Read Sangir KARARATUANG HUMOTONG 12 Bible Online

KARARATUANG HUMOTONG 12 - Sangir bible

KARARATUANG HUMOTONG 12

¹Piạ i Daud timal᷊angu watangenge bọu Ratu i Saul, i sie nělingkạ sol᷊ong Ziklag. Mal᷊awọ bawahani kụ satia ringangu ěbạ e mal᷊awọ diměnta kụ nẹ̌těngkal᷊aụ dingang i Daud.

²I sire wọu hěntom Benyamin mẹ̌sul᷊ungi Saul. I sire e pande měmitị dingangu měngatipolẹ̌ — baẹ dingangu l᷊ima koaneng arau l᷊ima kaihi.

³Měngangahạ i sire e ute i Ahiezer dingangu i Yoas manga anạ i Semaa ringangu Gibea. Seng ini e manga wawahani ene: I Yeziel dingang i Pelet manga anạ i Azmawet I Berakha ringang i Yehu tau Anatot I Yismaya tau Gibeon, wawahani kụ timeleng nakoạ sěngkatau těmbonangu ”Komol᷊angu tahạ katěllum pul᷊o su kataune”. I Yeremia, i Yahaziel, i Yohanan dingangu i Yozabad tau Gedera I Eluzai, i Yerimot, i Bealya, i Semarya ringangu i Sefaca tau Harufi I Elkana, i Yisia, i Azareel, i Yoëzer dingangu i Yasobam bọu hěntong Korah I Yoëla ringangu i Zebaja manga anạ i Yeroham tau Gedor.

⁸Su tempong i Daud ene su tampạ piạ tatěndạ e su wanua l᷊inggi; lawọ bawahani timeleng dingangu ěbạ e mal᷊awọ bọu hěntong Gad diměnta nẹ̌těngkal᷊aụ dingange. I sire e kai wawahani mal᷊ahaěng mẹ̌pakẹ u kěllung dingangu wěngko; i sire kakěllaěng bawahani kere singa ringangu kakanoạ i sire maral᷊intoị kere rusa.

⁹Seng ini e manga areng i sire niuhụ tuhụ pangkate: i Ezer, i Obaja, i Eliab, i Mismana, i Yeremia, i Atai, i Eliel, i Yohanan, i Elzabad, i Yeremia, i Makhbanai.

¹⁴Sěmbahageang bọu taumatang Gad e kai manga pěrwira mararangẹ těmbonangu sěhiwu su kataune; sěmbageang lai wal᷊ine ute manga pěrwira těmbonangu pẹ̌tahạ mahasụ su kataune.

¹⁵Bọu nạung nariadi su wul᷊ang humotong piạ e nạung Sal᷊ụ u Yordan kapělẹ̌bane, manga pěrwira ene němpẹ̌liu sal᷊ụ ene ringangu něnokol᷊ẹ̌ tumanạu manga wal᷊ane baẹ su sěmběkaʼn dakị arau lai su sěmběkaʼm bahẹ bọu sal᷊ụ ene.

¹⁶Piạ tempo sěmbaụ sěngkomol᷊angu hěntom Benyamin dingangi Yehuda e tamai sol᷊ong těndạ u pẹ̌kakěllungang katatanakeng i Daud.

¹⁷I Daud nẹ̌sombang i sire ringangu nẹ̌bera, ”Kereu i kamene ruměnta kere hapị baugu mẹ̌tul᷊ungu iạ, ute mahịe pẹ̌těngkal᷊aụ dingang i kami. I kami e měnarimạ i kamene ringangu naungbe mal᷊uasẹ̌. Arawe kamagengu i kamene mẹ̌kẹ̌karaki měndal᷊aị si siạ su rokạ, ute manimbe iạ tawe mẹ̌koạ dal᷊akisẹ̌ si kamene, Duata kụ sẹ̌sěmbaěng i upung i kitẹ e masingkạ bue, ringangu i Sie sarung měhukung i kamene.”

¹⁸Sěngkatau woʼi sire kụ nạung i Amasai, kụ bọu ene nakoạ těmbonangu komol᷊ang isẹ̌sẹ̌bạ, ”Komol᷊angu tahạ katěllum pul᷊o su kataune,” pinẹ̌kawasaěngu Rohkẹ̌ u Ruata bọu e nẹ̌bera, ”Daud, anạ i Isai! I kami e tumatawang si kau! Mal᷊owọko i kau ringang i sire apang měnẹ̌nongka si kau e sarumbe piạ kětihe. Duata e ene ringangu!” Tangú i Daud naněnsomahẹ̌ si sire ringangu něhengkẹ i sire nakoạ pěrwira su ral᷊ungu wuntuangu sekẹ e.

