Read Sangir MANGA RATU KARUANE 9 Bible Online

MANGA RATU KARUANE 9 - Sangir bible

MANGA RATU KARUANE 9

¹Su tempo ene Nabi i Elisa kimui sěngkatau wọu tal᷊oarang manga nabi nạung nitěntiroěnge ringangu nẹ̌bera, ”Pěmpẹ̌damahị e kakoạ sol᷊ong Ramot su Gilead, kụ bawako wotol᷊ẹ̌ lohong zaitun ini.

²Kereu i kau e mahumpạ paịse, reakeko i Yehu anạ i Yosafat dingangu pulung i Nimsi. Paringangko i sie sẹ̌sane sol᷊ong kamarẹ̌ sěmbaụ,

³kụ sěbohẹ̌ko lana ini su těmbọ e, mase pẹ̌bera, ’MAWU něhengetang u i Sie měhengkẹ i kau e makoạ datung Israel.’ Bọuten nẹ̌koạ hal᷊ẹ̌ ene, těntangko tampạ ene pakal᷊ighạ-lighạ.”

⁴Nabi mangudạ ene e nẹ̌buạ sol᷊ong Ramot,

⁵mase nakaěbạ si Yehu ringangu manga mol᷊ensekẹ lai wal᷊ine e kạpẹ̌dẹ̌dal᷊ahintaune sene. Nabi ene nẹ̌bera, ”Tuang, iạ e nẹ̌bawa habarẹ̌ baugi Tuang?” I Yehu simimbang, ”Baugi sai?” ”Baugi Tuang sẹ̌sane,” sasimbangu nabi ene.

⁶ Bọu ene i rẹ̌dua e nahunsuẹ̌ e su ral᷊ungu wal᷊e, kụ nabi mangudạ ene e něněbohu lanang zaitun ene e su wowong těmbọ i Yehu mase nẹ̌bera, ”MAWU Ruatang Israelẹ̌ e něhengetang, ’Iạ e měnduị i kau makoạ datu waugu umatẹ̌-Ku Israel.

⁷I kau e sarung mapakawinasan dal᷊ohom bal᷊en tuangu i Ahab. Ual᷊ingu kerene ute Iạ měhukung i Izebel kụ seng němate manga nabi-Ku ringangu manga ěllang-Ku e wal᷊ine.

⁸Kal᷊awọu walagẹ̌ dingangu anạ pulung i Ahab harusẹ̌ pakapate. Apang manga esẹ maghaghurang arau lai mangangudạ e Takụ ipakawinasa.

⁹Balage sarung Takụ koateng kere niěbạ balagi Yerobeam dingangu walagʼi Baesa, mararatung Israel.

¹⁰ Izebel tawe sarung ilẹ̌bing. Maiete sarung kinaseng u asu su wanuang Yisreel.’ ” Bọuten nẹ̌berang kěbị ene e, nabi mangudạ ene siměbang bọu ene timal᷊ang.

¹¹I Yehu e nẹ̌sul᷊e su anung manga hapị e kụ bọu ene i sire nakiwal᷊o, ”Kai piạ habarẹ̌ apa ngae? Tau pulu ene kai mapulung apạ e si kau tangú?” ”Uh, i kamene seng masingkạ,” angkuěng i Yehu.

¹²”Tala, i kami wěga wue!” angkuěng i sire. ”Hotede paul᷊ịko!” Angkuěng i Yehu, ”Iạ e měhabaru tatanatam MAWU u iạ e niruị u MAWU nakoạ datung Israel.”

¹³Dingangu masahawụ manga hapị i Yehu e němingkahẹ̌ kakingkaeng i sire mase niwilạ su tukadẹ̌ su těngon Yehu. Bọu e i sire něniụ slompretẹ̌ dingangu němansagẹ̌, ”Yehu, ratu!”

