Read Sangir MANGA RATU KARUANE 17 Bible Online

MANGA RATU KARUANE 17 - Sangir bible

MANGA RATU KARUANE 17

¹Su taung kapul᷊o duane su parentan Datu i Ahas su Yehuda, i Hosea anạ i Ela naratu su Israel, kụ i sie nẹ̌parenta su Samaria sio taung karěngụe.

²I sie nẹ̌dosa su MAWU, katewe rosane kal᷊awọe wal᷊inewe kere rosang mararatung Israel nẹ̌parenta kal᷊amona.

³I sie niseketang dingangu nipẹ̌kawasaěng i Salmaneser datung Asyur, hakịu apan taung i sie harusẹ̌ měmaehẹ̌ gaghěllị su ratu baugʼi sie.

⁴Kaiso piạ sěnsul᷊e, i Hosea naparal᷊eng u rarolohang sol᷊ong anun Datu i So ratung Misirẹ̌ baugu apědẹ̌dorong tatongkane. Mase i Hosea něngědo němaehẹ̌ gaghěllị apan taung su Asyur. Piạ i Salmaneser nakakasingkạ u kakanoạ i Hosea ene, i sie něnamẹ si Hosea kụ něnuẹ̌ i sie su tahungkụ.

⁵Bọu ene i Salmaneser datung Asyur[19] něngalo Israel kụ něngurung Samaria. Su katěllu taunge wọu pěndal᷊iwung ene,

⁶— ute kai taung kasione wọu pẹ̌paparentan Datu i Hosea — I Salmaneser něngaho Samaria. Bọu e tau Israel nihengkẹ kere nitaweng sol᷊ong Asyur. Sěmbahageang bọu i sire nipěllọ e su soan Halah, sěmbahageangke wue ute su rěduhu Sal᷊ụ u Habor su wanuang Gozan, arawe lai sěmbahageang ute suapan soa su wanuang Madai.

⁷Samaria e nanawo ual᷊ingu tau Israel nẹ̌dosa su MAWU, Ruatan sire kụ seng něngambang si sire wọu ratung Misirẹ̌, dingangu nẹ̌bawa si sire nipasěbang bọu wanua ene. I sire měnẹ̌nal᷊e manga ruata wal᷊ine

⁸dingangu tụtuhụ tundung kal᷊awọu wansa nitokol᷊u MAWU su tempong tau Israel timol᷊e něnekẹ manga wansa ene. Tau Israel tụtuhụ tundu niatoru mararatung Israel,

⁹ringangu měkẹ̌koạ kal᷊awọu apan tawe mẹ̌tatahino su MAWU, Ruatan sire. I sire něndarisị tampạ u pěnanal᷊eěng mahan duata su kěbị soan sire, baẹ su soa rarodọ arau lai su soa ghaghuwạ.

¹⁰ Balạewe su wowom bul᷊ude sude, ringangu su al᷊ungu apang kakaluang mal᷊ahěbung, i sire napararisị u manga rihi ghaghuwạ dingangu manga tul᷊adan duata wawine i Asyera.

¹¹I sire lai němpěnutung kamania su kěbị tampạ u pananěmbaěng mahan duata kerẹewe narang i sire kal᷊awọu wansa nitokol᷊u MAWU wọu wanuang Kanaan. I sire měnẹ̌němba tul᷊adang mahan duata manimbe seng nisědinge. Kal᷊awọu kakanoạ i sire ral᷊akisẹ̌ e makawětị dal᷊angehu MAWU.

¹²

¹³MAWU e naparal᷊engu manga rarolohang dingangu manga nabinʼE su umatu Israel dingangu Yehuda waugu měhabaru tatahěndung ini: ”Pěngědọe mẹ̌koạ dal᷊akisẹ̌ dingangu tuhukeko kal᷊awọu laoro ringangu tita kụ sen Takụ nighěllị su manga i upungu ringangu si kamene wọu manga nabi, manga ěllang-Ku ene.”

¹⁴Kaiso Israel dingangu Yehuda e tawe napulu rumaringihẹ̌. Těmbọ i sire mẹ̌sul᷊ungu manga i upung i sire kụ tamangangimang su MAWU, Ruatan sire.

