Read Sangir MANGA RATU KARUANE 4 Bible Online

MANGA RATU KARUANE 4 - Sangir bible

MANGA RATU KARUANE 4

¹Piạ sěhěllo bal᷊ung sěngkatau nabi nakoạ sol᷊ong anung Elisa kụ nẹ̌bera, ”Tuang, kawingku e nate! Dingangu i Tuang masingkạ u i sie mal᷊aing sěngkatau matuhụ su Mawu Ruata, kaiso i sie piạ utange su pẹ̌sěngkatau. Kụ ini e tau ene riměnta měngal᷊ạ anạku rarua e kụ koateng ěllang i sire nakoạ bawaehẹ̌ utangu wahakạ u kawingku.”

²”Kụ kai kereapa iạ makatul᷊ung si Wawụ?” angkuěng i Elisa. ”I wawụ e kai piạ apa su wal᷊e?” ”Tawẹ manga apa,” angkuěngu tau wawine ene, ”tabeạu katewe lanang zaitun sěmbotol᷊ẹ̌ kadodọ.”

³I Elisa nẹ̌bera, ”Dakọ e pěngědang botol᷊ẹ̌ tạ l᷊ohone sěngapang kakěpal᷊e wọu anung manga l᷊ampung i Wawụ.

⁴Bọu ene kěnangko i Wawụ dingangu manga anạ i Wawụ suẹ̌ su ral᷊ungu wal᷊e kụ pěhěping tukadẹ̌. Dal᷊ingko l᷊ana wọu wotol᷊ẹ̌ kạdodọ ene su manga wotol᷊ẹ̌ ene, ringangu haeko apang seng napenẹ.”

⁵Tangú napul᷊ẹ e tau wawine ene sol᷊ong bal᷊ene. Sarangke i sie ringangu manga anạ e nasuẹ̌ mase něhěping tukadu wal᷊e, i sie něngal᷊ạ e wotol᷊ẹ̌ kadodọ kụ piạ lohone lanang zaitun ene kụ něměmbingu l᷊ana ene su manga wotol᷊ẹ̌ kụ nionggọ u manga anạ e si sie.

⁶Sarangke něngkapenẹ botol᷊ẹ̌ ene kěbị, tangú i sie saụ nẹ̌dorong lai sěmbotol᷊ẹ̌. ”Seng nasue,” angkuěng u sěngkatau wọu tal᷊oarang manga rariọ ene. Tangu l᷊ana ene seng tawe saụ nelehẹ̌.

⁷Bọu ene i Wawụ ene saụ kapia nakoạ sol᷊ong anung Nabi Elisa, kụ i Elisa e nẹ̌bera, ”Bal᷊ụ e lana ene pěmaehẹ̌ kal᷊awọu utang i Wawụ, mase lěmbene kapapianẹ e waugu ipẹ̌biahʼi Wawụ dingangu manga anạ i Wawụ.”

⁸Su Sunem piạ sěngkatau wawine kalạ mạtanạ. Piạ su sěhěllo i Elisa nakoạ sol᷊ong Sunem, bawine ene nẹ̌gausẹ̌ kimaěng. Nanětạ bọu ene walạewe apang i Elisa makoạ sol᷊ong Sunem, i sie mang kumaěng su wal᷊eng tau wawine ene.

⁹Bọu ene nẹ̌berạ e tau wawine ene su kawinge, ”Iạ maiakingu i tuang kụ kạdingạ lụotong sini e mambeng těngadẹ̌ sěngkatau ěllangu Ruata.

¹⁰Mapiawe i kitẹ mẹ̌koạko kamarẹ̌ kạdodọ sěmbaụ su wowone rasị su wal᷊eng kitẹ e, kụ mase ipakasukụ u raral᷊okaěng, meda, kadera, ringangu sol᷊one tadeạu i sie makapẹ̌tanạ bue měngirul᷊e sene, suapang i sie makapẹ̌tiwo si kitẹ e.”

¹¹Piạ su sěhěllo i Elisa e saụ diměnta kapia su Sunem. Ene rimangengke i sie sol᷊ong kamare měngirul᷊e,

¹²i sie rimolohʼi Gehazi, mẹ̌tatangkiang si sie, pẹ̌kẹ̌kui tau wawine ene. Ene narěntạe tau wawine ene e,

¹³angkuěng i Elisa si Gehazi u, ”Pakiwal᷊oko si sie měnsang kereapa ral᷊enge iạ makawal᷊isẹ̌ saghedẹ̌ si kitẹ e? Aramanung i sie lụěnning u iạ sol᷊ong anun datu arau mol᷊ensekẹ u wuntuangu piạ aghide ringangu mahumbisarang hal᷊ẹ̌ u pandungange.” Tau wawine ene simimbang, ”Iạ e matanạ sutal᷊oaram balagẹ̌ku e kụ tawe kakawusangu apa.”

