Read Sangir MANGA RATU KARUANE 24 Bible Online

MANGA RATU KARUANE 24 - Sangir bible

MANGA RATU KARUANE 24

¹ Su tempong pẹ̌paparentan Datu i Yoyakim, i Nebukadnesar datung Babel něnekẹ dingangu nakakaiang su Yehuda. Těllu taung karěngụ e i Yoyakim mẹ̌tẹ̌tumpěkuhẹ̌ su těngon Nebukadnesar, kaiso wọu ene i sie něnggohaeng.

²MAWU e něndolohu manga wuntuangu piạ aghide wọu anun tau Babel, Siria, Moab dingangu Amon mědeạu ipěndokạ si Yoyakim dingangu pěminasa Yehuda natuhụewe kere suapang pinẹ̌bera-Ne wọu manga mohongu manga nabi ěllangʼE.

³Hal᷊ẹ̌ ene mambeng hinong mariadi, watụ u MAWU e seng něhengetangu tau Yehuda e sarung iwembang bọu wanua kụ nighěllị u MAWU e si sire. I sire niwembang ual᷊ingu kal᷊awọu rosa kụ seng nikoạ u Ratu i Manasye;

⁴něngalembọete ual᷊ingu patikụ papate kụ nikoạ e waugu taumata kụ tawẹ sal᷊ane. MAWU e madiri mẹ̌gěllị u ampung si Manasye ual᷊ingu kal᷊awọu kakanoạ e ene.

⁵Kasěllahu wanua, wọu Sal᷊ụ u Efrat sarang pẹ̌saraěngu Misirẹ̌ sěmběkan sawěnahẹ̌ kụ nasowa wanua paparentaěngu ratum Misirẹ̌ e, nipẹ̌kawasaěngu ratum Babelẹ̌. Ual᷊ingu ene ratum Misirẹ̌ e tawẹ běke siměbang bọu wanuane kụ dumal᷊eng mẹ̌sekẹ. Běkene lai wal᷊ine mạanun Datu i Yoyakim niwohẹ su ral᷊ungu bukẹ̌ u Wěkem Mararatun Yehuda. Sarangke i Yoyakim napohongke, ute ahuse isẹ̌sẹ̌bạ si Yoyakhin naratu něngaweng si sie.

⁸I Yoyakhin umbure mapul᷊o ual᷊u su taunge piạ i sie naratu su Yehuda, ringangu i sie nẹ̌parenta su Yerusalem těllu wul᷊ang karěngụ e. I ninange arenge i Nehusta anạ i Elnatan, bọu Yerusalem.

⁹Mẹ̌sul᷊ungu i amange, i Yoyakhin mal᷊aing nẹ̌dosa su MAWU e.

¹⁰Su tempong parentang Yoyakhin, wuntuangu Babel kụ lẹ̌ahakeng u manga pěrwirang Nebukadnesarẹ̌ e timol᷊ọko něnekẹ Yerusalem, dingangu něliwung soa ene.

¹¹Těntal᷊ang soa ene lẹ̌liwungang, i Nebukadnesarẹ̌ hala e riměnta sol᷊ong Yerusalem,

¹² kụ Datu i Yoyakhin dingangu i ninange, manga anạ e, pěrwirane ore lai manga sawohị u istanane mědeạu pěnarakangu watangeng su těngon Datu i Nebukadnesar. Bọu e i Yoyakhin nitaweng. Hal᷊ẹ̌ ene nariadi su taung kaual᷊une su parentang Nebukadnesar.

¹³Kal᷊awọu apal᷊iwụ bul᷊aeng nikoạ u Ratu i Salomo waugu Wal᷊em MAWU e nigholang i Nebukadnesar. Bọu e kal᷊awọu sạbarang mal᷊aarěga kụ kaěbakeng su Wal᷊em MAWU ene ringangu su istana ihengkẹ e sol᷊ong Babel. Kěbị ene e nariadi natuhụewe kere seng piněhengetangu MAWU e kal᷊imona.

¹⁴ Datu i Yoyakhin, i ninange, manga kawinge, manga sawohị e ringangu manga těmbonangu Yehuda — kakěpal᷊e pitu hiwu su kataune apang matatěbone — nitaweng dingangu nihengkẹ sol᷊ong Babelẹ̌ e. Kerene lai apang mělahal᷊ẹ̌ e mapapande ringangu manga kipung i sire sěhiwu su kataune, kěbị e taumata matatoghasẹ̌ dingangu wawahani měmpẹ̌sekẹ. Taumata apang hěntong datu ringangu taumata apam pangahạ e mal᷊aing nihengkẹ sol᷊ong pinamembangeng — kal᷊awọe mapul᷊o hiwu su kataune. Maraning kěbị kawanuang Yerusalem nihengkẹ, kụ nal᷊ěmbe kate kawanua apang limembong kakasiange.

¹⁷ Bọu ene i Nebukadnesarẹ̌ e něhengkẹ i Matanya, i empong i Yoyakhin, naratu su Yehuda, kụ němal᷊ui arenge nakoạ i Zedekia.

¹⁸ I Zedekia umbure dua pul᷊o ěsa su taunge piạ i sie naratu su Yehuda. I sie nẹ̌parenta su Yerusalem mapul᷊o ěsa su taunge karěngụ e. I ninange isẹ̌sẹ̌bạ si Hamutal, anạ i Yeremia wọu soang Libna.

¹⁹Mẹ̌sul᷊ungu Ratu i Yoyakim, Ratu i Zedekia e mal᷊aing nẹ̌dosa su MAWU.

²⁰ MAWU e limangehẹ̌ tạ sihinge su kawanuang Yerusalem ringangu tau Yehuda e hakịu i Sie selain tawe mẹ̌papandung si sire.