Read Sangir MANGA RATU KARUANE 6 Bible Online

MANGA RATU KARUANE 6 - Sangir bible

MANGA RATU KARUANE 6

¹Piạ sěhěllo manga nabi apan nitěntiroěng i Elisa e, ghụgahiorọ si sie. I sire nẹ̌bera, ”Tampạ katatanakeng i kitẹ e kai tumanịu masěsẹ!

²Apakawalako i kami e ren tamai měnuwang kalu su rěduhu Sal᷊ụ u Yordan, dingangu měmětị tampạ pẹ̌tatanakeng i kitẹ e paị sene.” ”Kerenẹ e,” angkuěng i Elisa.

³Sěngkatau wọu tal᷊oaran sire e měnẹ̌nahěsẹ u tadeạu i Elisa e patol᷊e ringang i sire. I Elisa e tangú mal᷊uasẹ̌,

⁴kụ bọu ene i sire nẹ̌buạ sěngkapẹ̌buạ. Nahumpạem biwihu Sal᷊ụ u Yordan, tangú i sire e nanětạ e něnuwang kalu.

⁵Sěngkianụ e horong bal᷊iungu sěngkatau wọu tal᷊oaran sire e, nanawo su ral᷊ungu akẹ. ”Kai hombangu apa, Tuang!” kakiạ e si Elisa, ”Ene e kai wal᷊iung ědang!”

⁶”Kụ kai suapa kinanawoěnge?” i Elisa nakiwal᷊o. Tau ene něněbọu tampạ e, kụ bọu ene i Elisa e němentehẹ̌ kalu sěmpotọ, mase nikoẹ e su lantehu tampạ ene. Kụ siměpụ e horom bal᷊iung ene e sol᷊ong bowong akẹ.

⁷I Elisa e nẹ̌berạe, ”Al᷊ạ e!” Tau ene něngul᷊uhe limane kụ něngal᷊ạ bal᷊iung ene.

⁸Piạ sěnsul᷊ẹ̌, Siria e nẹ̌sekẹ u Israel. Bọuten nẹ̌dal᷊ahintau e ringangu manga pěrwirane, datun Siria něnurantung u kai suapạ e i sire hinong mẹ̌daseng.

⁹Kaiso i Elisa něndingọeng habarẹ̌ su ratung Israel baugu mapẹ̌tahěndung i sie tadeạu kumbahang makoạ sol᷊ong tampạ ene, watụ u taumatang Siria e wiasane měngẹ̌ngal᷊ạ dal᷊eng ene.

¹⁰Kụ datung Israelẹ̌ e měnẹ̌numbal᷊ung si sire apam měmpẹ̌tẹ̌tanạ su rěduhe ene e tadeạu pakaral᷊ukadẹ̌. Kerene i Elisa měngkate seng apa masaun sul᷊ene maul᷊ị su ratu e.

¹¹Hal᷊ẹ̌ ene kai nakaral᷊akị naungu ratun Siria, hakịu i sie nẹ̌kui manga pěrwirane kụ nakịbal᷊o, ”Nal᷊ahẹ u wọu tal᷊oarang kitẹ e piạ u nẹ̌tul᷊a. I sai tangú taumatane? Ene ěng habarẹ̌ko!”

¹²Sěngkatau wọu tal᷊oarang manga pěrwira ene e simimbangu, ”Tawẹu sarang sěngkatau, ratu. Seng Nabi i Elisa e tumanggihe! Seng i sie e mělahabare su ratung Israel apan niwerang mawu ratu e, manimbe ene niwerane su kamaru pẹ̌tatikilang.”

¹³”Sẹ̌suieko měnsang kai suapa i sie,” parentan datu e, ”tadeạu iạ e wotonge menamẹ si sie.” Taumata e něhabarẹ̌ si sie u i Elia e ene su Dotan.

¹⁴Mase ratun Siria e něndolohu wuntuangu sekẹ e masaria piạ kawal᷊one ringangu karetan sekẹ. Su tempong hěbi e i sire narěnta su soa ene kụ bọu ene němpěliwung.

¹⁵Sěngkariọěllone, mal᷊uka-l᷊ukadẹ̌ piạ e lukadʼi Elisa nẹ̌bangung mase siměbang, i sie nakasilo sordadon Siria e němpěliwung soa ene nasukụeng kawal᷊o ringangu karetan sekẹ i sire. Kụ i sie nẹ̌sul᷊e su anung Elisa ringangu nẹ̌bera, ”Nasilakạ i kitẹ Tuang! Kai apạ e hinong koateng i kitẹ?”

¹⁶”Tawahal᷊uasu matakụ,” sasimbang i Elisa. ”Apang piạ si kitẹ e něngalembong kal᷊awọe wọu si sire.”

¹⁷Mase i Elisa nẹ̌kal᷊iomaneng, ”MAWU, mal᷊owọko i Kau e reng měmekesẹ̌ matang lukadẹ̌ku e tadeạu i sie makasilo!” Kụ MAWU e rimaringihẹ̌ kakal᷊iomaneng i Elisa e hakịu piạ e lukade ene rimal᷊inge, kinasilone wul᷊ude ene e nasěsẹ u kawal᷊o ringangu kareta piạ putung e nangělikụ si Elisa e.

