Read Sangir MANGA RATU KARUANE 25 Bible Online

MANGA RATU KARUANE 25 - Sangir bible

MANGA RATU KARUANE 25

¹ Bọu ene i Zedekia něnggohaeng su těngon Nebukadnesar datung Babel. Ual᷊ingu ene i Nebukadnesar dingangu kal᷊awọu wuntuangu sekẹ e riměntạ kụ něnekẹ Yerusalem su tanggalẹ̌ kapul᷊one bul᷊ang kapul᷊one su taung kasione su parentang Zedekia. I sire něndarisị pẹ̌tatampungang su l᷊ikudu soa, němangung meselu pěngaloěng,

²dingangu turusẹ̌ něliwung soa ene sarang taung kapul᷊oěsane su parentang Zedekia.

³Su tanggalẹ̌ kasione wul᷊ang kaěpạ e su taung ene lai piạ hombang u karal᷊unusẹ̌ seng kereng katědụ e hakịu kawanua e sen tawẹ apa wiahʼi sire sarang kadodọ-dodọ,

⁴ meselu soa e nitěnehu rokạ. Sěhěbi ene, maningbe tau Babelẹ̌ e kạpěngalone soa e, kal᷊awọu sordadong Yehuda e timal᷊angu wadang i sire nẹ̌timona Wal᷊ang Yordan. I sire něngal᷊ạ dal᷊eng limiu rahaming istana, mase siměbang bọu tukadu pasěllangeng piněhakitang u meselẹ̌ darua e su tampạ ene.

⁵Kai sordadong Babelẹ̌ e něnahusu Ratu i Zedekia, kụ nisamẹ su wal᷊ang Yerikho. Kal᷊awọu taumatane nahuntal᷊ang i sie.

⁶Bọu ene Ratu i Zedekia niparingang sol᷊ong anun Datu i Nebukadnesar su soang Ribla, mase nipangěnsakengu hukumang papate.

⁷ Manga anạ e nipate kụ matane hala makạsilo. Bọu ene i Zedekia niloẹ matane, wọu ene nihapusẹ̌ kụ niwawa sol᷊ong Babel.

⁸Su tanggalẹ̌ pitu wul᷊ang kal᷊imane su taung kapul᷊o sione su parentan Nebukadnesar datum Babel, riměntạ e sol᷊ong Yerusalem sěngkatau arenge i Nebuzaradan. I sie kai měnanasa ringangu mol᷊ensekẹ u sordadong Nebukadnesar.

⁹ I Nebuzaradan něnutung Bal᷊em MAWU, istanan datu, ringangu wal᷊eng kěbị taumata apang matatěbone su Yerusalem.

¹⁰Mase kal᷊awọu taumatane něněnehẹ̌ kal᷊awọu meselu soa e.

¹¹Bọu ene kawanua apang bědang ene su soa, kụ kai apang masasingkạ u hal᷊ẹ̌[27] nal᷊ěmbe, apang kasiang, apang nahuntal᷊ang bọu anun tau Babel, kěbị e nihengkẹ sol᷊ong Babel kahiang Nebuzaradan.

¹²Arawe sěmbahageang bọu kawanua kasigěsakenge ringangu tawẹ apa arětạ nitěntange su Yehuda ringangu niorone pinẹ̌hal᷊ẹ̌ baelu anggorẹ̌ e ringangu manga rahami.

¹³ Manga rihi wěmbingu sal᷊aka ringangu timběha e ringangu manga kareta su Wal᷊em MAWU ringangkewe laim manga wěnsadẹ̌ běmbingu kaugu sal᷊aka timběha e nịbawawěkan tau Babel, mase patikụ apang běmbing u kal᷊aukange nihengkẹ kěbị sol᷊ong banuan sire.

¹⁴ I sire mal᷊aing němpěhengkẹ manga apal᷊iwụ tamai ini: sikopẹ̌, tampạ u awung pananěmbaěng, manga sol᷊o padamara, manga lainumang pěnanampungang dahang binatang nipotọ baugu sasěmba, manga lainumang baugu pěnanutungang kamania, ringangu kal᷊awọu apal᷊iwụ běmbingu kal᷊aukangu sal᷊aka ringangu timběha wal᷊ine apang nipakẹ baugu tundung pẹ̌kakal᷊iomaneng.

¹⁵Apal᷊iwụ bul᷊aeng dingangu sal᷊aka e, nasowa l᷊ai manga lainumang darodọ dingangu manga lamạ u tětuhẹ̌ e nial᷊ạ i Nebuzaradan hala.