¹⁵Israel dingangu Yehuda e mạdiri tumuhụ kal᷊awọu manga parentam MAWU ringangu tawẹ satiane su pẹ̌kakakědo seng nikoaʼE ringangu i upung i sire. I sire tawe rumaringihẹ̌ kěbị apang iwěberanʼE, kaiso mẹ̌kẹ̌kal᷊iomaneng su manga tul᷊ada tawẹ kěhase, hakịu i sire hala e mal᷊ain nakoạ tawẹ kěhase. I sire mạhuntol᷊e sansahu manga wansa nangělikụ si sire, manilaim MAWU e seng nẹ̌sẹ̌ding.

¹⁶ I sire limampa kal᷊awọu titam MAWU, Ruatan sire, ringangu sapi rarua wọu warang makakětị-kětị baugu sěmbaěng. I sire němpẹ̌koạ tul᷊adan duata wawine i Asyera, maněmba manga wituing dingangu měkẹ̌kal᷊iomaneng su mahan duata i Baal.

¹⁷ I sire mẹ̌gẹ̌gěllị u manga anạ i sire gaghěllị tinongkạ baugu mahan duata. I sire měpẹ̌pakẹ u wawal᷊ikụ dingangu makịtěgu su manga tahahopa kụ piạ kal᷊ahěmpukange ringangu kal᷊awọu rohkẹ̌. I sire makakěhagẹ̌ měmpẹ̌koạ apam makasusa naungu MAWU,

¹⁸hakịu i Sie limangehẹ̌ marasai si sire kụ sen tawe lai mẹ̌papandung si sire. I Sie něnděmmẹ i sire wọu ěntana kụ seng nionggọʼE si sire; kụ natěntang ute kětạeng kararatuangu Yehuda.

¹⁹Kal᷊awọu taumatang Yehuda mal᷊ain tawe tumatuhụ kal᷊awọu titam MAWU, Ruatan sire. I sire mạhuntol᷊e narangu tau Israel,

²⁰tangú MAWU e selain tawe mangakung kal᷊awọu umatu Israel. I Sie měhukung dingangu měnarakang i sire su manga sekẹ i sire apam matatingkaị. I Sie sen tawe lai mẹ̌papandung si sire, kaiso mělẹ̌hipen sire wọu ěntana kụ nionggọʼE si sire.

²¹Sarangke MAWU e napẹ̌dal᷊ahaeng Israel bọu Yehuda e, tau Israel něhengkẹ i Yerobeam anạ i Nebat nakoạ datun sire. Bọu e i Yerobeam nẹ̌koạ si sire sarang němpaněntang u MAWU ringangu mẹ̌kẹ̌koạ dosa gaghaghuwạ.

²²I sire tụtol᷊e sansahʼi Yerobeam dingangu tatapẹ̌ mẹ̌kẹ̌koạ kal᷊awọu rosa kẹ̌koatenge,

²³hakịu pěngěnsueěnge MAWU e selain tawe mẹ̌papandung si sire, kaiso němembang i sire wọu ěntana kụ nionggoʼE si sire. Ene nariadi natuhụ ewe kere su tatahěndung nionggọ u MAWU si sire limiung manga ěllangʼE, manga nabi. Kerene tau Israel niwawa sol᷊ong pěndarěmekang su Asyur, kụ němpẹ̌tanạ sene sarang ěllo ini.

²⁴Nakoạ laaweng tau Israel kụ seng nihuwo sol᷊ong pěndarěmekang ene, ratung Asyur něměllọu kal᷊awọu taumata wọu Babel, Kuta, Awa, Hamat, dingangu Sefarwaim, su manga soang Samaria.[20] I sire ene nakakaiang suapan soa ene ringangu němpẹ̌tanạ sene.

²⁵Su tempo nạung kal᷊amona i sire natanạ sene i sire tawe měngangadatẹ̌ MAWU; hakịu ene MAWU e naparěntaʼm manga singa ipaněmbo sěmbahageang boʼi sire.

²⁶Mase taumata něhabarẹ̌ su ratung Asyur u taumata apang nipěllọ su katatanakeng suapan soa su Samaria e běgawen manga titam mahan duatam banua ene. Hakịu ene mahan duata ene naparěntan singa ipěněmbo si sire.

