Read Sangir MANGA RATU KARUANE 5 Bible Online

MANGA RATU KARUANE 5 - Sangir bible

MANGA RATU KARUANE 5

¹ I Naaman kai sěngkatau rokol᷊u mol᷊onsekẹ u Siria ikẹ̌kěndagẹ̌ dingangu lẹ̌adatengu ratun Siria. U limiun Naaman, MAWU e seng nẹ̌gěllịu watạ su sordadon Siria. I Naaman tangú kai sěngkatau mol᷊ensekẹ bahani, kaiso kawe piạ sakị e su pisị makạtatakụ.

²Su sěnsul᷊e tempo tau Siria e něngalo wanuang Israel. Su pěngangalo ene sěngkatau anạ bawine tau Israel nikasamẹ kụ nibawawane nakoạ kere tau nitaweng, bọu e nakoạ mẹ̌tatangkiang kawingi Naaman.

³Piạ sěhěllo nẹ̌berako ěllang ene su mawune, ”Wawụ, kereu i tuang tamai mẹ̌sombang u nabi kụ mạtanạ su Samaria e, nal᷊ahẹu nabi ene sarung makapia si tuang.”

⁴Piạ i Naaman nakaringihẹ̌ hal᷊ẹ̌ ene, i sie nakoạ e sol᷊ong anun datu kụ nẹ̌běkeng apan niwerang dariọ bawine ene.

⁵Datu e nẹ̌bera, ”Kerenẹ e, kụ dakọko kakoạ sol᷊ong anun datung Israel. Iạ hědo měmohẹ u suratẹ̌ si sie.” Tangú nẹ̌buạ e i Naaman apidu nẹ̌bawa roitẹ̌ sal᷊aka 30.000 su kal᷊ěpane, ringangu roitẹ̌ bul᷊aeng 6.000 su kal᷊ěpane, dingangu pakeang maral᷊ěnggihẹ̌ mapul᷊ong parẹ̌.

⁶Suratẹ̌ niwawane tangu bawal᷊one kere ini: ”Limiun suratẹ̌ ini iạ kai mapatodẹu pěrwiraku, i Naaman si Tuang tadeạu i Tuang mapakaul᷊en sie wọu sakị e.”

⁷Piạ datung Israel nẹ̌basa suratẹ̌ ene, i sie něnggaghehẹ pakeange, ual᷊ingu ghụgiantang, kạberane, ”Silakạ, apa wue koạ e hakịu datun Siria ene e kawe mědẹ̌dorong si siạ pakạpian tau ini e? Iạ bal᷊inewe Ruata kụ piạ kawasa makawiahẹ̌ arau makapate taumata! Nal᷊ahẹu ratun Siria ene kětạembeng mẹ̌kẹ̌koạ tadeạu piạ aị e si siạ!”

⁸Nabi i Elisa e nakaringihẹ̌ hal᷊ẹ̌ ene, kụ něndolohen tatanata kere ini su ratung Israel, ”Unụe ghụgiantang? Dolohẹ̌ko tau ene aparěnta su anuku, tadeạu i sie masingkạ u su Israelẹ̌ ini e kai piạ nabi sěngkatau!”

⁹Ual᷊ingu ene nẹ̌buạ e i Naaman dingangu karetang kawal᷊one sol᷊ong bal᷊eng Elisa kụ něngědung su těngon tukadẹ̌.

¹⁰I Elisa e něndolohu sěngkatau ěllange apẹ̌bẹ̌bera kere ini si Naaman, ”Dakọ e i Tuang pěndenọ pitu sul᷊e su Sal᷊ụ u Yordan, kụ i Tuang e sarungbe mul᷊e marasai.”

¹¹Nakaringihẹ̌ ene i Naaman limangehẹ̌ dingangu nẹ̌bera, ”Iạ mạngěnna u i sie sarung suměbang hala mẹ̌sombangu iạ, dingangu mẹ̌kal᷊iomaneng su MAWU, Ruatane, mase měnganoạ l᷊imane su wowon sakị su wadangku ini kụ iạ e maul᷊e.

¹²Sal᷊ụ u Abana ringangu Parpar su Damsyik něngalembong kapiane wọu sal᷊ụ baewe sude su Israel! Iạ e makarenọ paịse ringangu mul᷊e!”

¹³Arawe manga ěllange riměduhẹ̌ si sie ringangu nẹ̌bera, ”Tuang, manga andene i Tuang nioro pinẹ̌koạ hal᷊ẹ̌ masusa e, nal᷊ahẹu i Tuang mang mẹ̌koạ ene. Dumakeleng kate i sie kětạeng měngoro si Tuang apěndenọ tadeạu maul᷊e!”

¹⁴Ual᷊ingu ene rimal᷊engke i Naaman sol᷊ong Sal᷊ụ u Yordan bọu ene simuẹ̌ kụ nẹ̌těngkawunsal᷊u wadange su ral᷊ungu sal᷊ụ ene pitu sul᷊e mẹ̌sul᷊ungu kere niorong Elisa. Tangú nul᷊ẹ e i Naaman. Badange nahuweka kapia mẹ̌sul᷊ungu pẹ̌bawadangu manga rariọ makakudạ.