¹⁴Tangú nakiwal᷊ọe i Elisa si Gehazi, ”Mạeng kerene, kai apạ e takụ ikakoạ baugʼi sie?” I Gehazi simimbang, ”I sie e tawẹ anạ, Tuang, mase lai kawinge seng maghurang.”

¹⁵”Kuieko tau wawine ene,” angkuěng i Elisa. Bawine ene riměnta kụ dimarisị su tukadẹ̌.

¹⁶ Mase angkuěngu i Elisa e si sie, ”Taun damahi, su tempo kere ini, i Wawụ seng maningkul᷊u sěngkatau rariọ esẹ.” ”Tuang, abe pẹ̌konti!” angkuěng u tau wawine ene. ”I Tuang kai ěllangu Ruata arau ěng!”

¹⁷Kaiso mamben těngadẹ̌ pinẹ̌berang Elisa e. Taun tuhụ e, mangawe su tempo mẹ̌sul᷊ung kụ bawine e maiwantelu sěngkatau rariọ esẹ.

¹⁸Sarang dariọ ene nasaria, piạ sěhěllo su musungu pěmaměnsạ, dariọ ene tamai sol᷊ong anung amange pai su rahami ringangu manga měmaměnsạ.

¹⁹Sěngkělěndịu rariọ ene nẹ̌kiaratagẹ̌ si amange, ”Adu! Těmbọku e matědụ!” ”Tondako rariọ ini e su anun ninange,” angkuěng i amange su ěllange sěngkatau.

²⁰Dariọ ini e nitonda su anun ninange, kụ bọu e nisarul᷊un ninange. Ene nawawawěllọe rariọ e naněntangke.

²¹I ninange taraị něnapuạ dariọ sol᷊ong kamarʼi Elisa, mase niparal᷊okane su wowon tatikilang. Bọu e i sie siměbang kụ něhěping tukadẹ̌,

²²mase nẹ̌kui kawinge. I sie nẹ̌bera, ”Dolohẹ̌ko ěllang sěngkatau e aparamahi sol᷊ong ini, apasake kalide sěmbaụ. Iạ e harusẹ̌ mẹ̌bal᷊ikěkasẹ̌ makoạ sol᷊ong anun Nabi i Elisa, mase lighạ mẹ̌sul᷊e kapia.”

²³”Unụe harusẹ̌ dumal᷊eng ini?” kakiwal᷊ong kawinge. ”Ěllo ini e wal᷊inewe ěllon Sabatẹ̌ dingangu wal᷊inewe lai ěllom Bul᷊ang Buhu masaria.”[7] ”Tawẹ apa-apa,” angkuěnge.

²⁴Sarangke i sie něnakẹ e kal᷊aianeng su kalide ene e, i sie nẹ̌bera su manga mẹ̌tatangkiange, ”Apatal᷊angko kalide ene pakasahawụ-sahawụ; dingangu abe kědal᷊ẹ̌ sahawụ e mạengu tawe takụ ioro.”

²⁵Tangú nẹ̌buạ e tau wawine ene sol᷊ong Bul᷊udu Karmel su tampạ i Elisa. Bọu maraune i Elisa e seng nakasilo tau wawine ěndaị e simongo. I Elisa nẹ̌bera si Gehazi, ”Pěmandako si wawụ bọu Sunem ene e narěnta!

²⁶Lighạko pẹ̌sombang i sie ringangu pakiwal᷊o kereapa kakakoạ i sire sěmbal᷊eěng.” ”Kěbị e mapia,” angkuěng u wawine ěndaị e si Gehazi.

²⁷Kai nahumpạ e su těngong Elisa i sie nẹ̌tumpěkuhẹ̌ mase nělahěkụ laedi Elisa. I Gehazi e mapulu mělěsọ i sie wọu ěndaị ene, kutẹu i Elisa nẹ̌bera u, ”Balạekere! Luhude i sie měngkawe apa masusa naunge. Kai MAWU e tawe něhabaru apa si siạ!”

²⁸Bawine ene nẹ̌bera, ”Tuang, iạ e tawe nẹ̌dorong anạ si Tuang. Sen takụ niwera lai si Tuang tadeạu kumbahangbe iạ měngkai pěngampal᷊ẹ̌ tala.”

²⁹I Elisa e nẹ̌bihu si Gehazi bọu e nẹ̌bera, ”Lighạko al᷊a těkingku kụ dakọ e katurusẹ̌ su wal᷊en ninang ini. Abe ědung kụ měngadatẹ̌ si sai-sai ipẹ̌sombang u su ral᷊eng. Kereu piạ u měngadatẹ̌ si kau abe pẹ̌gagholọu tempo waugu sumimbahẹ̌ laadate. Sěngapang mahumpạ e, pěllọ e těkingku su wadangu rariọ ene.”

³⁰Bawine ene nẹ̌bera, ”Tuang Elisa! Su arengu MAWU kụ biahẹ̌ e ringangu waugu niawan Tuang e, iạ e tawe měněntang i Tuang!” Ual᷊ingu ene nẹ̌buạ e i Elisa ringangu wawine ěndaị e sol᷊ong bal᷊ene.

