Read Sangir KARARATUANG HUMOTONG 13 Bible Online

KARARATUANG HUMOTONG 13 - Sangir bible

KARARATUANG HUMOTONG 13

¹Ratu i Daud nẹ̌dal᷊ahintau ringangu kal᷊awọu pěrwirane měngẹ̌ngahạ komol᷊angu pětahạ sěhiwu su kataune ringangu komol᷊angu apang mahasụ su kataune.

²Bọu ene i sie nẹ̌bera su kěbị taumata ene, ”Kereu manga anạu sěmbaụ mal᷊uasẹ̌, dingangu apakawalang MAWU, Ruatang kitẹ e, ute mapiawe i kitẹ měndolohu rarolohang su manga imang dingangu tau Lewi su manga kampong i sire ringangu kal᷊awọu wansang kitẹ bal᷊ine e waugu měndolohi sire aparěnta pẹ̌tampung dingang i kitẹ e sini.

³Bọu ene i kitẹ e tamai měngal᷊ạ Petiʼm Pẹ̌darianding Mawu Ruata, kụ seng niwala nipakal᷊anting karěngụ u pẹ̌paparentang Datu i Saul.”

⁴Kal᷊awọu taumatang Israel apang nẹ̌tampung ene e mal᷊uasẹ̌ su těgu ene ringangu matarimạ bue.

⁵ Tangú i Daud něnampungu kawanuang Israel su kasěllahu wanua wọu pẹ̌saraěng u Misirẹ̌ sěmběkan timuhẹ̌ sarang dal᷊engu Hamat su sěmběkan sawěnahẹ̌, baugu měngal᷊ạ Petiʼm Pẹ̌dariandi ene wọu Kiryat-Yearim dingangu mẹ̌bawa ene sol᷊ong Yerusalem.

⁶ Bọu ene i Daud tamai ringang i sire sol᷊ong soang Baala kụ Kiryat-Yearim, su wanuang hěnton Yehuda waugu měngal᷊ạ Petiʼm Pẹ̌dariandin Duata. Peti ene nisěbạ, ”MAWU e mạintol᷊ang su wowong kerub”.

⁷Nahumpạ e su Baala, i sire něngal᷊ạ e Petim Pẹ̌dariandi ene wọu wal᷊eng Abinadab, wọu ene nilěngkang su wowon doda wuhu e sěmbaụ. I Uza ringangu i Ahyo tụtol᷊e roda ene,

⁸arawe i Daud dingangu kal᷊awọu tau Israelẹ̌ e mempẹ̌sẹ̌sal᷊ai ringangu měmpẹ̌kẹ̌kantarị mapia měngěngadatẹ̌ Mawu Ruata kapěnẹ̌nalange kěcapi, arabanạ, kapuracạ,[23] dingangu slompretẹ̌.

⁹Piạ i sire nahumpạ e su tampạ u pěndal᷊indaěng gandung tataghuaneng i Kidon, manga sapi apang měmpạmol᷊eng doda ene e nasangkong, kụ i Uza e něngul᷊uhu l᷊imane ringangu něngumbelẹ Petim Pẹ̌dariandi ene e tadeạu kumbahang manawo.

¹⁰Su tempo ene lai MAWU e limangehẹ̌ si Uza ual᷊ingu kakanoạ ene e mẹ̌sul᷊ungu lahinakang su MAWU. Bọu e i Uza e nipate-Ne sene. Tangú nanětạ bọu ene tampạ ene e nisěbạ ”Peres-Uza”.[24] I Daud limangehẹ̌ ual᷊ingu MAWU e něminasa si Uza.

¹²Arawe i Daud nạtakụ l᷊ai su Mawu Ruata ringangu nẹ̌bera, ”Kụ ini e kereapa Petim Pẹ̌dariandi ene e takụ nikawawa?”

¹³Ual᷊ingu ene i Daud tawe nisěhụ nẹ̌bawa Peti ene sol᷊ong Yerusalem, kaiso něndesọ u ene su wal᷊eng Obed-Edom, tau Gat.

¹⁴ Peti ene kạtatanạ sene těllu wul᷊ang karěngụe ringangu MAWU e něngal᷊amatẹ̌ balagi Obed-Edom dingangu kěbị apan tẹ̌taghuanenge.