Read Sangir MANGA RATU KARUANE 8 Bible Online

MANGA RATU KARUANE 8 - Sangir bible

MANGA RATU KARUANE 8

¹ Piạ tempo sěnsul᷊e, MAWU e naparěntang hombangu karal᷊unusẹ̌ su wanuang Israel kụ karěngụ e pitu taung. Kal᷊amonang ene e i Elisa e seng něhabaru hal᷊ẹ̌ ene su tau wawine wọu Sunem kụ anạ e seng niapẹ̌biahẹ̌ kapia. I Elisa e mal᷊aing něngoro si sie piněngal᷊ing dingangu ral᷊ohom bal᷊ene sol᷊om banua wal᷊ine.

²Bawine ene nẹ̌koạewe apan niwerang Elisa e, ringangu nẹ̌buạ sol᷊om banuam Pilistin mědeạu matanạ sene.

³Samurin tempo pitu taung ene e i sie nẹ̌sul᷊e sol᷊ong Israel. Bọu e i sie rimal᷊eng dingangu anạ e sol᷊ong anun datu mẹ̌dorong sěngapam botonge tadeạu wal᷊e ringangu manga rahamine isul᷊e si sie.

⁴Su tempo ene i Gehazi ěllang i Elisa e seng nirorongangu ratu waugu pẹ̌beken manga karal᷊inaụ kụ seng nikoạ i Elisa.

⁵Kụ nẹ̌sarětạ su tempon tau wawine wọu Sunem ene riměnta nẹ̌těngon datu waugu měhabaru roronge, i Gehazi kapẹ̌bẹ̌keneng kakakoạ u kereapa i Elisa e napẹ̌biahẹ̌ kapia rariọ sěngkatau kụ sen nate e. Tangú angkuěng i Gehazi, ”Tuangku lẹ̌adateng, seng ini e wawine ene, kụ seng ini e anạ e kụ niapẹ̌biahẹ̌ kapia kahiang Elisa!”

⁶Bọu e ratu nakiwal᷊o kụ bawine ene nẹ̌běken dariọ ene. Bọu ene ratu e nẹ̌kui sawohị e sěngkatau ringangu nẹ̌parenta tadeạu kal᷊awọu tataghuanengu wawine ene e isul᷊e si sie, narekeng dingang arěgang kal᷊awọu ghẹ̌sin dahamine karěngụewen pitu taung i sie su wanua wal᷊ine.

⁷Piạ sěnsul᷊e tempo i Elisa e nakoạ sol᷊ong Damsyik. Nẹ̌sarětạ u Ratu i Benhadad e kai masakị. Ene ratu e nakaringihẹ̌ u i Elisa e kai ene su Damsyik,

⁸i sie nẹ̌bera si Hazael, sěngkatau sawohị e, ”Bawako laonggọ su nabi ene, ringangu pẹ̌dorongko tadeạu i sie makiwal᷊o su MAWU měnsang iạ ini e maul᷊e wue arau tala.”

⁹I Hazael něngal᷊ạ onta ěpạ u pul᷊o ringangu nilurangengu kal᷊awọu sabarang haghi ual᷊in soan Damsyik, bọu e nakoạ sol᷊ong anung Elisa. Sarạeng nahumpạ su tampạ i Elisa, kụ i Hazael nẹ̌bera, ”Ěllangu e Ratu Benhadad, něndolohu iạ pinakiwal᷊o, měnsang i sie e mul᷊e wue arau tala.”

¹⁰I Elisa e simimbang, ”MAWU e nẹ̌bera si siạ u i sie sarung mate. Kai měngkate paul᷊ị si sie u i sie sarung mul᷊e.”

¹¹Bọu e i Elisa e němanda mataedẹ̌ si Hazael ringangu limendạ kụ i Hazael měngkate apa tutarěntung. Sěngkělěndị u i Elisa e kimiạ.

¹²”Unụe wue i Tuang e simangị?” angkuěng i Hazael. ”Batụu iạ e masingkạ u kakanoạ u ral᷊akị e sarung koatengu su tau Israel,” angkuěng i Elisa. ”I kau e sarung měnutung manga soane apam piạ benteng e, kụ měmate apang mangangudạ kapapiange, ringangu měngělọ manga rariọ buhu wawantelẹ̌ e mase měngua tiangu manga wawine apang mẹ̌bẹ̌bawa kapapia.”

