Read Sangir KARARATUANG HUMOTONG 16 Bible Online

KARARATUANG HUMOTONG 16 - Sangir bible

KARARATUANG HUMOTONG 16

¹Petim Pẹ̌dariandi ene nipělọ su ral᷊ungu tenta kụ seng nisạdian Daud baugu Peti ene. Bọu ene i sire něnarakangu sasěmba tẹ̌tutungang su Ruata ringangu sasěmbam pẹ̌darame su Ruata.

²Bọuteng i Daud něnarakangu sasěmba ene, i sie něngal᷊amatẹ̌ kawanua su arengu MAWU,

³bọu ene nẹ̌papahiạu kaěng ene kěbị si sire. Apan taumata sene, baewe esẹ arau wawine nakaěbạ gěsim binatang tinapa sěmpotọ, borotẹ̌ dingangu kukisẹ̌ piạ kismise.

⁴I Daud něhengkẹ tau Lewi pirang katau pěngahạ pẹ̌kakal᷊iomaneng su MAWU, Ruatang Israel, su těngong Petim Pẹ̌dariandi ene, ringangu kakantarị dingangu raralo.

⁵I Asaf nipile kere sěngkatau pangahạ e pinile ringangu i Zakharia tumatimbange. I Yeiel, i Semiramot, i Yehiel, i Matica, i Eliab, i Benaya, i Obed-Edom dingangu i Yeiel nioro pěnẹ̌nalangu kěcapi. I Asaf nioro pěnẹ̌nalangu kapuracạ,

⁶dingangu imang duang katau, kụ i Benaya, ringangi Yahaziel, nioro waugu sěntiniạ pěnẹ̌niụ slompretẹ̌ su těngom Petim Pẹ̌dariandi ene.

⁷Kai ene kahumotom-motongange i Daud něngoro si Asaf dingangu ringange pẹ̌kẹ̌kantarịu raralo su MAWU.

⁸Pakitarimakasẹko su MAWU, habarẹ̌ko kasěllahʼE, běkeko kakanoạʼE su tal᷊oarang manga wansa.

⁹Pẹ̌kantarịkon daralo waugu MAWU Ruata, pẹ̌dal᷊ahabarẹ̌ko kal᷊awọu munara-Ne kụ makạnaniang.

¹⁰Seng i Sie e kụ MAWU Mang Sěmbaụ; pakal᷊uasẹ̌ko, batụu i kitẹ e kai tataghuanengʼE; kěbị apang mạněmba si Sie pěmpahul᷊uasẹ̌ko.

¹¹Pẹ̌dorongko katoghasẹ̌ bọu anun Sie, paněmbako si Sie sidutu.

¹²Ei hěnton Yakub, ěllangu Ruata! Ei hěntong Israel, umatẹ̌ pinile-Ne! Pẹ̌tahěndungko kal᷊awọu karal᷊inaụ apang kinoạʼE, abe kiwul᷊eng kal᷊awọu manga putusangʼE.

¹⁴MAWU e kai Ruatang kitẹ, putusangʼE mariadi su kạguwạu dunia.

¹⁵I Sie hanesẹ̌ mẹ̌tẹ̌tahěndung pẹ̌dariandi-Ne, diandi-Ne sarang marěngụ-děngụ.

¹⁶ Pẹ̌dariandi ene kinoạʼE ringangi Abraham kụ bọu ene ringangi Ishak,

¹⁷ bọu ene nighuanting dingangi Yakub nakoạ pẹ̌dariandi kakalẹ̌ baugu umatu Israel.

¹⁸AngkuěngʼE, ”Ěntanang Kanaan sarung Takụ ionggọ si kau makoạ tataghuanenge pusakạu.”

¹⁹Nạung kal᷊imona e umatu MAWU e mẹ̌bẹ̌biahẹ̌ kere taumata raghị paị sene kal᷊awọ i sire tawe tumanị u.

²⁰I sire mẹ̌pẹ̌palilị bọu wansa sěmbaụ sarang bansa sěmbaụ, mạngal᷊ing bọu wanua sěmbaụ sarang banua wal᷊ine.

²¹ Arawe MAWU e tawe napakawalang sai-sai manědạ si sire; baugi sire e mararatu e pinaul᷊ikangʼE,

²²”Kumbahang měnal᷊ukạ taumata pinile-Ku, kumbahang mẹ̌koạ dal᷊akisẹ̌ su manga nabi-Ku.”

²³Pẹ̌kantarịko waugu MAWU, ei wanua patikụ, apang kal᷊aěllo e habarẹ̌ko habaru ral᷊uasẹ̌ batụu i Sie seng něngambang si kitẹ.