¹⁵Mase i sie ringangu manga tumatol᷊ene nẹ̌sul᷊e sol᷊ong anung Elisa. ”Ini iạ nasingkạ e,” angkuěng i Naaman si Elisa, ”u su kasěllahu dunia e kětạengben sěmbaụ Duata e, kụ kai Ruata sẹ̌sěmbaěng u tau Israel. Ual᷊ingu ene, mal᷊uasẹ̌ bue i Tuang měnarimạ u gaghěllịku ngae?”

¹⁶I Elisa e simimbang, ”Su arengu MAWU kụ biahẹ̌ e, kụ takụ tẹ̌tangkianenge, iạ e tawe měnarimạ u manga ghaghěllị apa-apa.” I Naaman měnẹ̌nahěsẹ tadeạu i Elisa e mapulu manarimạ u ghaghěllị e kaiso i Elisa e mang těbe tawe měnarimạ.

¹⁷Mase angkuěng i Naaman, ”Kereu i Tuange tawe lai mapulu měnarimạ u ghaghěllịku e, ute apakawalako iạ e mẹbawa ěntana mapul᷊ẹ[8] kal᷊awọeweng ikaumal᷊u wagal᷊ẹ̌ sěmparẹ̌. U manětạ bọu sěhěllo ini iạ e sarung měnarakang u sasěmba samatang baugu MAWU, ringangu wal᷊inewe waugu ruata wal᷊ine.

¹⁸Kereu iạ e hědong harusẹ̌ tumaking datu, kụ iạ tamai mẹ̌kal᷊iomaneng su pananěmbaěng su mahan duatan Siria i Rimon, ute mal᷊owọko MAWU Ruata e mẹ̌gěllịbeng ampung si siạ e.”

¹⁹Angkuěng i Elisa, ”Kapul᷊ẹ e ringangu sal᷊amatẹ̌.” Kụ bọu ene napul᷊ẹ e i Naaman. Tawe nararěnnạ wọuten i Naaman dimal᷊eng e,

²⁰i Gehazi ěllang i Elisa e měngẹ̌ngěnna, ”Ah, unụe i sie pinakawala nirolohẹ̌ tawe piněmaehẹ̌? Hinone i tuangku e měnarimạ u ghaghěllị u tau Siria ene! Su arengu MAWU kụ biahẹ̌ e, iạ harusẹ̌ měnahusu si sie ringangu makaěbạ apa-apa wọʼi sie!”

²¹Mase i Gehazi e něnahusu si Naaman. Piạ i Naaman nakasilo piạ taumata narěnta e, i sie limintụ bọu karetane ringangu nakiwal᷊o, ”Kai piạ a?”

²²I Gehazi simimbang, ”Mẹ̌dorong ampung Tuang, iạ e kai nirolohẹ̌ apạul᷊ị si Tuang u buhụewe ruang katau nabi kawuhuang diměnta wọu wanuam bawul᷊urangu Efraim. I tuangku mědẹ̌dorong tadeạu i Tuang e apẹ̌gẹ̌gěllịu roitẹ̌ sal᷊aka 3.000 su kal᷊ěpane, ringangu pakeang maral᷊ěnggihẹ̌ duam parẹ̌ baugu nabi rarua ene.”

²³”Nal᷊ahẹu kerene wue!” angkuěng i Naaman, kụ i sie měnẹ̌nahěsẹ tadeạu i Gehazi pẹ̌bẹ̌bawa roitẹ̌ sal᷊aka 6.000 su kal᷊ěpane. I Naaman němikung doitẹ̌ ene su ral᷊ungu kawihẹ̌ darua, ringangu něngal᷊ạ pakeang maral᷊ěnggihẹ̌ duam parẹ̌. Kụ kěbị e nionggọ e su ěllange ruang katau, kụ nirolohe niparal᷊eng piněngal᷊imona si Gehazi.

²⁴Nahumpạeng bul᷊ude tampạ u katatanakeng i Elisa e, i Gehazi e něngal᷊ạ doitẹ̌ dingangu pakeang ene wọu manga ěllangi Naaman, bọu ene niresọ e su wal᷊e. Manga ěllang ene e nirolohe pinakapul᷊ẹ,

²⁵mase i sie simuẹ̌ kapia sol᷊ong dal᷊ungu wal᷊e. I Elisa e nakiwal᷊o, ”I kau kai wọu a?” ”Tala wue tawe wọu apa-apa, Tuang!” sasimbange.

²⁶Kaiso i Elisa e nẹ̌bera, ”Naungku e kai paị sene, su tempong i Naaman limintụ bọu karetane baugu mẹ̌sombang i kau. Ini e wal᷊inewe tempone waugu makaěbạ doitẹ̌ dingangu měmělli waelu zaitun, baelu anggorẹ̌, domba ringangu sapi ore lai manga ěllang!

²⁷Ual᷊ingu i kau e něnarimạ gaghěllị ene, i kau e sarung lai měnarimạ sakị i Naaman. Arau sarang marěngụ-děngụ hitenu e mal᷊aing sarung makahombang sakị ene!” Ene nasěbangke i Gehazi wọu ene e, i sie nakahombangke sakị e su pisị kụ — pisine měngkatewe nawira-wira.