¹³ ”Ah, iạ ini e taumatawe tawẹ mangal᷊ene apa,” angkuěng i Hazael, ”mariadiwe kereapa iạ kawe piạ kawasa kahuagate kerene!” ”MAWU e sen něnodẹ si siạ u i kau e sarung makoạ datun Siria,” angkuěng i Elisa.

¹⁴Ene piạ i Hazael nẹ̌sul᷊e sol᷊ong istana, nakiwal᷊ọ e i Benhadad u, ”Apạ e niwerang Elisa?” ”I sie nẹ̌bera u i Tuang mang sarungbe maul᷊e,” angkuěng i Hazael.

¹⁵Kai sěngkarịěllone i Hazael něngal᷊ạ e kahiwune sěngkal᷊ěpa, mase nilaehe su ral᷊ungu akẹ bọu ene nitakạ e su ghatin datu hakịu i sie nal᷊ěmisẹ̌. Kụ i Hazael nakoạ e ratun Siria něngaweng si Benhadad.

¹⁶I Yehoram anạ i Yosafat nakoạ datung Yehuda su tempon Datu i Yoram anạ i Ahab sen nẹ̌parenta Israel lima taung.[11]

¹⁷Su tempo ene, i Yehoram umure těllum pul᷊o dua su taunge, kụ i sie nẹ̌parenta su Yerusalem ual᷊u taung karěngụ e.

¹⁸I sie nẹ̌kawing dingangu anạ i Ahab, kụ kerẹewe nikoạ u walagʼi Ahab, i sie mal᷊aing nẹ̌dosa su MAWU kerẹewe manga ratung Israel.

¹⁹ Kaiso MAWU e mạdiri mapakawihuan Yehuda e batụu i Sie kai sen nẹ̌kědo si Daud ěllangʼE, u hěntone kai sarung tatapẹ̌ makoạ datu.

²⁰ Su ral᷊ungu parentan Yehoram, i Edom kai nẹ̌pahuwungkadẹ̌ su těngon Yehuda e ringangu němětị kararatuange hala.

²¹Ual᷊ingu ene, siměbangke i Yehoram dingangu kal᷊awọu karetan sekẹ e nẹ̌timona sol᷊ong Zair. Sene i sie nihěgatengu wuntuang i Edom, kaiso nahěbi e i sie ringangu manga mol᷊ensekẹ u wuntuang piạ karetane nakal᷊ěsọ bọu pělahěgạ u sekẹ, dingangu manga sordadon sire e němpẹ̌tal᷊ang sol᷊ong bal᷊en sire sěngkatau-sěngkatau.

²²Nanětạ bọu tempo ene i Edom sen tawe lai rimaringihẹ̌ si Yehuda. Su tempo ene lai soan Libna mal᷊ain nẹ̌pahuwungkadẹ̌.

²³Běkene lai wal᷊ine mạanun Yehoram, niwohẹ su ral᷊ungu bukẹ̌ u Wěkem Mararatun Yehuda.

²⁴I sie nairị kụ nilěbing su pěndal᷊ẹ̌bingangu mararatu e su Soan Daud. I Ahazia ahuse nakoạ datu piněngaweng si sie.

²⁵I Ahazia anạ i Yehoram nakoạ datun Yehuda su tempon Datu i Yoram anạ i Ahab sen nẹ̌parenta Israel mapul᷊o dua su taunge.

²⁶Su tempo ene i Ahazia umbure ruam pul᷊o dua su taunge, kụ i sie nẹ̌parenta su Yerusalem sěntaung karěngụ e. I ninange isẹ̌sẹ̌bạ si Atalya, anạu Ratu i Ahab dingangu pulung i Omri ratung Israel.

²⁷Ual᷊ingu pẹ̌kakawinge, i Ahazia piạ kal᷊ahěmpukangu anạu sěngkatau ringangu walagu Ratu i Ahab. I Ahazia e nẹ̌dosa su MAWU mẹ̌sul᷊ungkewen nikoạ u walagʼi Ahab.

²⁸Datu i Ahazia e mal᷊aing timol᷊e nẹ̌sekẹ dingang i Yoram datung Israel rimokạ si Hazael datun Siria. I sire němpẹ̌sekẹ su Ramot, banuang Gilead. I Yoram nal᷊esẹ su ral᷊ungu pẹ̌sasekẹ ene;

²⁹kụ bọu ene i sie nẹ̌sul᷊e sol᷊ong soan Yisreel mědeạu tangkianeng, dingangu i Ahazia tamai rimal᷊inge si sie sene.