Read Sangir KARARATUANG HUMOTONG 11 Bible Online

KARARATUANG HUMOTONG 11 - Sangir bible

KARARATUANG HUMOTONG 11

¹Kal᷊awọu těmbonangu tau Israel diměnta su anun Daud su Hebron kụ něbera, ”I kami ini e ěgẹ u Mawu Ratu.

²Dem bědang kạngerẹ, saral᷊aing piạ i Saul bědang mẹ̌pẹ̌parenta si kami e, seng nal᷊ahẹu Ratu e měngahạ sordadong Israel suapangke i sire tamai mẹ̌paraěng. Kutẹu l᷊ai MAWU Ruatam Mawu Ratu e sen nẹ̌kědo u sembeng i Tuang sarung měngahạ umatʼE ringangu makoạ datun sire.”

³Tangú i Daud nẹ̌taingu pẹ̌kakakědo ringangu manga těmbonangu Israelẹ̌ e. Bọu e i sire nělanisẹ̌ si sie nakoạ datung Israel mẹ̌sul᷊ungu sen nikědong MAWU wọu i Samuel.

⁴ Kal᷊awọu tempon Datu i Daud dingangu kal᷊awọu sordadong Israel tamai něnekẹ soang Yerusalem. Su tempo ene soa ene arenge i Yebus, kụ pẹ̌tẹ̌tanakeng u tau Yebus, tumanạ u soa ene tutune.

⁵Tau Yebus seng nẹ̌bera si Daud, u i sie tawe masowa suakal᷊ẹ̌ kụ makasuẹ̌ su soan sire ene. Arawe i Daud, nakapul᷊aho těndạ batun sire isẹ̌sẹ̌bạ Sion. Su tempo ene i Daud seng něhabarẹ̌ su manga taumatane u taumata humotong němate sěngkatau tau Yebus e sarung makoạ mol᷊ensekẹ. Tangú ual᷊ingu i Yoab kawe kakal᷊imonaěnge něnekẹ tau Yebus, ute i sie ihengkẹ makoạ mol᷊ensekẹ. (I ninangi Yoab arenge i Zeruya.) Sarětạeng nakapul᷊aho těndạ batun Sion, i Daud nẹ̌tanạ sene. Kai ual᷊ingu ene nanětạ bọu tempo ene těndạ batu ene nisěbạ ”Soang Daud”.

⁸I Daud němangung kapia soa ene nanětạ su tampạ kụ nipakarangẹ u ěntana su sěmběkan dakị wọu wěntihe; bọu e pěmangunang ene e nitěpasi Yoab sarang nasue.

⁹I Daud kakạděngụ e, kakạtoghase, ual᷊ingu MAWU Limembong kawasa e nẹ̌tul᷊ung i sie.

¹⁰Seng ini e arengu manga pěrwiran Daud kụ timeleng. Sěndingangkeweng kal᷊awọu kawanuang Israel, i sire seng nẹ̌tawakal᷊i tadeạu i Daud makoạ datu kerẹewe seng niriandin MAWU. Kụ i sire e tatapẹ̌ měnananuilẹ̌ pẹ̌paparentane.

¹¹Pěrwira kahumotongange ute kai i Yasobam tau Hakhmoni, i sie e těmbonang u Komol᷊angu tahapẹ̌sekẹ těllung katau.[21] Bọu nạung su ral᷊ungu pẹ̌sasasekẹ sěmbaụ e i sie rimokạ 300 su kataune ringangu nakapate si sire kěbị e ringangu wěngkone.

¹²Taumata karuane su ral᷊ungu Komol᷊angu tahapẹ̌sekẹ těllung katau e ute kai i Eleazar anạ i Dodo wọu hěntong Ahohi.

¹³Su ral᷊ungu pẹ̌sasekẹ su Pas-Damim i sie nẹ̌tawakal᷊i su sěmběkan Daud dimokạ tau Pilistin. Piạ nạung sordadong Israelẹ̌ e nanětạ timal᷊angu watangenge, i sie ringangu manga taumatane nẹ̌dararagẹ̌ sutal᷊oarang dahaming gandung sěmbaụ e ringangu nẹ̌sekẹ dimokạ tau Pilistin ene. Bọu e MAWU něngonggọu watạ masaria si sie.

¹⁵Piạ su sěhěllo těllung katau wọu 30 su kataune pěrwiran Daud kapapiaěnge, tamai nẹ̌sombang i Daud su tampạ sěmbaụ pẹ̌kakěllungang i sire su wul᷊udu watu masandigu Liangu Adulam. Su tempo ene tau Pilistin nẹ̌daseng su Wal᷊ang Refaim, dingangu sěmpasukang bọʼi sire e kimaiang su Betlehem.

