Read Sangir MANGA RATU KARUANE 22 Bible Online

MANGA RATU KARUANE 22 - Sangir bible

MANGA RATU KARUANE 22

¹ I Yosia umbure ual᷊u su taunge piạ i sie naratu su Yehuda, ringangu i sie nẹ̌parenta su Yerusalem, těllum pul᷊o ěsa su taunge karěngụ e. I ninange isẹ̌sẹ̌bạ si Yedida anạ i Adaya, wọu Bozkat.

²I Yosia nẹ̌koạko apa nakal᷊uasẹ̌ naungu MAWU. I sie tụtol᷊e sansahu Ratu i Daud i upunge, ringangu tụtuhụ kal᷊awọu titan Duata ringangu kạguwạu naunge.

³Datu i Yosia piạ tulị e waugu bansa arenge i Safan anạ i Azalya, pulung i Mesulam. Su taung kapul᷊o ual᷊une su parentan Datu i Yosia, ratu e něngonggọu parentane ini su tulị e ene, ”Dakọko kakoạ sol᷊ong anung Imang Mawantugẹ̌ i Hilkia su Wal᷊em MAWU e, kụ pẹ̌dorongko si sie, pěngonggọu laporangu kal᷊awọu roitẹ̌ seng nikomol᷊u manga imang mělẹ̌hal᷊ẹ̌ su tukadu sasuěkang sol᷊ong Bal᷊em MAWU.

⁵Oroko i sie pẹ̌gěllịu roitẹ̌ ene su manga mananahimata hal᷊ẹ̌ u pangangul᷊ị Bal᷊em MAWU. I sire harusẹ̌ mẹ̌pakẹ u roitẹ̌ ene waugu

⁶ pěmaehẹ̌ sewang manga basẹ̌ u kalu, tukang u wal᷊e, ringangu tukang u watu, ore lai pamělli kalu ringangu watu kụ bědang gausang.

⁷Manga mananahimata hal᷊ẹ̌ ene e matul᷊idẹ̌ kahěngang, kụ ta wahal᷊uasu pẹ̌dorongang laporangu roitẹ̌ bọu i sire.”

⁸I Safan něhabaru parentan datu si Hilkia, bọu e i Hilkia nẹ̌běke si Safan u i sie seng nakahombang bukẹ̌ u manga titam MAWU e su Wal᷊em MAWU. I Hilkia nẹ̌gěllịu bukẹ̌ ene si Safan, kụ i Safan nẹ̌basa.

⁹Bọu ene i Safan nẹ̌sul᷊e su anun datu kụ nělaporẹ̌ u roitẹ̌ nạung mạdaresọ su Wal᷊em MAWU e kai seng nial᷊ạ dingangu nisarakangu manga ěllangu ratu su manga měnanahimata hal᷊ẹ̌ u pangangul᷊ị Bal᷊em MAWU.

¹⁰Bọu ene i Safan nẹ̌bera, ”I Hilkia nẹ̌gěllịu bukẹ̌ ini e si siạ.” Bọu e i Safan nẹ̌basang bukẹ̌ ene su ratu.

¹¹Nakaringihe lohong bukẹ̌ ene, datu e něnggaghaghehẹ pakeange kahian susan naunge.

¹²Mase ratu nẹ̌parenta kere ini su Imang i Hilkia, i Ahikam anạ i Safan, i Akhbor anạ i Mikha, i Safan tulị u wansa, dingangu i Asaya lukadu ratu e:

¹³”Dakọ e pakiwal᷊o su MAWU waugu iạ dingangu waugu kal᷊awọu kawanuang Yehuda mạanung lohom bukẹ̌ ini e. MAWU e limangehẹ̌ si kitẹ ual᷊ingu i upung i kitẹ e tawe něndal᷊engu manga parenta mạbawohẹ su ral᷊unge.”

¹⁴Tangú rimal᷊engke i Hilkia, i Ahikam, i Akhbor, i Safan dingangu i Asaya, nẹ̌dorong nakipitua su tau wawine arenge i Hulda. I sie sěngkatau nabi mạtanạ su pẹ̌kakomol᷊ange wuhu su Yerusalem. Kawinge arenge i Salum anạ i Tikwa, pulung i Harhas; i sie měngangurusẹ̌ pakeangu kal᷊iomaneng su Wal᷊em MAWU. Ene i Hulda e nakaringihẹ̌ tatualagʼi sire,

¹⁵i sie rimolohʼi sire kapia sol᷊ong anun datu kụ něhabaru

¹⁶waweran MAWU ini: ”Iạ e sarung měhukungu Yerusalem dingangu kal᷊awọu kawanuane, kere mạbawohẹ su ral᷊ungu bukẹ̌ buhu, niwasan datu.

¹⁷I sire seng naněntangu Iạ dingangu mạnarakang u sasěmba su manga ruata wal᷊ine. Patikụ kẹ̌koateng i sire e makạsongkahẹ̌ dal᷊angehẹ̌-Ku. Iạ e limangehẹ̌ su Yerusalem, dingangu ral᷊angehẹ̌-Ku e tawe ikawul᷊ugẹ̌.

¹⁸Arawe mạanun Ratu i Yosia ute seng ini e tatanata-Ku, MAWU Ruatang Israel, ’Bọuteng i kau e nakaringihẹ̌ apa mạbawohẹ su ral᷊ungu bukẹ̌ ini e,

¹⁹i kau e mẹ̌sasěsilẹ̌ dingangu mẹ̌těngkasanạ u watangengu su těngo-Ku. Iạ e seng němal᷊ěndihu měhukung Yerusalem dingangu kawanuane. Iạ e sarung mapakariadin soa ene sěmbaụ papasilo makạtatakụ, dingangu areng Yerusalem sarung Takụ koateng areng laane. Kai su tempong i kau makaringihẹ̌ hal᷊ẹ̌ u papal᷊ěndihẹ̌-Ku ene e, i kau sarung sumangị dingangu měnggehẹ pakeangu tatialang naungu masusa. Iạ e seng nakaringihẹ̌ kakal᷊iomanengu,

²⁰ual᷊ingu ene hukumang baugu Yerusalem tawe Takụ inawo karěngụ u i kau e wedam biahẹ̌. I kau e sarungbe maněntangu dunia e su pẹ̌darame.’ ” Tangú němpẹ̌sul᷊ẹ e manga rarolohang ene e sol᷊ong anun datu kụ naul᷊ị u tatanata ene.