Read Sangir KARARATUANG HUMOTONG 15 Bible Online

KARARATUANG HUMOTONG 15 - Sangir bible

KARARATUANG HUMOTONG 15

¹I Daud němětị manga wal᷊e waugu watangenge su Soan Daud, dingangu něnadian tampạ baugu Petim Pẹ̌dariandin Duata bọu e něnakẹ tenta waugu Peti ene.

² I Daud nẹ̌bera, ”Kětạeng tau Lewi wotonge měhengkẹ Petim Pẹ̌dariandim MAWU, batụu kai i sire e nạung nipilen MAWU e waugu pěmasaěng Peti ene, ringangu mẹ̌tangkiang si Sie[27] sarang marěngụ-děngụ.”

³Tangú i Daud nẹ̌kui kal᷊awọu tau Israel diměnta sarang Yerusalem baugu mapěngal᷊ingu Petim Pẹ̌dariandim MAWU sarang tampạ e kụ seng nisạdiane.

⁴Bọu ene i Daud něngoro hěnton Harun dingangu taumatan Lewi e pinẹ̌tampung.

⁵Tangú wọu ghal᷊ipohong Kehat, hěnton Lewi, siměpụ e i Uriel něngahạ 120 su kataune ral᷊ohong ghal᷊ipoho ene.

⁶Wọu ghal᷊ipohong Merari siměpụ e i Asaya kụ něngahạ 220 su kataune.

⁷Bọu Ghal᷊ipohong Gerson siměpụ e i Yoël kụ něngahạ 130 su kataune.

⁸Bọu ghal᷊ipohong Elsafan siměpụ e i Semaya kụ něngahạ 200 su kataune.

⁹Bọu ghal᷊ipohong Hebron siměpụ e i Eliel kụ něngahạ 80 su kataune.

¹⁰Dingangu wọu ghal᷊ipohong Uziel siměpụ e i Aminadab kụ něngahạ 112 su kataune.

¹¹Bọu ene i Daud nẹ̌kui su Imang i Zadok dingangu Imang i Abyatar ringangu tau Lewi i sire ěnnung ene, kụ: i Uriel, i Asaya, i Yoël, i Semaya, i Eliel, dingang i Aminadab.

¹²Angkuěng i Daud si sire, ”I kamene kai pangahạu ghal᷊ipoho su ral᷊ungu hěnton Lewi. Ual᷊ingu ene, kiwuạko i kamene ringangu taumatan Lewi wal᷊ine e mapakasusim batangeng tadeạu makapangal᷊ing Petim Pẹ̌dariandim MAWU, Ruatang Israel, sarang tampạ kụ seng nisadia.

¹³Su tempọeng Peti ene waugu kahumotongange ial᷊ing, i kamene tawẹdise sene mẹ̌deạu apẹ̌bawa. Ual᷊ingu ene MAWU, Ruatang kitẹ, něhukung i kitẹ batụu i kitẹ e mạněmba si Sie tawe natuhụ kere su kapulu-Ne.”

¹⁴Kụ manga imang dingangu tau Lewi e napakasusing batangeng tadeạu makapangal᷊ing Petim Pẹ̌dariandim MAWU, Ruatang Israel,

¹⁵ Dingangu su tempoʼm Peti ene nial᷊ing i sire němasaěng suwěmbang i sire e ringangu papasanengang, tuhụ atoru MAWU e wọi Musa.

¹⁶I Daud mal᷊aing něngoro manga pangahạu tau Lewi e tadeạu měngoro pirang katau wọu hěnton sire e tadeạu pẹ̌kantarị dingangu pěnalangu manga lagun dal᷊uasẹ̌ su kěcapi ringangu kapuracạ.

¹⁷Bọu tal᷊oarang manga walagu mẹ̌kakantarị, i sire němile si sire ini e waugu apěnalangu kapuracạ nikoạ bọu uase laụu tambaga: I Heman anạ i Yoël, dingangu manga anạu sěmbaụ e kụ i sẹ̌sěbạ si Asaf anạ i Berekhya, ringangi Etan anạ i Kusaya, bọu ghal᷊ipohong Merari. Baugu apataking si sire ringangu pěnalangu kěcapi notẹ̌ e marangẹ nipile tau Lewi i sire ini: i Zakharia, i Yaaziel, i Semiramot, i Yehiel, i Uni, i Eliab, i Maaseya ringangu i Benaya. Baugu ipěnalangu kěcapi notẹ̌ e masanạ nipile taumatan Lewi kụ kai i sire ini: i Matica, i Elifele, i Mikneya, i Azazya, dingangu ruang katau měndariagạ u Wal᷊em MAWU e kụ kai i Obed-Edom, dingangu i Yeiel.

²²I Kenanya nipile waugu maněmbonang měnanalangu musikẹ̌ bọu hěnton Lewi e u i sie kai masasingkạu musikẹ̌.

²³I Berekhya ringangu i Elkana, ringangi Obed-Edom dingangi i Yehia nipile nakoạ měndal᷊ukadẹ̌ Petim Pẹ̌dariandim MAWU. Manga imang tuhụ e ini e: i Sebanya, i Yosafat, i Netaneel, i Amasai, i Zakharia, i Benaya ringangi Eliezer nipile waugu měniụ slompretẹ̌ su těngom Peti ene.

²⁵Tangú natamaị e Ratu i Daud, dingangu manga pangahạ u Israel dingangu manga pěrwira sarang bal᷊eng Obed-Edom baugu měngal᷊ạ Petim Pẹ̌dariandi ene ringangu sal᷊iwang gẹ̌guwạ.

²⁶Sapi esẹ pitum baụ dingangu domba pitum baụ nisěmba su Ruata ual᷊ingu i Sie seng nẹ̌tul᷊ungu tau Lewi kụ něhengkẹ Petim Pẹ̌dariandi ene.

²⁷Su tempo ene i Daud nẹ̌pakẹ u kakěngkaeng bọu hekạ leneng al᷊usẹ̌, kerene lai manga měnanalangu musikẹ̌ dingangi Kenanya pangahạ i sire, ringangu kal᷊awọu tau Lewi kụ něhengkẹ Petim Pẹ̌dariandi ene. I Daud, mal᷊aing nẹ̌pakẹ u pakeangu efod.[28]

²⁸Patikụ kawanuang Israel tamai timaking Petim Pẹ̌dariandi sarang Yerusalem, dingangu piạ bansagen dal᷊uasẹ̌, tingihu slompretẹ̌, napiri, kapuracạ, dingangu kěcapi.

²⁹Piạ e Peti ene kạbawawa simuẹ̌ sarang dal᷊ungu soa, i Mikhal ahusi Saul rimal᷊inge wọu janela, kụ nakasilo Ratu i Daud, mẹ̌sẹ̌sal᷊ai ringangu rụl᷊uasẹ̌. Tangú i Mikhal, nakapěndang nitahamuta nakasilo si Daud.