¹⁹Piạ i Daud dingangu tau Pilistin nẹ̌mpẹ̌sekẹ u Ratu i Saul, sěmbahageang bọu sordadong hěntom Manasye limiu sol᷊ong sěmběkan Daud. Tumuhụ hinone i Daud tawe něnongka taumatang Pilistin ene. Manga těmbonangu Pilistin dimolohʼi sie pinakapul᷊ẹ sol᷊ong Ziklag ual᷊ingu i sire mạtakụ u i sie sarung lumiu sol᷊ong sěmběkan Datu i Saul dingangu měndal᷊aị si sire.

²⁰Seng ini e manga arengu wawahani wọu hěntom Manasye kụ limiu sol᷊ong sěmběkan Daud su tempong i sie suraral᷊engang sol᷊ong Ziklag: Adnah, Yozabad, Yediael, Mikhael, Yozabad, Elihu ringangu Ziletai. Sěngkatau-sěngkatau e mạněmbonang pẹ̌tahạ sěhiwu su kataune sordado.

²¹I sire e kai wawahani mal᷊ahasa ringangu lụontol᷊ẹ̌ si Daud dumokạ gěrombolang.[22] Su tempo samuri e i sire nakoạ manga pěrwira su ral᷊ungu wuntuangu mẹ̌sasekẹ u Israel.

²²Maraning apang kal᷊aěllo e piạ taumata wuhu kụ mẹ̌tẹ̌těngkal᷊aụ dingangi Daud, hakịu tawe nararěnnạ wọu ene buntuang i Daud e apạ e masaria-saria.

²³Su tempong i Daud su Hebron mal᷊awọ bawahani apan seng sěntiniạ nẹ̌těngkal᷊aụ u watangenge ringange. I sire naontol᷊ẹ̌ si sie tadeạu i sie wotonge makoạ datu měngaweng si Saul, natuhụ kere su kědom MAWU. Pẹ̌tatambaěng i sire e ute kai kere tuhụewe ini: Bọu hěnton Yehuda: 6.800 su kataune, nasukụ dingangu kělung ore lai wěngko. Bọu hěnton Simeon: 7.100 su kataune apang nawiasa. Bọu hěnton Lewi: 4.600 su kataune. Taumatang Yoyada těmbonangu hěnton Harun: 3.700 su kataune. Anạu sěmbaụ i Zadok, sěngkatau wawahani kawuhuang kụ bahani: 22 su kataune — kěbị e matimadu ral᷊ohom bal᷊e. Bọu hěntom Benyamin (hěnton Datu i Saul): 3.000 su kataune; kal᷊awokange wọu hěntom Benyamin tatapẹ̌ satia si Saul. Bọu hěntong Efraim: 20.800 su kataune timeleng su ral᷊ungu hěntone sěngkatau-sěngkatau. Bọu hěntom Manasye kụ su sěmběkam bahẹ bọu Sal᷊ụ u Yordan: 18.000 su kataune waugu mapakaiang i Daud makoạ datu. Bọu hěntong Isakar: 200 su kataune těmbonange ringangu(...)

³⁸Kal᷊awọu wawahani e nakoạ sol᷊ong Hebron kụ seng sadia mẹ̌sekẹ dingangu seng piạ karakine waugu měhengkẹ i Daud makoạ datung kěbị kasěllahu Israel. Dingangu patikụ tau Israel bal᷊ine e mal᷊aing sěngkanaung mẹ̌koạ hal᷊ẹ̌ ene.

³⁹Těllu ěllo karěngụe manga wawahani ene e mạtanạ sene ringangi Daud apidu mẹ̌sẹ̌sal᷊iwang dingangu mẹ̌tẹ̌temang kaěng dingangu inumang kụ nisadia waugi sire kahiang taumatang Israel bal᷊ine e.

⁴⁰Bọu manga hěnto wọu sěmběkan sawěnahẹ̌ sarang bọu maraune kụ kai wọu hěntong Isakar, Zebulon dingangi Naftali, taumata e mang kạpahunděntane ringangu kalide, onta, wagal᷊ẹ̌, dingangu sapi kụ naměhạ manga wawawaěnge manga kaěng: tapoěng, buang ara, kismis, anggorẹ̌ dingangu lanang zaitun. I sire lai němpẹ̌bawa sapi ringangu domba mědeạu potokang dingangu kanengang. Kěbị ene e měnẹ̌nodẹu apạe mal᷊uasẹ̌ kawanua su kasěllahu Israel.