Read Sangir KARARATUANG HUMOTONG 10 Bible Online

KARARATUANG HUMOTONG 10 - Sangir bible

KARARATUANG HUMOTONG 10

¹Tau Pilistin nẹ̌sekẹ dingangu tau Israel. I sire němpẹ̌paraěng su wul᷊udu Gilboa. Lawọ taumatang Israel něngkapate sene ringangu lěmbene nasowa l᷊ai Ratu i Saul dingangu manga ahuse němpahuntal᷊ang u wadange.

²Arawe i sire nituhukangu tau Pilistin dingangu těllung katau wọu tal᷊oaram manga ahusʼi Saul nipate, kụ i Yonatan, i Abinadab, dingangu i Malkisua.

³Pẹ̌sasasekẹbe marehe si Saul nangělikụ e, ringangu i sie hala e kinahinoěngu manga papitị u rokạ hakịu i sie nal᷊esẹ.

⁴Tangú angkuěng i Saul su apam mangangudạ kụ měmpẹ̌bẹ̌bawa aghidẹ̌ e, ”Sawụ e pedanu kụ pilị e iạ tadeạu kumbahambe iạ pẹ̌taghunalangengu tau Pilistin kụ běgawe makakiral᷊a MAWU e.” Kaiso umbaseng ene tawe mapulu měmilị si Saul ual᷊ingu i sie e tumanịu matakụ. Ual᷊ingu ene i Saul něngal᷊ạ pedane hala mase nẹ̌těngkahakang badange su wowom peda ene.

⁵Su tempọeng umbaseng ene nakasilo si Saul sen nate ute, i sie mal᷊aing něhakam badange su wowom pedane, kụ bọu e nate.

⁶Tangú napohongke i Saul dingangu ahuse i sire těllu, kụ ual᷊ingu ene nasuẹ e lai kawasane.

⁷Piạ e kal᷊awọu tau Israelẹ̌ e kụ apam mạtanạ su wal᷊ang Yisreel nakaringihẹ̌ u sordadong Israelẹ̌ e seng nahuntal᷊ang, dingangu i Saul dingangkeweng manga ahusẹ̌ esẹ e seng nairị, i sire nahuntal᷊ang naněntangu manga soan sire. Bọu e tau Pilistin nakakaiang manga soa ene.

⁸Sěngkarịěllone piạ e tau Pilistin diměnta mědeạu měhampasẹ̌ manga maietẹ̌ e, i sire nakahombang si Saul dingangu manga ahuse esẹ i sire těllu seng nairị su wawul᷊urangu Gilboa.

⁹I sire něluạ pakeangu paraěng i Saul, dingangu něhěnsị těmbọ e, mase niwawane. Bọu ene i sire něndingọ u rarolohang sol᷊ong kạguwạu wanuang Pilistin baugu měhumpạ u habarẹ̌ mapia ene su wansa ringangu mahan duatan sire.

¹⁰Pakeangu paraěng i Saulẹ̌ e niresọ su ral᷊ungu wal᷊em pẹ̌tatahamawuang i sire, ringangu těmbọ e niwiting su ral᷊ungu wal᷊en Dagon, mahang duatan sire e.

¹¹Piạ e tumanạ u Yabes su Gilead nakaringihẹ̌ apa nạung nikoạ u tau Pilistin baugʼi Saul,

¹²taumata apang kawawahaniange sutal᷊oaran sire e tamai němpěngahạ maietʼi Saul dingangu manga ahuse, bọu e nẹ̌bawa sol᷊ong Yabesh. I sire nělěbing i sie su al᷊ungu kalu ghẹ̌guwạ sěngkalu, bọu e i sire nẹ̌puasa pitu ěllo karěngụ e.

¹³ I Saul napohong ual᷊ingu i sie tawẹ satiane su MAWU, ringangu tawe rimaringihẹ̌ manga parenta-Ne. I sie tawe nẹ̌gausẹ̌ tatualagu MAWU, kaiso kawe wọu manga himukudu taumata nate. Ual᷊ingu ene MAWU e něhukung i sie ringangu něnarakangu kal᷊aianenge si Daud anạ i Isai.