Read Sangir MANGA RATU KARUANE 18 Bible Online

MANGA RATU KARUANE 18 - Sangir bible

MANGA RATU KARUANE 18

¹Su taung katěllune su parentan Datu i Hosea anạ i Ela su Israel, i Hizkia anạ i Ahas naratu su Yehuda.

²Su tempo ene i sie umbure duam pul᷊o l᷊ima su taunge ringangu i sie nẹ̌parenta su Yerusalem duam pul᷊o sio su taunge karěngụ e. I ninange isẹ̌sẹ̌bạ si Abia, anạ i Zakharia.

³I Hizkia nẹ̌koạko hal᷊ẹ̌ nakal᷊uasẹ̌ naungu MAWU kere Ratu i Daud i upunge.

⁴ I sie něnggoghahẹ̌ manga tampạ u pěnaněmbaěng su mahan duata, kụ něngopehẹ̌ kal᷊awọu manga rihi meselẹ̌ gaghuwạ dingangu něnggolang manga tul᷊adang mahan duata wawine i Asyera. I sie mal᷊aing napakahěmpung u těmpu nikoạ i Musa wọu kal᷊aukangu tambaga ringangu timběha isẹ̌sẹ̌bạ Nehustan. Batụu sarang tempo ene tau Israel bědang měnẹ̌nawung u kamania waugu měngadatẹ̌ těmpu ene.

⁵Su tal᷊oarang kěbị datung Yehuda, baewe kal᷊amona arau samuring Hizkia, tawẹ apa mẹ̌sul᷊ung i sie. I sie mạngimang su MAWU, Ruatang Israel

⁶ringangu satia si Sie. Tawẹ běke i sie rumokạ MAWU. Kal᷊awọu parentam MAWU kụ nionggọ limium Musa e, rẹ̌daringihang i Hizkia ringangu kakakěndagẹ̌.

⁷Hakịu ene MAWU e mang tatapẹ̌ mẹ̌tul᷊ung i sie hakịu i sie měngkate mangual᷊i su ral᷊ungu patikụ hambakẹ̌. I sie nẹ̌parompakẹ̌ su těngon datung Asyur, kụ madiri rumaringihẹ̌ si sie.

⁸I sie němatạ tau Pilistin, dingangu němul᷊aho katatanakeng i sire, wọu soa kakadọdokange sarang soa kạguwakenge, nasowa l᷊ai Gasa ringangu wanua mạngělikụ e soa ene.

⁹Su taung kaěpạ e su parentang Hizkia, kụ su taung kapitune su parentan Datu i Hosea su Israel, i Salmaneser datung Asyur něngalo Israel dingangu něliwung Samaria.

¹⁰Bọuten niliwungang těllu taung karěngụ e, Samaria e nanawọ e. Ene nariadi su taung kaěnnunge su parentang Hizkia, ringangu taung kasione su parentang Hosea.

¹¹Bọu e ratung Asyur něhengkẹ tau Israel kere taweng sol᷊ong Asyur; sěmbahageang boʼi sire nipětanạ e su soang Halah, sěmbahageang su rěduhu Sal᷊ụ u Habor su wanuang Gozan, dingangu sěmbahageang lai ute suapan soa su wanuang Madai.

¹²Samaria nanawo ual᷊ingu tau Israel tawe rumararingihẹ̌ su MAWU, Ruatan sire. I sire měmẹ̌mungkạ u pẹ̌kakakědo kinoạ u MAWU e ringang i sire; kụ i sire lumampa patikụ parentam Musa, ěllangʼE. I sire tawe mapulu rumaringihẹ̌ dingangu tawe mapulu tumuhụ.

¹³Su ral᷊ungu taung kapul᷊o ěpạ e su parentang Hizkia ratung Yehuda, manga soang Yehuda kụ piạ těndạ e niseketang kụ kinawatạ i Sanherib datung Asyur.