¹⁷I Daud dụdareạ u kamponge ikẹ̌kěndagẹ̌ e ringangu nẹ̌bera, ”Ah, iạ deng onggotangu pěnginung akẹ bọu sumu maraning tukadu pasěllangeng su Betlehem.”

¹⁸Nakaringihẹ̌ ene, pěrwira tatěllu ene natěpasu pẹ̌darasengangu tau Pilistin bọu e něnimbạ akẹ bọu sumu ene, bọu e niwawane sol᷊ong anun Daud. Kaiso i Daud e mạdiri měnginung e, katewe naměmbing ene nikoạ sasěmba su MAWU.

¹⁹I sie nẹ̌bera, ”Baugu Mawu Ruata e, iạ tawe makainung akẹ ini! Kereu iạ e měnginung, tabidạu iạ e měnginung dahan taumata kụ seng něnarakangu niawan sire!” Kụ i Daud mamben tawe mapulu měnginung akẹ ene. Kụ seng ene e pẹ̌bawawudin sire těllu wawahani kụ mal᷊ahasa ene.

²⁰I sire těllum pul᷊o su kataune manga pěrwira timeleng ene e mal᷊aing nisěbạ, ”Komol᷊angu tahạ katěllum pul᷊o su kataune”. I sire e lẹ̌ahakeng i Abisai tuaring Yoab. Bọu nạung i sie nakapate 300 su kataune ringangu ral᷊eange, kụ ual᷊ingu ene i sie timeleng. Kaiso i sie wal᷊inewe kere kawahaning Komol᷊angu tahapẹ̌sekẹ těllung katau ene.

²²Sěngkatau pěrwira timeleng lai wal᷊ine ute kai i Benaya anạ i Yoyada, tau Kabzeel. I sie enẹ e kawahanine. Piạ mol᷊ensekẹ darua ghaghuwạ bọu Moab kụ seng nịpapatene. Bọu nạung piạ sěhěllo kai piạ saldune, i sie simuẹ̌ sol᷊ong dal᷊ungu lohange sěmbaụ kụ němate singa sěmbaụ sene.

²³I sie nạung bọu l᷊ai němate tau Misirẹ̌ sěngkatau wal᷊akane ghẹ̌guwạ; dangẹ e něngalembo wọu rua meterẹ̌. Tau ene piạ aghide wěngko kụ enẹ e ghẹ̌guwạ; kaiso i Benaya e tumbạeng timatěngo ringangu pal᷊o-pal᷊o. Běngko su l᷊iman tau Misirẹ̌ e niahone mase nipakẹ e piněmate tau ene.

²⁴Seng ene e manga wudin Benaya e, sěngkatau wọu Komol᷊angu tahạ katěllum pul᷊o su kataune.

²⁵Su ral᷊ungu komol᷊ang ene e, seng i Benaya e kahoroěnge, kaiso i sie tawe kere Komol᷊angu tahapẹ̌sekẹ těllung katau kahuagate. I Daud něhengkẹ i sie nakoạ těmbonangu lukadu watangenge.

²⁶Tuhụ ini e ute kai manga pěrwira wal᷊ine kụ timeleng e. I Asael tuaring Yoab I Elhanan anạ i Dodo tau Betlehem I Samot tau Harod I Heles tau Peloni I Ira anạ i Ikes tau Tekoa I Abiezer tau Anatot I Sibkhai tau Husa I Ilai tau Ahohi I Maharai tau Netofa I Heled anạ Baana tau Netofa I Itai anạ i Ribai tau Gibea su wanuang hěntom Benyamin I Benaya tau Piraton I Hurai tau manga wal᷊ang Gaas I Abiel tau Araba I Azmawet tau Bahurim I Elyahba tau Saalbon I Hasyem tau Gizon I Yonatan anạ i Sage tau Harari I Ahiam anạ i Sakhar tau Harari I Elifal anạ i Ur I Hefer tau Mekherati I Ahia tau Peloni I Hezrai tau Karmel I Naarai anạ i Ezbai I Yoël tuhang i Natan I Mibhar anạ i Hagri I Zelek tau Amon I Naharai tau Beerot, mẹ̌bawawa aghidi Yoab I Ira ringangi Gareb tau Yetri I Uria tau Het I Zabad anạ i Ahl(...)