Read Sangir MANGA RATU KARUANE 3 Bible Online

MANGA RATU KARUANE 3 - Sangir bible

MANGA RATU KARUANE 3

¹Su taung kapul᷊o ual᷊une su parentan Yosafat datung Yehuda, i Yoram ahusi Ahab nakoạ datung Israel kụ nẹ̌parenta su Samaria mapul᷊o dua su taunge karěngụ e.

²I sie mẹ̌kẹ̌koạ dal᷊akisẹ̌ su matam MAWU, kaiso i sie tawe kere karal᷊akisʼi Ahab dẹ̌duang Izebel, gaghurange. Tul᷊ada nạung nikoạ i amange ipěnal᷊e su Baal ute seng nịgaghoghahe.

³Kaiso kerẹewe Ratu i Yerobeam ahusʼi Nebat kụ nẹ̌parenta kal᷊amonang sie, i sie mal᷊aing nakakariadin tau Israel nẹ̌dosa kụ tawe nangědo nẹ̌koạ ene.

⁴Datu i Mesa wọu Moab piạ domba lẹ̌hikinange. Nakoạ pajakẹ̌ su ratung Israel, ute apan taung i sie mẹ̌gẹ̌gěllịu mahasụ su hiwune anạu domba esẹ dingangu l᷊ai dukụ u romba esẹ bọu mahasụ su hiwune.

⁵Kai sarangke Ratu i Ahab nairị, i Mesa e něnggolaha waugu Israelẹ̌ e.

⁶Ual᷊ingu ene Ratu i Yoram apidu lighạ naněntangu Samaria ringangu rimal᷊eng něndiahing kal᷊awọu wuntuangu sekẹ e.

⁷I sie něndohong habarẹ̌ kere ini su Ratu i Yosafat bọu Yehuda, ”Datum Moab seng něnggohaeng si siạ; botonge i kau mẹ̌sekẹ dingangku rumokạ si sie?” ”Kerenẹ e,” angkuěngu Ratu i Yosafat. ”Iạ dingangu manga taumataku ore lai wuntuangku piạ kawal᷊one sarung tumol᷊e ringangu.

⁸Kụ kai lumiu ral᷊en sude i kitẹ e sarung měngalo?” ”I kitẹ měngal᷊ạ dal᷊eng lumiu kěhu l᷊ingging Edom,” angkuěng i Yoram.

⁹Tangú nẹ̌buạ e Ratu i Yoram dingangu ratu i Yehuda ringangu ratung Edom. Bọuten němpẹ̌dal᷊eng karěngụu pitu ěllo, i sire e kinasuengu akẹ, kụ buntuang i sire ringangu binatang měmamikul᷊ẹ̌ apal᷊iwụ i sire e tawe nakapěnginung.

¹⁰”Silakạ bue si kitẹ e!” angkuěngu Ratu i Yoram. ”MAWU e seng něhingidu waugu měnarakang i kitẹ těllu su ratum Moab!”

¹¹Datu i Yosafat nakiwal᷊o, ”Apa sini e kai tawẹ apa nabi kụ makakiwal᷊o su MAWU waugʼi kitẹ e tangú?” Sěngkatau wọu manga pěrwira wọu sordadon Datu i Yoram simimbang, ”Piạ i Elisa anạ i Safat! I sie nạung kal᷊imona e kai tumatimbang si Elia e.”

¹²”Kahěngang! MAWU e mamben nẹ̌bisara limiun sie,” angkuěngu Ratu i Yosafat. Tangú rimal᷊engke ratu i sire těllu ene sol᷊ong anung Elisa.

¹³”Unụ e nakitul᷊ung si siạ?” angkuěng i Elisa su ratung Israel. ”Dakọe kakoạ sol᷊ong anung manga nabi ghaghurangu!” ”Tala!” angkuěng i Yoram. ”Batụu kai MAWU něhingidu něnarakang i kami těllu su ratum Moab.”

¹⁴I Elisa simimbang, ”Baugu MAWU kụ biahẹ̌ e takụ tẹ̌tangkianeng, iạ maul᷊ị dingangu mal᷊ahẹ u kai manga wal᷊inewe ual᷊ingu Ratu i Yosafat takụ lẹ̌lahunggeětang, iạ e tawe miwawal᷊ing Tuang.