¹⁸Ene piạ e tau Siria e něngalo, i Elisa e nẹ̌kal᷊iomaneng, ”MAWU, mal᷊owọko reng mapakawutang matan sire ini e!” MAWU e rimaringihẹ̌ kakal᷊iomaneng i Elisa, kụ i sire kěbị e něngkawuta.

¹⁹I Elisa e němpahunděnta su anun sire ringangu nẹ̌bera, ”I kamene e něngkapal᷊idẹ̌, u ini e wal᷊inewe soa rẹ̌deakeng i kamene. Mahịe tol᷊e si siạ, hědo iạ měnonda si kamene su anun sire rẹ̌deakeng i kamene.” Bọu e i Elisa něngěntudẹ̌ si sire sol᷊on Samaria.

²⁰Su tempong i sire němpẹ̌suẹ̌ su soa ene, i Elisa e nẹ̌kal᷊iomaneng, ”MAWU, mal᷊owọko matan sire e rembeng ipakawekesẹ̌ tadeạu i sire makasilo.” MAWU e rimaringihẹ̌ kakal᷊iomaneng i Elisa e; i Sie němekesẹ̌ matan sire e hakịu i sire něngkaherang nakasilọ u i sire kawe seng ene su soan Samaria.

²¹Piạ e ratung Israel nakasilo taumatan Siria ene, i sie nakiwal᷊o, ”Elisa, iạ e mang harusẹ̌ pěmate si sire inie?”

²²”Kumbahang bue,” angkuěng i Elisa. ”Buhụewe sordado apan nisamẹ i Tuan Datu su pẹ̌seketang e sen tawe nipaten Tuang, sude wue lai ini. Onggotengkong kaěng dingangu inumang i sire e, wọu e walạ e kere i sire pẹ̌sul᷊e kapia su anun datun sire.”

²³Tangú ratung Israelẹ̌ e němangung sal᷊iwang gẹ̌guwạ baugʼi sire. Bọuten i sire kimaěng dingangu něnginung, i sie rimolohi sire pinakapul᷊ẹ su anun datun Siria. Bọu tempo ene tau Siria e něngědo něngalo wanuang Israel.

²⁴Pira tempo samuring Benhadad datun Siria nẹ̌bawa kal᷊awọu sordadone waugu měngalo Israel. I sire němpěliwung soan Samaria,

²⁵kụ nariadi karal᷊unusẹ̌ marasai su ral᷊ungu soa, hakịu těmbọu kalide sěmbaụ e arěgane ual᷊um pul᷊o su kal᷊ẹ̌pane roitẹ̌ sal᷊aka, ringangu taiʼm paluma[9] ruang onsẹ̌ e arẹ̌gane limang kal᷊ěpa roitẹ̌ sal᷊aka.

²⁶Piạ sěnsul᷊ẹ piạ e ratu kạdal᷊enge su wowom meselu soa, piạ sěngkatau wawine nẹ̌kiạ u, ”Tuang, tul᷊ungko!”

²⁷Datu e simimbang, ”Kereu MAWU e tawe mẹ̌tul᷊ung i kau, kawe makatul᷊ungbe kereapa iạ e tangú? Si siạ e tawẹ apa gandung arau akẹ u anggorẹ̌!

²⁸Kai a sigěsạu tangú?” Bawine ene e simimbang, ”Hapịku ini e seng němaringang si siạ tadeạu i kandua e kuminạ anạku kal᷊imona, mase sěngkarịěllone i kami e kuminạ anạe.

²⁹ Ual᷊ingu ene i kami e něnasạ e anạku kal᷊imona wọu e nikinạ i kami. Sěngkarịěllone nẹ̌sarětạeng iạ nẹ̌dorong tadeạu i kami e měnasa anạ e, kutẹu kawe niwunine!”

³⁰Nakaringihẹ̌ ene, ratu e něnggehẹ e pakeange ual᷊ingu kasusan naunge. Taumata apan dụdarisị maranim meselẹ̌ ene nakasilọ e u ponggọ e kai nạung karong.

³¹Datu e nẹ̌kiạ u, ”Sahěllo ini e lai i Elisa harusẹ̌ mate. Balạekere Mawu Ruata pěhukungu iạ sěngapang kawehạ e kereu iạ tawe němate si Elisa!”

³²Bọu e ratu něndolohu sěngkatau piněngal᷊imona sol᷊ong bal᷊eng Elisa. Su tempo ene i Elisa e ene su wal᷊e, ringangu piạ pirang katau mapapiang kawanua nakisake sene. Kal᷊amonang darolohangu ratu e nahumpạ, i Elisa nẹ̌bera su manga mapapiang kawanua ene u, ”Pakatitikeko! I tahapate ene rimolohu taumata pěmẹ̌mate si siạ. Kereu tau ene sarung marěntạ, hěpingko tukadẹ̌ e ringangu abe pakawala i sie sumuẹ̌. Su l᷊ikude tangu sarung duměnta ratu e hala.”

³³I Elisa e tawe nasuem berane, datu e[10] seng nahumpạ sene kụ nẹ̌bera, ”Susa ini e kai papahangu MAWU e si kitẹ! Kụ apawu kěhase relaing iạ e měharapẹ̌ tul᷊umangʼE?”