¹⁶Apal᷊iwụ běmbingu kal᷊aukangu sal᷊aka ringangu timběha e nikoạ u Ratu i Salomo waugu Wal᷊em MAWU kụ kai rihi rarua, manga kareta, ringangu wěnsadẹ̌ gẹ̌guwạ, kěbị e enẹ e mawěhạ hakịu tawe matimbang.

¹⁷Dihi rarua wěmbing ene e mẹ̌sul᷊ung dangẹ e ual᷊u meterẹ̌ dingangu tatěmbọu rihi wěmbingu sal᷊aka ringangu timběha e karangẹ e 1,3 su metere. Su apang tatěmbọu rihi mạngělikụ e piạ anangu ral᷊ěgahẹ̌ buan delima wěmbingu kal᷊aukangu sal᷊aka ringangu timběha.

¹⁸Su l᷊iung ene, i Nebuzaradan, něnamẹ Imang Mawantugẹ̌ i Seraya, i Zepanya imang timbange, těllung katau l᷊ukadu tukadu Wal᷊em MAWU, i sire lima měnanasa watangengu ratu apam bědang ene su soa, mol᷊ensekẹ, tumatimbangu mol᷊ensekẹ měngangurusẹ̌ hal᷊ẹ̌ u pěmamohekangu sordado, ringangu těmbonange wal᷊ine e i sire ěnnungu pul᷊o su kataune.

²⁰I sire ene kěbị e niwawane su anung Datu i Nebukadnesar su soang Ribla,

²¹su wanuang Hamat. Sene i sire nitingkaitang mase nipate. Kerene tau Yehuda e nihengkẹ bọu wanuan sire ringangu niwawa sol᷊ong pinamembangeng.

²² Bọu ene Ratu i Nebukadnesar něhengkẹ i Gedalya anạ i Ahikam dingangu pulung i Safan, nakoạ guběrnurẹ̌ su Yehuda waugu mẹ̌parenta patikụ su taumata apam bědang měmpẹ̌tẹ̌tanạ paị sene.

²³Piạ e manga pěrwira ringangu manga sordadong Yehuda e apan den tawe nẹ̌tumpěkuhẹ̌ su Babelẹ̌ e nakaringihẹ̌ hal᷊ẹ̌ u pělahengkẹ ene e, i sire kěbị e němpẹ̌děnta su anung Gedalya su Mizpa. Manga pěrwira ene ute i Ismael anạ i Netanya, i Yohanan anạ i Kareah, i Seraya anạ i Tanhumet bọu soan Netofa, ringangu i Yazanya wọu soang Maakha.

²⁴Nẹ̌berạ e i Gedalya si sire kěbị, ”I kamene tawe hinone matakụ u manga mapapangkatu těmbonangu kawanuang Babel. Měngkate katanạ su wanuang kitẹ ini e ringangu kakoạ e ěllang u ratung Babel. Iạ masingkạ u i kamene sarung masal᷊amatẹ̌.”

²⁵ Arawe su wul᷊ang kapitune su taung ene e, i Ismael anạ i Netanya ringangu pulung i Elisama e kụ bědang hiten datu, rimal᷊eng dingang i sire mapul᷊ong katau sol᷊ong Mizpa. I sire něnekẹ dingangu němate si Gedalya ringangu tau Yehuda ore lai tau Babel kụ deng bědang dingangi Gedalya sene.

²⁶ Tangú patikụ kawanuang Yehuda, kalạ arau kasiang, sěngkaral᷊eng dingangu manga pěrwira e němpẹ̌tal᷊ang sol᷊ong Misirẹ̌ ual᷊ingu mạtakụ su tau Babelẹ̌ e.

²⁷Su tanggalẹ̌ duam pul᷊o pitu su wul᷊ang kapul᷊o duane su ral᷊ungu taung katěllum pul᷊o pitune samuring Yoyakhin nihengkẹ sol᷊ong piněmembangeng, i Ewil-Merodakh naratu su Babel. Su taung ene lai i sie něnodẹ u kakěndage si Yoyakhin dingangu něměllọ i sie wọu tahungkụ,

²⁸dingangu nẹ̌koạ si sie mapia. I Yoyakhin nighěllirangu kal᷊aianenge limembong karangẹ e wọu manga ratu wal᷊inẹ e kụ mal᷊aing niwembang sol᷊ong Babel.

²⁹I Yoyakhin tawe lai něpakẹ u pakeangu tahungkụ dingangu wiasane kụkaěng su istana ringangu ghẹ̌gěllirangu roitẹ̌ baugu pandungangu wiahe.