¹⁵Kụ ini e paringangko ramahi sěngkatau měnanalangu kěcapi.” Ené tau ene kạpangobị e kěcapine, i Elisa e nipal᷊ohoěngken Rohkẹ̌ u MAWU,

¹⁶hakịu i sie nẹ̌bera, ”Kai ini e piněhengetangu MAWU: ’Koạko manga soěnge su sal᷊ụ mamara[3] ini.

¹⁷Manilaing i kamene tawe nakasilo tahiti rimasehẹ̌ arau anging timiụ, kaiso akẹ e sarung mạhěmpal᷊iu su sal᷊ụ mamara ini. I kamene ringangu binatang lahikinang ore lai binatang nakoạ mělahuwo apal᷊iwụ i kamene e sarumbe makahombang akẹ mal᷊awọ dingangu makapanginungbe sarang masahe-sahe.’ ”

¹⁸Mase angkuěng i Elisa tuhụe, ”Kai ene e kětạembeng hal᷊ẹ̌ kadodọ su MAWU e. I Sie sarung lai měngonggọu watạ si kamene su tau Moab.

¹⁹Kal᷊awọu soan sire piạ bentenge ringangu maral᷊ěnggihẹ̌ e sarung gagholokang i kamene; kal᷊awọu kakaluang měbẹ̌bua e tuwangeng i kamene, kal᷊awọu simbul᷊u akẹ e masue sěnsingang i kamene, dingangu kal᷊awọu rahamin sire matatuwo e sarung bahungangu watu kahiang kamene e sarangkewe maghagholọ-golọ.”

²⁰Sěngkarịěllone, su tempong maněmbang sasěmba mal᷊ukadẹ̌ e, nelehe akẹ bọu sěmběkang Edom kụ mamenẹewe sal᷊ụ mamara[4] e.

²¹Piạ e tau Moab nakaringihẹ̌ u ratu tatěllu ene e seng něngkarěntạ měngalo e, tangú patikụ taumata e — bọu kaghurangenge sarang kangudakenge — kụ makasaghěnggelẹ̌ aghidẹ̌ e, nasue nipahunsěbang kụ nipěllọ su pẹ̌saraěng.

²²Sěngkariọěllone, piạ i sire němpẹ̌bangung mal᷊ukadẹ̌, matangěllo e nanualage wowong akẹ, hakịu nikasilo mahamụ kere raha.

²³I sire němpěmansagẹ̌, ”Daha! Nal᷊ahẹ u manga sordado bọu wuntuangu manga sekẹ těllung kamonaěng ene e seng němpẹ̌kakoka kụ seng němpẹ̌papate! Bọete i kitẹ tamai měhampasẹ̌ pẹ̌darasengang i sire!”

²⁴Kai piạ e tau Moab ene nahumpạ u pẹ̌darasengang ene, i sire nisokohe kahian tau Israel kụ měngkate tụtol᷊ọ měmpanahusu kạpẹ̌matene si sire

²⁵ringangu něnggoghahẹ̌ manga soan sire. Apang dahami matatawa sẹ̌saheěng i sire e masueng berenge ringangu watu. Pangěnsueěnge kal᷊awọu rahami e něngkatukusu manga watu. Tau Israel mal᷊aing naněnsing kal᷊awọu simbul᷊u akẹ dingangu něnuwang kal᷊awọu kakaluang měbẹ̌bua. Nal᷊ěmbe kate soang Kir-Hareset niupunangu soam Moab. Pangěnsueěnge soa ene mal᷊aing nital᷊iwungang dingangu niwerengu watu kahiang měmamahunge.[5]

²⁶Nakahěngangke u i sie sen tawe lai makararagẹ̌ e, tangú ratung Moab nẹ̌bawa sordado i sire pitu hasụ su kataune tahapilị, nẹ̌deạ dal᷊engu makasowa wọu riagạ u ratung Edom, kutẹu kai tawe nakakoạ.

²⁷Ual᷊ingu ene i sie něngal᷊ạ e ahusu ratune, bọu ene nisěmbane su wowong meselu soa nikoạ sasěmba waugu mahan duatam Moab. Tangú natakụ[6] e tau Israel, hakịu i sire něngul᷊e wuntuang u sekẹ i sire wọu soa ene bọu ene něngkapul᷊ẹ sol᷊ong banuan sire.