Read Sangir MANGA RATU KARUANE 2 Bible Online

MANGA RATU KARUANE 2 - Sangir bible

MANGA RATU KARUANE 2

¹Nịdatingke tempone MAWU e něhengkẹ i Elia sol᷊ong sorga ringangu angingu rimpul᷊usẹ̌. Su tempo ene i Elia rẹ̌duang Elisa e seng nẹ̌buạ bọu Gilgal,

²kụ sutal᷊oaran dal᷊eng i Elia nẹ̌bera si Elisa, ”Katanạ e sini. Iạ kai nirolohu MAWU apạkakoạ sol᷊ong Betel.” Kaiso i Elisa e simimbang, ”Su arengu MAWU e kụ biahẹ̌ dingangu waugu niawan Tuang, iạ e tawe maněntang i Tuang.” Tangú i rẹ̌dua e měngkate sěngkaral᷊eng sol᷊ong Betel.

³Nabi sěnggal᷊ipoho kụ mạtanạ sene tamai nẹ̌sombang i Elisa ringangu nakiwal᷊o, ”I kau e masingkạ u su sahěllo ini i tuangu e sarung maněntang i kau watụ u kai sapuakeng u MAWU e?” ”Ore, iạ masingkạ,” angkuěng i Elisa. ”Kaiso walạekere, tawahal᷊uasu mahumbisarang ene.”

⁴Bọu e nẹ̌berạe i Elia si Elisa, ”Katanạ e sini, iạ e nirolohu MAWU apạkakoạ sol᷊ong Yerikho.” Kai i Elisa e simimbang, ”Su arengu MAWU e kụ biahẹ̌, dingangu waugu niawan Tuang, iạ e tawe maněntang i Tuang.” Bọu e irědua naněpasen daral᷊eng i rẹ̌dua e sol᷊ong Yerikho.

⁵Nabi sěnggal᷊ipoho kụ mạtanạ sene rimal᷊eng kụ nẹ̌sombang i Elisa e kụ nakiwal᷊o, ”I kau e masingkạ, u su sahěllo ini e i tuangu kawe sarung ipakahengkẹ u Ruata kụ maněntang i kau e?” ”Ore, iạ masingkạ,” angkuěng i Elisa. ”Kai kuhạe, tawahal᷊uase i kitẹ mahumbisarang ene.”

⁶Bọu e nẹ̌berạe i Elia si Elisa, ”Katanạ e sini. Iạ nirolohu MAWU apạkakoạ sol᷊ong Sal᷊ụ u Yordan.” Kaiso i Elisa e simimbang, ”Baugu MAWU kụ biahẹ̌ dingangu waugu niawan Tuang, iạ e tawe maněntang i Tuang.” Tangú i rẹ̌dua e naněpaseng daral᷊eng sol᷊ong Sal᷊ụ u Yordan,

⁷dingangu nabi i sire limam pul᷊o su kataune timol᷊e si rẹ̌dua. Bọu e i Elia rěduang Elisa e něngirul᷊e su wiwihu sal᷊ụ, kụ nabi i sire limam pul᷊o su kataune ene e, rimarisị tawẹ kararaune wọu ene.

⁸I Elia e něluạ e kakingkaenge, bọu e nirul᷊unge kụ nipěpele su wowong akẹ u sal᷊ụ ene. Tangú akẹ u sal᷊ụ e napahiạ darua, kụ i sie rẹ̌duang Elisa e nakaral᷊eng su wal᷊ahuange mamara.

⁹ Nahumpạ e su sěmběkane, i Elia nẹ̌bera si Elisa, ”Pẹ̌dorongke apang ilẹ̌ěnningu wọu iạ kal᷊amonang iạ e ihengkẹ u MAWU ringangu maněntang i kau e!” I Elisa simimbang, ”Ěkingke si siạ kawasan Tuang, tadeạu iạ e makaawengbe[2] si Tuang.”

¹⁰”Uh, ene e kai hal᷊ẹ̌ mawěhạ kahěngang,” angkuěng i Elia. ”Kai kamagengu i kau e makasilo si siạ su tempong iạ e nihengkẹ u MAWU, dorongu e sarumbe takụ daringihang. Kereu i kau e tawe makasilo, dorongu e tawe itarimạ.”

¹¹Apidu kạdal᷊enge, i rẹ̌dua e mang kạpahumbisarane. Sěngkělěndịu piạ kareta putung sěmbaụ lẹ̌hiudang u kawal᷊o piạ putunge riměnta naměta si rẹ̌dua e, kụ bọu ene i Elia e nihengkẹ u rimpul᷊usẹ̌ sol᷊ong sorga e.

