Read Sangir MANGA RATU KARUANE 7 Bible Online

MANGA RATU KARUANE 7 - Sangir bible

MANGA RATU KARUANE 7

¹I Elisa e simimbang, ”Daringihẹ̌ko kai apa piněhengetangu MAWU! Rịěllo mangawe su tempo kere ini, dingangu roitẹ̌ sal᷊aka piane sěngkal᷊ěpa, seng makawělli gandung těllung kilo kal᷊ěnggihange arau gandung haghine wal᷊ine ěnnungu kilo.”

²Lukadu ratu su wal᷊e e němal᷊isẹ̌, ”Tawe mariadi! Ene e tawe nihino, manilaing orasẹ̌ ini e lai MAWU maparasehu tahiti masuwenehẹ̌ bọu l᷊angị!” ”I kau e hědo sarung makasilo hal᷊ẹ̌ ene mariadi, kaiso i kau e tawe makatemang kaěng ene e sarang kadodọ-dodọ,” angkuěng i Elisa.

³Su ěllo ene piạ i sire ěpạ piạ sakị e su pisị makạtatakụ su l᷊ikudu tukadu pasěllangeng u Samaria. I sire nẹ̌bera sěmbaụ su wal᷊ine, ”Apawu kěhase i kitẹ e měngkai mạiang sini e mạngampal᷊ẹ̌ mate?

⁴Kereu i kitẹ e sumuẹ̌ su soa e, i kitẹ e sarung mateng kal᷊unusang; dingangu kereu i kitẹ e měngkai mạtanạ sini, i kitẹ e mal᷊aing mate sarung. Mapiawe i kitẹ sol᷊ong pẹ̌darasengang u tau Siria. Nal᷊aheu i kitẹ sarung pateěng i sire. Sal᷊a anune i kitẹ e tawe lai kapuraneng i sire.”

⁵Sarětạeng ěllo e nanětạ kakạděndunge, i sire nakoạ sol᷊ong daseng u tau Siria, kaiso i sire tawe nakasilo sarang sěngkatau sene.

⁶Batụu, MAWU e seng napakariadin tau Siria e makạdingihẹ̌ tingihẹ̌ kere pěngangalong buntuang u kawal᷊o piạ karetane masaria. Tau Siria e mạngiral᷊ing u ratung Israel kai seng něnewa ratung Het dingangu Misirẹ̌ ringangkewelain manga sordadone waugu apěngalo si sire.

⁷Ual᷊ingu ene hěbi ene lai i sire nahuntal᷊ang něngambang batangeng, dingangu naněntang u pẹ̌darasengang, kawal᷊o, ringangu manga kaliden sire niwala kerene su pẹ̌darasengang i sire.

⁸I sire ěpạ u katau piạ sakị e su pisị e narěnta su wiwihu pẹ̌darasengang ene e, kụ nahunsuẹ̌ su ral᷊ungu raseng sěmbaụ. I sire nahungkaěng dingangu němpanginung sene ringangu němpěngal᷊ạ bul᷊aeng, sal᷊aka ringangu manga pakeang kụ bọu e niwunin sire. Bọu e nẹ̌sul᷊e kapia i sire kụ němpẹ̌suẹ̌ su raseng bal᷊ine, mase nẹ̌koạ lai kerene.

⁹I sire nẹ̌bera sěmbaụ su wal᷊ine, ”Kakanoạ i kitẹ ini e ral᷊akisẹ̌. Habarẹ̌ ini e habarẹ̌ mapia, kụ mapiawe iul᷊ị i kitẹ! Mạeng i kitẹ delaing měngampal᷊ẹ̌ sarang diěllo, nal᷊ahẹ u i kitẹ e pahangeng. Mapiawe iul᷊ị i kitẹ e hal᷊ẹ̌ ini su istana.”

¹⁰Ual᷊ingu ene nẹ̌sul᷊ẹ e i sire sol᷊ong Samaria ringangu nẹ̌kiạ e su lukadu pasěllangeng u soa, ”I kami e seng nakoạ sol᷊ong daseng u tau Siria, kutẹu nạung mang tawẹ taumata paị sene. Kawal᷊o ringangu kaliden sire e kinaẹ̌bakeng i kami wědang kal᷊aikị su tampạ e, ringangu manga raseng měngkate apa nibawala kerene.”

