, wawineng Yerusalem.

³Mẹ̌sul᷊ungi amange, i Uzia mal᷊aing mẹ̌kẹ̌koạ apang makạl᷊uasẹ̌ naungu MAWU.

⁴Kaiso sal᷊age, i sie kawe tawe něngupu kal᷊awọu tampạu pěnanal᷊eng mahan duata, hakịu kawanua e měngkate těbe mạněmbang sasěmba ringangu mạnutung buwụ su tampạ ene.

⁵MAWU e napakariadin sie nasakị su pisị makạtatakụ, kụ sarang i sie nate, sakị e ene tawe maraul᷊e. I sie niwembang su wal᷊e sěmbaụ dingangu niliu wọu kal᷊awọu munarane. I Yotam ahuse nẹ̌parenta kawanua kere tumatimbang si sie.

⁶ Bẹ̌kene wal᷊ine mạanun Datu i Uzia niwohẹ su ral᷊ungu bukẹ̌ u Wěkem Mararatun Yehuda.

⁷I Uzia nairị dingangu nilěbing su pěndal᷊ẹ̌bingang u mararatu su Soan Daud. I Yotam ahuse naratu něngaweng si sie.

⁸Su taung katěllum pul᷊o ual᷊une su parentan Datu i Uzia su Yehuda e, i Zakharia anạ i Yerobeam karuane nakoạ datung Israel dingangu nẹ̌parenta su Samaria ěnnungu wul᷊ang karěngụ e.

⁹Mẹ̌sul᷊ungu mararatu kụ nẹ̌parenta kal᷊imona e, i sie mal᷊aing nẹ̌dosa su MAWU. I sie timol᷊e karal᷊akisu Ratu i Yerobeam humotong, kụ seng napakariading Israel nẹ̌dosa.

¹⁰I Salum anạ i Yabesh kai piạ gihingange rumokạ Datu i Zakharia, ringangu měmate si sie su Yibleam, bọu e naratu něngaweng si sie.

¹¹ Dingangu kerene tangú, nariadị e apan seng nikědom MAWU su Ratu i Yehu, u anạ pulunge sarang kaěpạ u hawenge[16] sarung makoạ datu su Israel. Běkene wal᷊ine mạanun Datu i Zakharia niwohẹ su ral᷊ungu bukẹ̌ u Wěkem Mararatung Israel.

¹³Su taung katěllum pul᷊o sione su parentan Datu i Uzia su Yehuda, Salum anạ i Yabesh naratu su Israel. I sie nẹ̌parenta su Samaria e kětạeng sěmbul᷊ang,

¹⁴ual᷊ingu i Menahem anạ i Gadi e něngal᷊ing bọu Tirza sol᷊ong Samaria, bọu e němate si Salum, kụ nakoạ datu něngaweng si sie.

¹⁵Su ral᷊ungu raral᷊enge wọu Tirza, i Menahem něnggagholọ soan Tifsah marihutu ringangu apạewem banua něliwung soa e mase lai napakawinasang kal᷊awọu kawanuane. Ual᷊ingu soa ene tawe mapulu tumuhụ si sie, tangú i sie něngua tiangu manga wawine matatiang su soa ene. Běkene wal᷊ine mạanun Datu i Salum, nasowa l᷊ai ghihingange, niwohẹ su ral᷊ungu bukẹ̌ u Wěkem Mararatung Israel.

¹⁷Su taung katěllum pul᷊o sione su parentan Datu i Uzia su Yehuda, i Menahem anạ i Gadi naratu su Israel, kụ nẹ̌parenta su Samaria mapul᷊o taung karěngụ e.

¹⁸Karěngụ u pẹ̌bawiahe i sie nẹ̌dosa su MAWU, ual᷊ingu tutuhụ karal᷊akisu Ratu i Yerobeam humotong, kụ napakariadin tau Israel nẹ̌dosa.

¹⁹Su tempong i Pul[17] datung Asyur něngalo Israel, i Menahem nẹ̌gěllịu sal᷊aka 34.000 su kilone si sie, tadeạu i sie maontol᷊ẹ̌ manoghasẹ̌ kawasang Menahem baugu Israel.