¹² I Elisa e nakasilo kụ nẹ̌kiạ u, ”Elia, Tuangku! Tuangku! Měngangěllung Israel matoghasẹ̌! I tuang sen tadịe!” Tangú nailangke i Elia e wọu silom matang Elisa e. I Elisa e nasusạ e naunge kụ namẹ̌kase kakingkaenge nakoạ darua,

¹³mase němurụ e kakingkaeng i Elia nanawo. Bọu ene i sie nẹ̌sul᷊e kụ dimarisị su wiwihu Sal᷊ụ u Yordan,

¹⁴kụ němahesu kakingkaeng i Elia e su wowong akẹ kapẹ̌berane u, ”Kai suapa MAWU Ruatang Elia e?” Bọu ene i sie němahesu kakingkaeng ene su akẹ u sal᷊ụ ene, kụ akẹ e napahiạ darua kụ i sie nakakaral᷊eng sol᷊ong sěmběka.

¹⁵Nabi i sire limam pul᷊o su kataune su Yerikho ene nakasilo, kụ nẹ̌bera, ”Kawasang Elia e seng naal᷊ing si Elisa!” I sire nahunděnta su anune, kụ bọu ene nẹ̌tumpěkuhẹ̌ su těngone,

¹⁶kụ nẹ̌bera, ”I kami e kai limam pul᷊o su kataune, kěbị e matatoghasẹ̌. Ual᷊ingu ene, wọete i kitẹ tamai mẹ̌deạ si Elia i tuangu. Aramanung Rohkẹ̌ u MAWU e seng nẹ̌bawa si sie sol᷊ong bul᷊ude arau wal᷊ane, kụ nitěntange sene.” ”Balạete!” angkuěng i Elisa.

¹⁷Kaiso i sire měngkate lai měnẹ̌nahonsang tadeạu i sie kumire wue. Tangú rimal᷊engke nabi i sire limam pul᷊o e nẹ̌deạ si Elia karěngụu těllu ěllo, kaiso i sire tawe nẹ̌sombang.

¹⁸Mase i sire nẹ̌sul᷊e su anung Elisa kụ kạpangampal᷊e su Yerikho. ”Kai wal᷊inewe iạ seng bọu nẹ̌bera tangú, u i kamene manịeng tawe tamai?” angkuěng i Elisa e si sire.

¹⁹Pirang katau wọu Yerikho riměnta su anung Elisa kụ nẹ̌bera, ”Tuang, kerẹewe seng nikasilon Tuang hala, u soa ini e mal᷊ěnggihẹ̌, kaiso akẹ e ral᷊akisẹ̌ dingangu makạdiading manga wawine piạ kapapia e, kẹ̌kaondol᷊ang.”

²⁰”Al᷊akeko lainumang diọ buhu e,” angkuěng i Elisa, ”kụ tahoing asing su ral᷊unge.” Tangú i sire nẹ̌bawạ e apan nirorongang e si sie.

²¹Bọu e rimal᷊engke i Elisa e sol᷊ong simbul᷊u akẹ kụ bọu ene nẹ̌taho e asing su ral᷊ungu akẹ dingangu nẹ̌bera, ”Seng ini e piněhengetangu MAWU: ’Iạ e mapakatilangu akẹ ini e tadeạu seng tawe saụ makapate ringangu piạ u mạngondol᷊ẹ̌!’ ”

²²Nanětạ bọu tempo ene, natilangke akẹ ene kerẹewe su manga wawerang Elisa.

²³Bọu ene rimal᷊engke i Elisa e wọu Yerikho sol᷊ong Betel. Sutal᷊oaran dal᷊eng piạ manga rariọ sěnggal᷊ipoho nahunsěbang bọu soa kụ měmpělẹ̌langehẹ̌ si sie. ”Ei rol᷊ohẹ̌, ei rol᷊ohẹ̌ pěmehọe wọu ini e!” kakiạ i sire.

²⁴I Elisa e nẹ̌bihụ e kụ němanda si sire mase nẹ̌salun sire su arengu MAWU. Tangú su orasẹ̌ ene lai piạ e běruang bawine rarua nahunsěbang bọu kěhu e něnggaghonaị manga rariọ i sire ěpạ u pul᷊o dua su kataune wọu manga rariọ ene.

²⁵I Elisa e nanẹ̌pasen daral᷊enge sol᷊ong Bul᷊udu Karmel, mase nẹ̌sul᷊e sol᷊ong Samaria.