¹¹Manga lukadẹ̌ e němpěmohangke habarẹ̌ ene, hakịewen taumata e naul᷊ị sol᷊ong istana.

¹²Su tempo ene ěllo e wědangbe hěbi, kaiso ratu e siměbangke wọu kamarẹ̌ tatikilange ringangu nẹ̌bera su manga sawohị e, ”Daringihẹ̌ko! Iạ e masingkạ u hingidu tau Siria ene! I sire masingkạ u i kitẹ e kai su ral᷊ungu karal᷊unusẹ̌, ual᷊ingu ene i sire něněntangu pẹ̌darasengang dingangu tamai nẹ̌kěmbuni su wimbaenge mẹ̌deạu měmal᷊ěbidẹ̌ si kitẹ e apasěbang pědeạ kaěng. Bọu ene i sire sarung měnal᷊iwung si kitẹ e mase makapẹ̌kawasa soa.”

¹³Sěngkatau sawohị u ratu e nẹ̌bera, ”Tuang, i kitẹ apang bědang ene su ral᷊ungu soa ini e pal᷊edi kitẹ e měngkate tawẹ beong-beonge kere i sire apan sen nate. Ual᷊ingu ene mapiawe i kitẹ e rumolohu pirang katau apasake kawal᷊o limam baụ bọu tal᷊oarang kawal᷊o apam bědang ene e, ringangu apakakoạ sol᷊ong paị ene, pẹ̌kakělla apan sen nariadị e.”

¹⁴Tangú i sire němile pirang katau, kụ bọu ene ratu e rimolohʼi sire ene nipasake karetan sekẹ darua e ringangu tamai něnanẹ̌sui apan sen nariadi su sordadon Siria e.

¹⁵I sire nakoạ sol᷊ong Sal᷊ụ u Yordan. Su kanandun dal᷊eng i sire nakasilo pakeang dingangu manga apal᷊iwụ nẹ̌sal᷊iawuhẹ̌. Kěbị ene e měngkate apa nịpẹ̌darěmme kerene kahian tau Siria e piạ i sire timal᷊ang u watangeng i sire. Manga rarolohang ene e něngkapul᷊ẹ dingangu naul᷊ị su ratu.

¹⁶Tangú tumanạ u Samaria e němpahuntal᷊ang sol᷊ong likudu soa e ringangu němul᷊aho pẹ̌darasengang u tau Siria. Natuhụewe kere suapan nipěhengetangu MAWU e, nariadị e gandung kapiaěnge těllung kilo e arau gandung gahị e wal᷊ine ěnnung u kilo tumbạeng sěngkal᷊ěpa roitẹ̌ sal᷊aka arěgane.

¹⁷Nẹ̌sarětạu su tempo ene lukadu watangeng u ratu e piạ hal᷊ẹ̌ e mělẹ̌lukadẹ̌ tukadu pasěllangengu soa. I sie nate sene kěkatahidaěng u kawanua. Hal᷊ẹ̌ ene nariadị e natuhụewe kere pinẹ̌berang Elisa su ratu e su tempon datu e riměnta su anune.

¹⁸I Elisa e seng nẹ̌bera u kereu manga su tempo kerene su sěngkariěllone, těllung kilo gandung kapiange arau gandung gahị e wal᷊ine ěnnungu kilo e kụ sarung iwal᷊ụ su Samaria arẹ̌gane tumbạeng sěngkal᷊ẹ̌pa roitẹ̌ sal᷊aka.

¹⁹Ringangu su tempo ene lukadu watangengu ratu e sem bọu nẹ̌bera, ”Tawe mariadi! Hal᷊ẹ̌ ene tawe masowa su akal᷊ẹ̌, manimbe lai su orasẹ̌ ini e lai MAWU e maparasehu tahiti mal᷊awọ bọu langị!” Mase nisimbang i Elisa e, ”Hědo i kau e sarung makasilo hal᷊ẹ̌ ene e nariadi, kai i kau e sarung tawe makateěng kaěng ene e sarang kadidị-didị.”

²⁰Kerene nariadi su tau ene e — i sie mate kal᷊indaěngu kawanua e su tukadu pasěllangeng.