³¹I Gehazi e seng něngal᷊imona si sire waugu měměllọu těking i Elisa su wadangu rariọ ene, kaiso tawẹ apa tingihẹ̌ arau tatialane wal᷊ine u rariọ ene e wiahẹ̌. Bọu e rimal᷊engke i Gehazi nẹ̌sombang i Elisa e kụ nẹ̌bera, ”Dariọ ene e tawe nẹ̌pětị.”

³²Ene nahumpạ e su wal᷊en tau wawine ene, i Elisa simuẹ̌ sẹ̌sane sol᷊ong dal᷊ungu kamare kụ nakasilọ e maietu rariọ ěndaị e rụdal᷊oka su wowon tatikilang.

³³I Elisa e něhěping tukadẹ̌ kụ bọu ene nẹ̌kal᷊iomaneng su MAWU.

³⁴ Bọu ene i sie rimarěmmạ su wowon dariọ e dingangu napẹ̌gěmming u mohong, napakasurị u matane, ringangu napakaraning l᷊imane su mohong, mata ringangu l᷊imang dariọ ěndaị e. Ual᷊ingu i sie nẹ̌koạ kerene tangú wadangu rariọ natětị e.

³⁵I Elisa e něbangungke, ringangu nẹ̌daral᷊eng tamai-ramahi su ral᷊ungu kamarẹ̌ ene, wọu ene saụewe rimarěmmạ kapia su wowom badangu rariọ ene. Pěngěnsueěnge rariọ ene e nẹ̌běnangke pitu sul᷊e, apidu němekesẹ̌ matane.

³⁶I Elisa rimolohʼi Gehazi pẹ̌kẹ̌kui si ninangu rariọ ene, kụ bọu ene i ninangu rariọ simuẹ̌, kụ nẹ̌berạe i Elisa si sie, ”Ini e anạ i Wawụ.”

³⁷Tau wawine ene e nẹ̌tumpěkuhe su těngong Elisa kụ bọu e něbawạe anạ e sol᷊ong likude.

³⁸Piạ sěnsul᷊e piạko lunusẹ̌ nariadi su kasěllahu wanua. Tangú i Elisa e nẹ̌sul᷊e sol᷊ong Gilgal. Piạ e i sie kạpaněntirone nabi sěnggal᷊ipoho e, i sie rimoloheng ěllange piněngal᷊ạ kuring gẹ̌guwạ dingangu apẹ̌nẹ̌nasạ kaěng baugʼi sire.

³⁹Sěngkatau wọu tal᷊oarang manga nabi ene siměbang sol᷊ong dahami mẹ̌deạ manga rukụ, tangú i sie nakaěbạ e mahang labu. I sie měngkate apa nanipo wuang mahang labu ene sěngapang kakěpal᷊e kụ niwawane sol᷊ong bal᷊e. Tawe nakạěnna kahěnga-hěngang měnsang kai wuang apa ene, kụ i sie měngkate apa něngangohẹ-něngangohẹ mase nitahone su ral᷊ungu kuring.

⁴⁰Ene nasasạ e, i sie měngkate apa němamahiạ su manga nabi ene. Kai wuhụewe lai i sire nakatemang biahẹ̌ ene, i sire měngkate apa němpẹ̌kiạ si Elisa u, ”Tuang, ini kai makạkilu!” Kụ i sire e tawe mapulu mahungkaěng.

⁴¹Tangú i Elisa e rimolohe piněngal᷊ạ tapoěng kạdodọ, mase nikauge su ral᷊ungu kuring ene. Bọu ene i sie nẹ̌berạ e u, ”Kěnangko saụ pahiạ biahẹ̌ ěndaị e.” Nal᷊ahẹ u kaěng ene wuhu e tawe makasilakạ.

⁴²Su tempo lai wal᷊ine, sěngkatau esẹ e narěnta wọu Baal-Salisa. I sie nẹ̌bawa waugʼi Elisa e gandung buhu nipěnsạ dingangu l᷊ai borotẹ̌ duam pul᷊o su waụ e nikoạ bọu gandung nipěnsạ kahumotongange su taung ene, ringangu l᷊ai gandung buhu papěnsạ kasamuriange. I Elisa e něngoro ěllange piněmahiạ borotẹ̌ ene su manga nabi ene,

⁴³kai ěllange nẹ̌bera, ”Tawe mẹ̌tiudẹ̌ baugu mahasụ su kataune!” I Elisa simimbang, ”Měngkate pahiạ, tadeạu i sire mahungkaěng batụu MAWU e něhengetang u i sire sarung kumaěng mase nasuẹeng kaěnge ute wědangben piạ lěmbene.”

⁴⁴Ěllang ene e němahiạ e kaěng ene si sire, kụ i sire kěbị e němpẹ̌kaěngke. Bọuteng kimaěng tangú bẹ̌dangbem piạ lěmbene kere nipěhengetang u MAWU e.