Read Sangir MANGA RATU KARUANE 19 Bible Online

MANGA RATU KARUANE 19 - Sangir bible

MANGA RATU KARUANE 19

¹Su tempon Datu i Hizkia e nakaringihẹ̌ laporang i sire těllu ene, i sie naměkase pakeange ringangu něluhẹeng pakeange karong tatialan nělutu, mase nakoạ e sol᷊ong Bal᷊em MAWU.

²Mase i sie něndolohʼi Elyakim, těmbonangu istana, i Sebna tulị u wanua, dingangu manga imang apan sem maghurang, mědeạu mẹ̌sombangu Nabi i Yesaya anạ i Amos. I sire mal᷊aim mẹ̌pẹ̌pakeangu karong.

³Seng ini e tatanatang Hizkia nipaul᷊ị i sire si Yesaya, ”Ěllo ini e ěllon susa naung; i kitẹ nihukung dingangu nihinakaneng. I kitẹ e mẹ̌sul᷊ungu wawine kụ seng měhěndingke kutẹu kai kinasueěngu toghasẹ̌.

⁴Datung Asyurẹ̌ sen něndolohu sěngkatau pěrwirane karangetange mědeạu pělẹ̌hinakang Duata kụ biahẹ̌. I sai masingkạ MAWU Ruatanu e sen nakaringihẹ̌ lahinakang ene, kụ sarung měhukung i sire apang měmpẹ̌sẹ̌sẹ̌bạu ene! Ual᷊ingu ene pẹ̌kal᷊iomanengko su Mawu Ruata baugu taumatang kitẹ kụ bědang biahẹ̌.”

⁵Bọuten nakatarimạ tatanatan Datu i Hizkia ene,

⁶i Yesaya něngoro manga rarolohang ene pělẹ̌habaru sasimbang ini, ”MAWU e něhengetang, i Tuang e tawahal᷊uasu matakụ, makaringihẹ̌ pěndal᷊ahẹ u manga ěllangu ratung Asyurẹ̌ ene, u MAWU e tawe makapěllọ i kitẹ.

⁷MAWU sarung mapakariadin datung Asyurẹ̌ e mahimang sěmbaụ habarẹ̌ niusẹ̌, hakịu i sie mẹ̌sul᷊e sol᷊om banuane sěsane, kụ sene i sie sarum pateěng.”

⁸Pěrwirang Asyurẹ̌ ene nakaěbạ habarẹ̌ u ratune sen naněntangu Lakhis dingangu seng kapẹ̌sẹ̌sekẹ e rimokạ soang Libna, tawẹ karaune wọu ene. Tangú rimal᷊engke pěrwira ene mědeạu mẹ̌sombangu ratu ene.

⁹Ratung Asyur seng nakatarimạu habarẹ̌ u wuntuangu Misirẹ̌ e suahạ u těmbonang i Tirhaka ratun Sudan, kạděntane mědeạu měngalo si sire. Ual᷊ingu ene, ratung Asyur něndingọ u surate si Hizkia ratung Yehuda.

¹⁰Kere ini waweran suratẹ̌ ene, ”Piawe kaakal᷊eng u kědon Duatanu pạngumbalaěngu ene u i kau e tawe manawo su l᷊imaku.

¹¹I kau e seng nakaringihẹ̌ u apam banua kụ nialoěngu mararatung Asyur, gagholokang marasai. Abe pangěnnau i kau kawe mal᷊iwirẹ̌!

¹²Su tempong i upungku něnggagholọ soang Gozan, Haran, dingangu Rezef, dingangu němate tau Eden kụ mạtanạ su Tilasar, tawẹ u sarang sěmbaụ bọu manga mahan duatan sire nakasal᷊amatẹ̌ si sire.

¹³Kai suapa mararatun soan Hamat, Arpad, Sefarwaim, Hena, ringangu Iwa?”

¹⁴I Hizkia rimaẹ suratẹ̌ ini e wọu manga rarolohang, kụ bọu ene i sie nẹ̌basa. Bọu ene i sie nakoạ sol᷊ong Bal᷊em MAWU, kụ něnurantungu suratẹ̌ ene su těngom MAWU,

¹⁵ mase nẹ̌kal᷊iomaneng, angkuěnge, ”MAWU, Ruatang Israel, kụ mạintol᷊ang su wowom manga kerub[22] e, i Kau Ruata man sěmbaụ mạngawasa kal᷊awọu kararatuang su wowon dunia e. Seng i Kau e něndiadi langị dingangu dunia.

¹⁶MAWU, mal᷊owọko rem mẹ̌kakělla měnsang apạe sen nariadi sutal᷊oarang kami. Daringihe wue kal᷊awọu l᷊ahinakangi Sanherib si Kau, Ruata kụ biahẹ̌!

¹⁷I kami kěbị e masingkạ MAWU, u mararatung Asyur seng namihua wansa mal᷊awọ dingangu něnggoghahẹ̌ kal᷊awọu wanuan sire.

¹⁸Manga mahan duatan sire e mal᷊aing nitutung dingangu nighoghahẹ̌, batụu manga mahan duata ene e mamben tawẹ kawasane apa. I sire tumbạen tul᷊ada wọu kalu ringangu watu koạ u taumata.

¹⁹O MAWU, Ruatang kami, pěllọko i kami e wọu l᷊iman tau Asyurẹ̌ ene, tadeạu kal᷊awọu wansa su dunia e masingkạ u samatang i Kau e Ruata.”