²⁰Kakakoạ e i Menahem nakahombang doitẹ̌ ene ute kai něnihasa taumata apang kalạ su Israelẹ̌ e nẹ̌gěllịu pẹ̌tahạ limam pul᷊o su kal᷊ěpane roitẹ̌ sal᷊aka e sěngkatau. Ual᷊ingu ene i Pul naněntang u wanua ene kụ napul᷊ẹ sol᷊ong bal᷊ene hala.

²¹Běkene wal᷊ine lai ute mạanung Datu i Menahem nawohẹ su ral᷊ungu bukẹ̌ u Wěkem Mararatung Israel.

²²I sie napohong dingangu nilěbing, bọu ene i Pekahya anạ e naratu něngaweng si sie.

²³Su taung kal᷊imam pul᷊one su parentan Datu i Uzia su Yehuda, i Pekahya anạ i Menahem naratu su Israel dingangu nẹ̌parenta su Samaria rua taung karěngụ e.

²⁴I sie nẹ̌dosa su MAWU ual᷊ingu tụtuhụ karal᷊akisu Ratu i Yerobeam humotong, kụ nakakariadin tau Israel nẹ̌dosa.

²⁵Sěngkatau wọu tal᷊oaran manga pěrwirane, kụ kai nạung i Pekah anạ i Remalya, nẹ̌gihingang dingangu i sire limam pul᷊o su kataune wọu Gilead. Mase su ral᷊ungu benteng sěmbaụ e su istana su Samaria e i sire němpěmate si Pekahya sěngkatau ringang i rẹ̌dua lai wal᷊ine isẹ̌sẹ̌bạ si Argob dingangi Arye. Bọu ene i Pekah nakoạ datu něngaweng si Pekahya.

²⁶Běkene lai wal᷊ine Datu i Pekahya e niwohẹ su ral᷊ungu bukẹ̌ u Wěkem Mararatung Israel.

²⁷Su taung kal᷊imam pul᷊o duane su parentan Datu i Uzia su Yehuda e, i Pekah anạ i Remalya naratu su Israel. I sie nẹ̌parenta su Samaria e dua pul᷊o su taunge karěngụ e.

²⁸I sie nẹ̌dosa su MAWU ual᷊ingu tụtuhụ karal᷊akisu Ratu i Yerobeam humotong kụ napakariading Israel nẹ̌dosa.

²⁹Su tempong parentam Pekah, i Tiglat-Pileser datung Asyur němul᷊aho soang Iyon, Abel-Bet-Maakha, Yanoah, Kedes, Hazor, wanuang Gilead, Galilea ringangu Naftali. Tumanạ e nihengkẹ lai kere taumata nitaweng sol᷊ong Asyur.

³⁰Su taung karuam pul᷊one su parentan Datu i Yotam anạ i Uzia su Yehuda, i Hosea anạ i Ela nẹ̌gihingang dimokạ Datu i Pekah ringangu němate si sie, wọu e naratu něngaweng si sie.

³¹Běkene wal᷊ine mạanung Datu i Pekah niwohẹ su ral᷊ungu bukẹ̌ u Wěkem Mararatung Israel.

³²Su taung karuane su parentan Datu i Pekah anạ i Remalya su Israel, i Yotam anạ i Uzia e naratu su Yehuda.

³³Su tempo ene i sie umbure duam pul᷊o l᷊ima su taunge ringangu i sie nẹ̌parenta su Yerusalem mapul᷊o ěnnung su taunge karěngụ e. I ninange ute i Yerusa anạ i Zadok.

³⁴I Yotam nẹ̌koạ apang makạl᷊uasẹ̌ naungu MAWU, mẹ̌sul᷊ungu i Uzia i amange.

³⁵Kai sal᷊age, apan tampạ u pěnanal᷊eng su mahan duata e tawe nighoghahe, hakịu kawanua e měngkate těbe mạněmbang sasěmba ringangu mạnutung buwụ sene. Seng i Yotam němangung Tukadu Pasěllangeng Batuhu Sawěnahẹ̌ e su Wal᷊em MAWU.

³⁶Su tempong parentan Yotam, MAWU e něnětạ e něndingọ i Rezin datun Siria ringang i Pekah ratung Israel baugu pěngalo Yehuda. Běkene wal᷊ine mạanun Datu i Yotam niwohẹ su ral᷊ungu bukẹ̌ u Wěkem Mararatun Yehuda.

³⁸I sie napohong dingangu nilěbing su pěndal᷊ẹ̌bingangu mararatu su Soan Daud. I Ahas anạ e naratu něngaweng si sie.