²⁷Ual᷊ingu ene ratung Asyur něngoro tadeạu sěngkatau imang bọu tal᷊oarang manga taweng kụ seng nirěmmẹ sol᷊ong Asyur, niringọ kapia sol᷊ong Samaria. ”Dolohe i sie kapul᷊ẹ kụ patanạ sene tadeạu i sie wotonge maněntiro si sire ene mạanung manga titam mahan duatam banua ene,” angkuěng u ratu.

²⁸Tangú sěngkatau imang u Israel, kụ seng nihuwo wọu Samaria sol᷊ong Asyur, napul᷊ẹ dingangu natanạ su Betel. Sene i sie něněntiro kawanua kereapa měněmba MAWU.

²⁹Kaiso taumata apam měmpẹ̌tẹ̌tanạ su Samaria e mang mẹ̌kẹ̌koạ tul᷊adan sire hala kụ ipẹ̌pěllọ i sire su ral᷊ungu wal᷊em pananěmbaěng mahan duata nirarisị u tau Israel nạung kal᷊imona nẹ̌tanạ su soa ene. Apang ghal᷊ipoho masịkoạ tul᷊adang mahan duatan sire hala, su soa nạung pinẹ̌tanakeng i sire:

³⁰Tau Babel nẹ̌koạ tul᷊adang mahan duatang Sukot-Benot, tau Kuta nẹ̌koạ tul᷊adang Nergal, tau Hamat tul᷊adang Asima,

³¹tau Awa tul᷊adang Nibhas dingangu Tartak, dingangu tau Sefarwaim naněmbang manga anạ i sire kere sasěmba tinongkạ su mahan duata i Adramelekh dingangu i Anamelekh.

³²Sul᷊iung mạněmba manga mahan duata ene, i sire lai mạněmba MAWU. I sire měmẹ̌mile wọu tal᷊oaran sire haghin taumata baugu ipěmunara kere imang dingangu maněmbang sasěmba su manga wal᷊em pananěmbaěng mahan duata.

³³Kụ i sire naněmba MAWU, kaiso lai mạněmba manga mahan duatan sire hala, tuhụewe tundune su wanuan sire tutune.

³⁴ Sarang ěllo sěhěllo ini, i sire mang měděndal᷊eng u tundun sire. I sire tawe mẹ̌kakal᷊iomaneng su MAWU ringangu tawe lai tumatuhụ kal᷊awọu tita ringangu hengetangʼE kụ seng nionggọʼE su hiten Yakub, kụ mal᷊aing siněbạ e si Israel.

³⁵ MAWU e seng nẹ̌taingu pẹ̌kakědo kere ini ringangu umatʼu Israel, ”Kumbahang mẹ̌kal᷊iomaneng su manga ruata wal᷊ine; kumbahang mẹ̌tumpěkuhẹ̌ měněmba si sire, arau mẹ̌tangkiang si sire, arau měnarakang u sasěmba gaghěllị si sire.

³⁶ Pěngadatẹ̌ko Siạ, MAWU, seng naněbang i kamene wọu Misirẹ̌ dingangu kawasa masěllahẹ̌; paněmbako Siạ dingangu pangonggọko gaghěllị si Siạ.

³⁷Tuhuke wue sěntiniạ kal᷊awọu tita ringangu manga hengetang kụ sen Takụ niwohẹ baugʼi kamene. Kumbahang mẹ̌kal᷊iomaneng su manga ruata wal᷊ine,

³⁸ringangu abe kiwul᷊eng pẹ̌kakědo su wěllạu Iạ dingang i kamene.

³⁹Pakararingihẹ̌ bue Siạ MAWU Ruatanu, tangú Iạ sarung mapakapěllọ i kamene wọu manga sědụ i kamene.”

⁴⁰Kaiso kawanuan Samaria e tawe mapulu rumaringihẹ̌; i sire tatapẹ̌ mạngumpaedẹ̌ tundung adatʼi sire.

⁴¹Kụ i sire naněmba MAWU, kaiso l᷊ai mạněmba manga mahan duatan sire. Sarang ěllo sěhěllo ini e lai hiten sire mang bědang mẹ̌kẹ̌koạ ene.