¹⁴Kerene i Yehu nẹ̌sěkongkolẹ̌ dumokạ Datu i Yoram kụ su tempo ene, tangu ene su Yisreel. I Yoram sol᷊ong paị ene mědeạu makisal᷊imaẹ undangu manga lesẹ e kụ kinaěbakenge su ral᷊ungu pẹ̌sasekẹ su Ramot dimokạ si Hazael datun Siria. I Yehu nẹ̌bera su manga hapị e sěhal᷊ěkang manga mol᷊ensekẹ, ”Kereu i kamene mal᷊uasẹ̌ iạ makoạ datu, lukadeko tadeạu kumbahang piạ u sarang sěngkatau makasěbang bọu Ramot měhabarẹ̌ su taumata su Yisreel.”

¹⁶Bọu ene i sie simake karetan sekẹ e kụ bọu ene nẹ̌buạ sol᷊ong Yisreel. Su tempo ene i Yoram den tawe naul᷊e wọu sakị e ringangu i Ahazia ratun Yehuda ene sene nẹ̌tiwo si sie.

¹⁷Piạ e lukadu měnaran soan Yisreel nakasilo si Yehu ringangu taumatane riměnta e, i sie nẹ̌kiạ u, ”Piạ taumata sěnggạpaěng mẹ̌tẹ̌timona tampạ ini!” I Yoram simimbang, ”Dolohẹ̌ko sordado piạ kawal᷊one sěngkatau kụ dakọko pěnẹ̌sui měnsang i sire e hapị arau rokạ.”

¹⁸Kạsakene kawal᷊o, rimal᷊engke sordado e himaung si Yehu e ringangu nẹ̌bera, ”Datu e kai mapulu mědeạu makakasingkạ u měnsang i Tuang diměnta ute ringam bue.” ”Ene wal᷊inewe urusangu!” sasimbang i Yehu, ”Mahịe pẹ̌těngkal᷊aụ e ringangku.” Lukadu měnara ene nakasilo sordado ene narěnta su ghapaěng i sire ene, kaiso tawe nẹ̌sul᷊e. Tangú i sie nělaporu hal᷊ẹ̌ ene,

¹⁹mase nirolohe sordado wal᷊ine sěngkatau. Sordado ene mal᷊aing nakiwal᷊o kerene si Yehu, dingangu sěnsul᷊eko l᷊ai i Yehu simimbahẹ̌, ”Ene wal᷊inewe urusangu! Mahịe pẹ̌těngkal᷊aụ dingangku!”

²⁰Lukadu měnara saụewe nělaporu u rarolohang ene e seng nahumpạ su ghapaěng ene e kaiso tawe nẹ̌sul᷊e. Bọu e i sie něnambako l᷊ai, ”Aramanung těmbonang u ghapaěng ene ute i Yehu, batụu i sie simake karetan sekẹ e kai mẹ̌sul᷊ungu tau pulu.”

²¹”Riahiko karetaku,” parentan Datu i Yoram. Kareta niriahi, bọu ene i Yoram dingangu Ratu i Ahazia nẹ̌buạ nẹ̌sombang i Yehu, sěngkatau-sěngkatau su ral᷊ungu karetane hala. I sire nẹ̌sombang dingangi i Yehu rahami nạung tataghuaneng i Nabot.

²²”Kụ i kau e riměnta ute hapị?” kakiwal᷊ong Yoram si Yehu. I Yehu simimbang, ”Mariadiwe hapị kereapa, kereu sini e měngkawe lawọ tahahopa, ringangu wědam piạ pananěmba su mahan duata niwahětang Izebel i ninangu e?”

²³”Ini e pẹ̌tatul᷊ang, Ahazia!” i Yoram kapẹ̌kiạ e apidu kạpěmal᷊engkọ e karetane mase timal᷊angu wadange.

²⁴I Yehu něngěnnạe papitị e sěngapang kasariang toghase kụ němitị si Yoram su l᷊ikude timěpasu pẹ̌pusone. I Yoram nawatang, ringangu napinsul᷊ẹ̌ singongone su ral᷊ungu karetane.