¹⁴Tangú i Hizkia něndohong habarẹ̌ kere ini si Sanherib su Lakhis, ”Iạ e seng nẹ̌sal᷊a. Ual᷊ingu ene, iạ mẹ̌dorong mal᷊owọko i Tuang deng měngětạu pěnanekẹ si kami. Patikụ tuntukang i Tuang takụbe sarung ganapeng.” I Sanherib simimbang u i Hizkia e harusẹ̌ měndingọ u sal᷊aka mapul᷊o hiwu su kilone ringangu wul᷊aeng sěhiwu su kilone.

¹⁵Ual᷊ingu ene kal᷊awọu sal᷊aka su ral᷊ung u Wal᷊em MAWU ringangu su ral᷊ungu kasẹ̌ u istana e iringọ i Hizkia si Sanherib.

¹⁶Bul᷊aeng suapan tukadu Wal᷊em MAWU ringangu apan seng nisakẹ i Hizkia e hala su manga kakandang tukadẹ̌ e nial᷊ạ e kụ niringọ lai si Sanherib.

¹⁷Kai ratung Asyurẹ̌ ene e něndingọ u wuntuang bọu Lakhis e masaria ipěnekẹ Yerusalem. Wuntuang ene lẹ̌ahakeng u pěrwira mararange těllung katau, kụ sěngkatau e panglima, sěngkatau e mẹ̌sasiliwirẹ̌ inumang,[21] dingangu sěngkatau lai e těmbonangu lukadu ratu. Nahumpạen soa ene i sire nẹ̌tampạ su rahami, kụ isẹ̌sẹ̌bạ Dahaming Měngangunsạ, maraning songe mẹ̌ngelehu akẹ bọu liwuạ e rasị su wowone.

¹⁸Mase i sire němpěmansagẹ̌ kụkui Ratu i Hizkia. Tangú i sire těllu sawohị i Hizkia e nahunsěbang kụ nẹ̌sombang i sire. Sawohị tatěllu ene ute kai i Elyakim anạ i Hilkia těmbonangu ral᷊ohom bal᷊eng istana, i Sebna tulị u wanua, dingangu i Yoah anạ i Asaf tulị u istana.

¹⁹Sěngkatau wọu pěrwirang Asyur ene nẹ̌bera si sire, ”Paul᷊ịko si Hizkia waweran datung Asyurẹ̌ ini e: ’Unụe i kau nakapěndang batangengu e matoghasẹ̌?

²⁰I kau mạngěnna u kětạeng bawera e makaawembe tahuakal᷊ẹ̌ dingangu katoghasu sordado tangu? I sai pạngumbalaěngu hakịu i kau wahani rumokạ Asyur tangú?

²¹I kau mambeng mělẹ̌harapẹ̌ laontol᷊u Misirẹ̌, kaiso ene mẹ̌sul᷊ungu kere mẹ̌pakẹ u kalung ěhe ipẹ̌těking; kụ těking ene sarung mapědi ringangu limanu kasusukange. Kerene kakoạu ratum Misirẹ̌ e baugu patikụ taumata apang mělẹ̌harapẹ̌ si sie.’ ”

²²Tuhụ e pěrwirang Asyurẹ̌ ene nẹ̌bera, ”Arau aramanung i kamene mẹ̌bera u i kamene mělẹ̌harapẹ̌ su MAWU, Ruatanu? Su tempong i Hizkia nẹ̌parenta tadeạu tau Yehuda ringangu Yerusalem kětạeng mẹ̌kẹ̌kal᷊iomaneng su těngom pananěmbaěng su Yerusalem apa nighoghahe ene wal᷊inewe pananěmbaěng su MAWU e samatang?

²³Kụ ini e su areng ratung Asyur, iạ bahani mẹ̌bataru u kamagengu i kamene onggotangu kawal᷊o dua hiwu su waụ e, nal᷊ahẹ u i kamene tawẹ taumatang kamene kerene kal᷊awọe mahunsake!

²⁴Manilaing ipěndokạ pěrwirang kami kasanakenge, i kamene wal᷊inewe rokạ e. Kaiso i kamene mělẹ̌harapẹ̌ lai Misirẹ̌ měndingọ u laontol᷊ẹ̌ karetan sekẹ dingangu wuntuangu piạ kawal᷊one!