²⁰Bọu ene i Yesaya něndingọ u tatanata su Ratu i Hizkia u kere sasimbahe su kakal᷊iomaneng u ratu,

²¹MAWU e něhengetang, ”Soan Yerusalem kai liměgeng kau ringangu měmpẹ̌lẹ̌langehẹ̌ si kau, Sanherib.

²²I kau e masingkạ, i sai tangú rẹ̌dohangengu ringangu lẹ̌hinakanengu e? Iạ, Duatang Israel, Duata susi! Kai apạe kaobotẹ̌ i kau e si Siạ.

²³I kau něndingọ u rarolohang mědeạu pẹ̌taghunalang mohong u ual᷊ingkeng kal᷊awọu karetan sekẹ u e i kau seng nakawatạ manga wul᷊ude karangetange su Libanon. I kau e mětẹ̌těngkaobotẹ̌ u i kau e něnuwang manga kalun cěmarane kararangetange ringangu karal᷊ěnggihange ringangu mẹ̌tẹ̌tahatěpasu manga kěhune kaghaghahundungange.

²⁴I kau l᷊ai lụl᷊esạ u i kau e němangka pahighi, ringangu něnginung akẹ u kěbị banua raghị, mase manga sordadonu e měmpěnahida Sal᷊ụ u Nil sarang nal᷊ěsa.

²⁵Kai wědang tanakạdingihẹ̌ i kau u kěbị ene sen Takụ nihingidẹ̌ deng kal᷊imona? Kụ orasẹ̌ ini e Iạ e mẹ̌kẹ̌karadiahang ene. Seng Iạ e něngonggọu kawasa si kau mědeạu měnggagholọ kal᷊awọu soa piạ těndạe makoạ manga ěnnạ e.

²⁶Taumata apam měmpẹ̌tẹ̌tanạ sene tawe makakoạ apa; i sire himěkosẹ̌ dingangu něngkatakụ. I sire mẹ̌sul᷊ungu rěmpugẹ̌ su wimbaenge arau rěmpugẹ̌ kụ timuwo su atụ u wal᷊e, nahěgu kereu tiukangu anging u raki matětị.[23]

²⁷Kaiso Iạ masingkạ u kěbị mạanum batangengu. Iạ masingkạ u apa kẹ̌koatengu ringangu makoạ sol᷊ong apa i kau.

²⁸Iạ masingkạ u i kau e limangehẹ̌ marasai si Siạ, kụ Iạ e sen nakaringihẹ̌ kal᷊aobotu ene. Orasẹ̌ ini e Takụ sangetangu kakaị su irungu ringangu tal᷊i wawol᷊eng su mohongu, tadeạu i kau Takụ bol᷊engang mapul᷊ẹ lumiu ral᷊eng nạung niliuangu su tempong i kau riměnta.”

²⁹I Yesaya mal᷊aing něndingọ u tatanata ini si Hizkia, ”Seng ini e makoạ tatiala si kau. Taung ini ringangu taung damahi taumata sarung mahungkaěng gandung kụ timuwo hala. Arawe mal᷊iung ene i sire makasuang gandung dingangu anggorẹ̌ dingangu makateěng lai wuane.

³⁰Tau Yehuda kụ bědam biahẹ̌ e sarung tumei kere sasuang kụ hamụ e maral᷊ung-dal᷊ung kụ mẹ̌bẹ̌bua.

³¹Su Yerusalem dingangu su wowong Bul᷊udu Sion sarung piạ taumata masal᷊amatẹ̌, batụu MAWU e seng nẹ̌tilakehẹ̌ u hal᷊ẹ̌ ene e sarungbe mariadi.

³²Seng ini e piněhengetangu MAWU mạanun datung Asyur: ’I sie sarung tawe sumuẹ̌ su Yerusalem arau měngěnạu papitị mẹ̌timona soa ene. Apan sordado piạ kěllunge tawẹu humaung soa ene, ringangu su soa ene nangělikụ e tawe pětikang tatěndạu pěngaloěng.

³³Datung Asyur sarung mẹ̌sul᷊e lumiu ral᷊eng niral᷊engange piạ diměnta, tawe lumiu soa ene. Iạ e kai MAWU, sen něhengetang.

³⁴Soan Yerusalem Takụ tatawangeng dingangu Takụ ěllungang baugu kawantugẹ̌-Ku e samatang, dingangu waugu kědo-Ku e ringangu ěllang-Ku e i Daud.’ ”

³⁵Sěhěbi ene lai Malạekatu MAWU e riměnta su pẹ̌darasengangu tau Asyur, ringangu němate mahasụ ual᷊um pul᷊o l᷊ima hiwu su kataune sordado. Sěngkarịěllone mal᷊uka-l᷊ukadẹ̌ manga maietʼi sire e nẹ̌sal᷊iawuhẹ̌.

³⁶Tangú simohọ e i Sanherib datung Asyur kụ napul᷊ẹ sol᷊ong Niniwe.

³⁷Piạ sěhěllo, piạ i sie kapěkẹ̌kal᷊iomanenge su ral᷊ungu wal᷊em pananěmbaěng mahan duata Nisrokh, i sie nipatem peda kahiang Adramelekh dẹ̌duan Sarezer, manga ahuse. Wọu ene i sire nahuntal᷊ang sol᷊om banuang Ararat. Tangú i Esarhadon, ahuse lai wal᷊ine, naratu něngaweng si sie.