Read Sangir KARARATUANG HUMOTONG 14 Bible Online

KARARATUANG HUMOTONG 14 - Sangir bible

KARARATUANG HUMOTONG 14

¹Datu i Hiram bọu wanuan Tirus něndingọ u manga rarolohang e sol᷊ong anun Daud, dingangu kalun cěmarang Libanon dingangu manga basẹ̌ u kalu ore lai basẹ̌ u watu měmětị istana.

²Ual᷊ingu ene i Daud maiakingu MAWU e seng napakaruị i sie nakoạ datung Israel dingangu napakatoghasu kararatuange waugu pandungangu umatu MAWU e.

³Su Yerusalem i Daud něngal᷊ạ lai kawinge pira-pirang katau, ringangu nakaěbạ lai manga ahuse.

⁴Manga Ahuse apang kinawantelẹ̌ su Yerusalem ute kai: i Syamua, i Sobab, i Natan, i Salomo,

⁵i Yibhar, i Elisua, i Elpelet,

⁶i Nogah, i Nefeg, i Yafia,

⁷i Elisama, i Beelyada[25] ringangi Elifelet.

⁸Piạ e tau Pilistin nakaringihẹ̌ u i Daud nihengkẹ nakoạ datun tau Israelẹ̌ e, i sire riměnta tadeạu měnamẹ si sie. Ual᷊ingu ene i Daud siměbang mẹ̌sekẹ dingang i sire.

⁹Těntal᷊ang ene tau Pilistin seng nasongo su Wal᷊ang Refaim dingangu namul᷊aho wal᷊ane ene.

¹⁰Nakaringihẹ̌ ene i Daud nakiwal᷊o su Ruata, ”MAWU, iạ e harusẹ̌ měngalo kal᷊awọu tau Pilistin ene? Lẹ̌ěnnaěng MAWU e sarung měngonggọu kal᷊auntu e si siạ?” ”Ho, seketẹe!” angkuěngu MAWU. ”Iạ sarung měngonggọu kal᷊auntu si kamene!”

¹¹Tangú i Daud dingangu wuntuange němpěngalo tau Pilistin ene su Baal-Perasim[26] dingangu namatạ si sire. Nẹ̌berạ e i Daud, ”Duata e seng nẹ̌pakẹ u iạ mẹ̌deạu měnggoghahẹ̌ těndạ u sekẹ kere lěba něnggolang patikụ e sěngkarial᷊ẹ̌.” Ual᷊ingu ene tampạ ene nisěbạ Baal-Perasim.

¹²Piạ e nạung buntuangu Pilistin e timal᷊ang, i sire tawe nakareạ loahe nakawawa manga mahang duatan sire. I Daud nẹ̌parenta tadeạu manga tul᷊ada ene pakịtutung.

¹³Tawe nararěnnạ tau Pilistin diměnta kụ němul᷊aho kapia Wal᷊ang Refaim.

¹⁴Sěnsul᷊eko l᷊ai i Daud nẹ̌dorong laahạ bọu Ruata, kụ Duata e simimbang, ”Kumbahang měngalo si sire wọu ini, kaiso ral᷊engke pělikụ dingangu alo e i sire wọu sěmběka, maraning manga kalung murbei.

¹⁵Kereu i kau rumaringihẹ̌ tingihu ral᷊empangu taumata mẹ̌bẹ̌barisẹ̌ su kotọu manga kakaluang ene, tamaị e, watụ u Iạ e sarung dumal᷊eng su těngonu waugu měmatạ sordadong Pilistin.”

¹⁶I Daud nẹ̌koạ apang niorong Duata e si sie. I sie ringangu wuntuange něnokol᷊ẹ̌ sordadon Pilistin pinakasohọ nanětạ bọu Gibeon sarang Gezer.

¹⁷Tangú timelengke areng i Daud suapan tampạ, dingangu MAWU napakariadim patikụ bansa e matakụ i Daud.