Read Sangir MANGA RATU KARUANE 20 Bible Online

MANGA RATU KARUANE 20 - Sangir bible

MANGA RATU KARUANE 20

¹Su kanandun tempo ene Datu i Hizkia piạ sakị e wisul᷊ẹ̌ matědụ-tědụ hakịu maranim mate. Nabi i Yesaya anạ i Amos nẹ̌tiwo si sie kụ nẹ̌bera, ”MAWU e timanata tadeạu i Tuang e apẹ̌gěngganapẹ̌ kěbị urusang, batụu i Tuang tawe maul᷊e wọu sakị. Tawẹ kararěnane i Tuang mairị.”

²I Hizkia něbihu sol᷊ong meselẹ̌ bọu e nẹ̌kal᷊iomaneng,

³”MAWU, tahěndungeko u iạ ini e sem bọu nẹ̌tangkiang si Kau ringangu satia ore lai katul᷊idu naung. Iạ měngkate masau mẹ̌tawakal᷊i tụtuhụ kapulunʼU.” Bọu e i Hizkia e simangị dingangu lụl᷊ahunsusa.

⁴I Yesaya něněntang i Hizkia, kai těntal᷊ang i sie tawe simẹ̌sěbang bọu rělahu istana tal᷊oarane, MAWU e rimolohʼi sie

⁵pẹ̌sẹ̌sul᷊e sol᷊ong anung Hizkia, datung umatu MAWU, ringangu apạul᷊ịu tatanata ini, ”Iạ e MAWU, Ruata sẹ̌sěmbaěng i Daud i upungu, seng nakaringihẹ̌ kakal᷊iomanengu ringangu nakasilo ěllom matanu. Iạ e sarung mapakapiang kau; karumahing i kau sarung makoạ sol᷊om bal᷊e-Ku.

⁶Iạ e hědong měnamba umburu mapul᷊o l᷊ima su taunge lai. I kau ringangu soan Yerusalem sarung Takụ ipěllọ bọu ratung Asyur. Soa ini sarung Takụ ěllungang baugu kawantugẹ̌-Ku e samatang, dingangu waugu kědo-Ku e ringangu ěllang-Ku e i Daud.”

⁷Mase i Yesaya něngoro taumata piněměhụ buang ara wọu e pinakiwuhane su wisul᷊u ratu tadeạu i sie mul᷊e.[24]

⁸Datu i Hizkia e nakiwal᷊o, ”Kaia tatialane u MAWU sarung mapakapiang iạ dingangu karumahing iạ seng makarěnta sol᷊ong Bal᷊em MAWU kapia?”

⁹I Yesaya simimbang, ”MAWU sarung měngonggọu tatiala si Tuang, u i Sie něngganapẹ̌ kědo-Ne. Kụ ini e, sudẹ e kapulun Tuang: kěngkau su rarahungu orasu matangěllo koạ u Ratu i Ahas timol᷊ọ mapul᷊ong kěhị arau simohọ mapul᷊ong kěhị?”

¹⁰I Hizkia nẹ̌bera, ”Waugu mẹ̌koạ kěngkau ene tumol᷊ọ mapul᷊ong kěhị, hal᷊ẹ̌be mal᷊owọ. Ual᷊ingu ene apasohọko i sie e mapul᷊ong kěhị.”

¹¹I Yesaya nẹ̌kal᷊iomaneng su MAWU mase MAWU nẹ̌koạ e kěngkau ene nisohọ mapul᷊ong kěhị su rarahungu orasu matangěllo ene.

¹²Su sěnggaul᷊u tempo ene ratum Babel, nạung i Merodakh-Baladan anạ i Baladan, nakaringihẹ̌ Datu i Hizkia wuhu kapapia wọu sakị e. Tangú i sie rimolohu taumata apẹ̌bẹ̌bawa suratẹ̌ dingangu poroseěng su Ratu i Hizkia.

¹³I Hizkia něněnsomahẹ̌ manga rarolohang ene kụ něnodẹ si sire u kal᷊awọu kakakalạ e, wul᷊aeng dingangu sal᷊aka, manga rampa ringangu l᷊ana mawěngi, ringangu kal᷊awọu apal᷊iwụ u sordadone. Tawẹ manga apa su istana ringangu su kạguwạu kararatuange kụ tawe nịtodẹ si sire.

¹⁴Bọu ene Nabi i Yesaya nẹ̌těngon Datu i Hizkia kụ nakiwal᷊o, ”Wọu apa i sire ene? Apa waweran sire?” I Hizkia simimbang, ”I sire wọu Babel, banua kụ marau.”

¹⁵”Apạe nikasilon sire su istana?” i Yesaya nakiwal᷊o kapia. ”Kěbị-kěbị e!” angkuěng i Hizkia. ”Tawẹu sarang sěmbaụ arětạ su ral᷊ungu istana kụ tawe takụ niapasilo si sire.”

¹⁶Mase i Yesaya nẹ̌bera su ratu, ”u MAWU e něhengetangu

¹⁷ sarung piạ tempone kal᷊awọu kakakalạ su ral᷊ungu istananu ringangu apan seng nitampung i upungu sarang ěllo ini, nihengkẹ sol᷊ong Babel. Tawẹu sarang matěntang.

¹⁸ Bọu anạ pulungu piạ u sarung al᷊akeng dingangu koateng sawohị u istana waugu pẹ̌tangkiang datum Babel.”

¹⁹Datu i Hizkia simimbang, ”Mapia l᷊ai angkuěng u MAWU seng nihabaru ene si siạ.” I sie simimbang kerene watụ u su tiněnnaku e: ”Asal᷊u kararatuangku e těbewe mal᷊enehẹ̌ dingangu maghighilẹ̌ karěngụeweng iạ biahẹ̌.”

²⁰Bẹ̌kene wal᷊ine mạanun Datu i Hizkia mạanung manga karadiahange mapapia su pẹ̌seketange, ringangu kereapa i sie nẹ̌koạ liwuạ e ringangu raral᷊engangu akẹ baugu maparal᷊engu akẹ sol᷊ong soa, kěbị e nịbawohẹ su ral᷊ungu bukẹ̌ u Wěkem Mararatun Yehuda.

²¹I Hizkia e nate, wọu e i Manasye anạ e naratu něngaweng si sie.