²⁵ Mase angkuěng i Yehu si Bidkar tumatakinge, ”Apa i kau wědangbe makạtahěndung su piạ i kitẹ e su sake kawal᷊o kạtol᷊ene si Ahab, i amang i Yoram? Su tempo ene MAWU e něhengetang si Ahab, ’Iạ masingkạ u i sai němate si Nabot dingangu manga anạ e kahěbi, ringangu iạ nẹ̌kědo sarung měhukung i kau su rahami ini e lai.’ ” ”Ual᷊ingu ene,” angkuěng i Yehu su pakirine, tuhụ e, ”bahungke maieti Yoram ene su sasuang i Nabot, tadeạu misěhụ hukumang u Ruata e waugʼi sie.”

²⁷I Ahazia nakasilo apan seng nariadi e, kụ i sie timal᷊angu karetane nẹ̌timona soam Bet-Hagan. I Yehu něnahusu si sie ringangu něheang su taumatane, ”Patẹ e lai i sie!” I sire němitị si sie ringangu napakal᷊esẹ i sie su ral᷊eng mẹ̌tẹ̌timona sol᷊ong Gur, maraning soan Yibleam. Kaiso i sie nakatal᷊angu wadange sol᷊ong Megido, kụ sene i sie nate.

²⁸Kal᷊awọu sawohị e němpěngal᷊ạ maiete ringangu nisul᷊ene su kareta sol᷊ong Yerusalem, bọu e nilěbinge su ral᷊ungu pěndal᷊ẹ̌bingang u mararatu su Soan Daud.

²⁹I Ahazia nakoạ datun Yehuda piạ e Ratu i Yoram ahusi Ahab kụ seng nẹ̌parenta Israel mapul᷊o ěsa su taunge.

³⁰Narěntạ e i Yehu su Yisreel. Bọuten i Izebel nakaringihẹ̌ mạanung apan sen nariadi e, i sie něhunduge utạ e wọu e nẹ̌pakẹ u ral᷊ěgahe mase kimakurung bọu janelang istana.

³¹Piạ i Yehu nasuẹ̌ bọu tukadu pasěllangeng, i Izebel nẹ̌kiạ e, ”Ei Zimri,[12] tahapate! Kai mẹ̌kapura i kau e sini?”

³²I Yehu rimal᷊ingara janela kụ nẹ̌bera, ”I sai tumatawang si siạ?” Nakaringihẹ̌ ene, darua arau těllung katau sawohị u istana kimakurung.

³³I Yehu nẹ̌bera si sire, ”Tanaẹ e rěmmẹ e i sie!” Tangú i sire něnděmmẹ e si Izebel tanạe bọu e i sie niěpisang u kareta hakịu rahane něměsị sol᷊ong meselẹ̌ dingangu su manga kawal᷊ong sire ene.

³⁴Mase i Yehu simuẹ̌ e su ral᷊ungu istana kụ kimaěng. Bọu e i sie nẹ̌bera, ”Bawine ene e kawontogang. Maningbe kerene, lěbingke lai maiete batụu i sie kai sangiangu ratu.”

³⁵Kai piạ i sire tamai němpěngal᷊ạ maiete mědeạu ilẹ̌bing, i sire kětạeng nakaěbạ daran těmbọ e, ringangu manga ruhin takiahe ringangu laede.

³⁶ Bọuten hal᷊ẹ̌ ene nihabarẹ̌ si Yehu, nẹ̌berạ e i sie, ”Ini e kai seng nitighadu MAWU piạ i Sie něhengetang kere ini su ěllangʼE i Elia: ’Maieti Izebel sarung kinaseng u asu su wanuang Yisreel,

³⁷dingangu makoạ tawe kěhase maietẹ̌ ene kụ sarung mẹ̌sal᷊iawuhẹ̌ kere taim binatang hakịu tawẹ u sarang sěngkatau makakiral᷊a měnsang maieti sai ene.’ ”