²⁵Katihọ i kamene i kami e měngalo dingangu měmatạ banuang kamene tawẹ apa laontol᷊u MAWU tangú? MAWU sẹ̌sane něngoro si kami piněnekẹ dingangu piněnggoghahẹ̌!”

²⁶Mase angkuěng i Elyakim, Sebna, ringangu i Yoah su pěrwira ene, ”Tuang, pẹ̌bisarạ e su werang Aram si kami e, i kami makaěnna. Kumbahang mẹ̌berang berang Ibrani, mạdiring kaěnnaěngu kawanua su wowong meselu soa ene.”

²⁷Sasimbangu pěrwira ene, ”Kai tumbạeng baugʼi kamene ringangu ratung kamene iạ e nirolohu ratung Asyur pěhabaru patikụ ini e tangú? Bal᷊ine! Iạ mal᷊aing nẹ̌bera su kawanua apam mạiang su meselẹ̌ ene, kụ nạung dingang i kamene sarung kumaěng taine hala, ringangu měnginung liase hala.”

²⁸Bọu e pěrwira ene rimarisị dingangu nẹ̌bansagẹ̌ su werang Ibrani, ”Daringihẹ̌ko apan niwerang datu i Asyur:

²⁹’Kumbahang mapulu makilinga si Hizkia; i sie tawe makasal᷊amatẹ̌ si kamene.

³⁰Abe raringihe laologe waugu měharapẹ̌ su MAWU. Abe pěngěnna u MAWU e kai makasal᷊amatẹ̌ si kamene arau měnahaghe sordadong Asyur měmul᷊aho soanu.

³¹Abe raringihe i Hizkia. Iạ e ratung Asyur měngoro si kamene tadeạu i kamene sěbang bọu soa ringangu pěngakụ e lome. Kụ i kamene wotonge mahungkaěng buang anggorẹ̌ bọu sasuang i kamene hala, ringangu makateěng buang ara wọu sasuang i kamene hala, ringangu měnginung akẹ u pahighing kamene hala,

³²sarang i kamene takụ al᷊ingang sol᷊ong banua sěmbaụ mangawẹ banuanu hala. Paịse piạ dahaming anggorẹ̌ mẹ̌ngẹ̌ngual᷊i anggorẹ̌ baugi kamene, ringangu rahaming gandung kụ makaual᷊i tapoěng kaěng i kamene. Su wanua ene piạ kalung zaitun, lanan zaitun dingangu madu. Kereu i kamene tumuhụ apan takụ ilẹ̌oro si kamene, i kamene sarung mẹ̌biahẹ̌, kụ tawe mate. Abe raringihe i Hizkia! I sie kětạeng mělinga si kamene mẹ̌berau MAWU e sarung měnal᷊amatẹ̌ si kamene.

³³Piạ ngae mahan duatam bansa wal᷊ine kụ měnal᷊amatẹ̌ banuane wọu kawasaku?

³⁴Kai suapa manga mahan duatang banuang Hamat dingangu Arpad? Suapa manga mahan duata Sefarwaim, Hena, ringangu Iwa? Piạ ngae riměnta něnal᷊amatẹ̌ Samaria?

³⁵Mahan duata sude wọu něliwirẹ̌ banuane wọu kawasaku? Kahěngang bue MAWU měnal᷊amatẹ̌ Yerusalem?’ ”

³⁶Nakaringihẹ̌ ene, kawanuang Yerusalem tawe simimbahẹ̌, batụu Ratu i Hizkia seng nẹ̌parenta tadeạu i sire měngkate karěmasẹ̌.

³⁷Tangú i Elyakim, i Sebna, ringangu i Yoah němpěnggehẹ pakeang i sire tatialang naung i sire něngkasusa, mase rimal᷊eng něhabarẹ̌ su ratu apan seng niwerang pěrwirang Asyurẹ̌ ene.