²⁴Běkeko kawawantugʼE su manga wansa ringangu kal᷊awọu kakanoạʼE kụ mahasa su kal᷊awọu taumata.

²⁵U kai masěllahẹ̌ MAWU e ringangu apạ e rẹ̌daloěng; i Sie hinong ikẹ̌katakụ limembo wọu patikụ mahang duata.

²⁶Manga mahang duatam bansa wal᷊ine e kětạeng tul᷊adang mahang duata arawe MAWU e kai měndariadi winangaeng masěllahẹ̌.

²⁷I Sie nanahiangkung kasěllahẹ̌ dingangu kawawantugẹ̌, bal᷊enʼE napenẹu kawasa ringangu ral᷊uasẹ̌.

²⁸Pẹ̌daloko MAWU e, ei kal᷊awọu taumata! Pẹ̌daloko kasěllahẹ̌ dingangu katoghasʼE.

²⁹Pẹ̌daloko arengʼE kụ mawantugẹ̌, dingangu wawako sasěmba su ral᷊ungu wal᷊enʼE. Paněmbako MAWU e ringangu pẹ̌pakẹ u pakeangu kal᷊iomaneng.

³⁰Pěmpẹ̌kendẹ e su těngo-Ne, ei patikụ dunia! Banua e matoghasẹ̌ tawe kumiọ.

³¹Ei langị dingangu runia, pěmpahul᷊uase! Pěhabarẹ̌ko su manga wansa u MAWU e kai Ratu!

³²Pěmpẹ̌gal᷊ẹ̌dụ e ei laudẹ̌ dingangu patikụ dal᷊ohone! Pěmpahul᷊uase ei manga wimbaenge, ringangu kal᷊awọu sasuange!

³³Manga kakaluang su kěhu e sarung měmpẹ̌tahimokoi watụ u MAWU e seng diměnta waugu mẹ̌parenta su dunia.

³⁴ Pakitarimakasẹko su MAWU, batụu i Sie kai mapia; kakěndagʼE kakalẹ̌ sarang marěngụ-děngụ.

³⁵Pẹ̌berako, ”O Ruata, Mananal᷊amati kami, ambangeko i kami e wọu kawasang manga wansa ringangu tampungko i kami e kapia tadeạu i kami e makitarimakasẹ dingangu mẹ̌dalo arengʼU susi!”

³⁶Pẹ̌daloko MAWU, Ruatang Israel, orasẹ̌ ini e ringangu sarang marěngụ-děngụ! Bọu ene kasěllahu umatu Israel nẹ̌bera, ”Amin”, bọu ene i sire nẹ̌dalo MAWU.

³⁷Bọu ene Ratu i Daud, něngoro si Asaf, dingangu taumatan Lewi lai wal᷊ine mẹ̌deạu tatapẹ̌ měngurusẹ̌ kal᷊awọu hal᷊ẹ̌ kụ piạ kal᷊ahěmpukange ringangu pẹ̌kakal᷊iomaneng su tampạ su piạ Petim Pẹ̌dariandim MAWU e kạdaresọ. Ěllo-ěllo i sire harusẹ̌ mělẹ̌hal᷊ẹ̌ sene,

³⁸tongkaěng i Obed-Edom anạ i Yedutun, dingangi sire 68 su kataune lai wal᷊ine kụ sěnggal᷊ipoho ringange. I Obed-Edom dingangi Hosa e kai lukadu manga tukadu pasěllangeng.

³⁹Kaiso i Zadok dingangu manga imang bal᷊ine e nioro tadeạu tatapẹ̌ pěngurusẹ̌ pẹ̌kakal᷊iomaneng su tampạu pẹ̌kakal᷊iomanengang su Gibeon.

⁴⁰Apang kamal᷊ukadẹ̌ dingangu wawěllo i sire hinong maněmba sasěmba tẹ̌tutungang su wowom pananěmbaěng natuhụewe kere su tiahane kụ nionggọu MAWU e su tau Israel.

⁴¹Imang i Zadok dingangu manga imang ene, nisumbalaěng i Heman dẹ̌duang Yedutun, dingangu taumata lai wal᷊ine kụ nitani nipile waugu pẹ̌kantarị u raralo waugu MAWU e ual᷊ingu kakěndagʼE kawe kakalẹ̌ e.

⁴²I Heman dẹ̌duang Yedutun mal᷊aing němunara waugu slompretẹ̌ dingangu simbal dingangu pakakasu musikẹ̌ lai wal᷊ine kụ nẹ̌nalangeng baugu tumaking kal᷊awọu kakantarị daralo. Kal᷊awọu ral᷊ohong ghal᷊ipohong Yedutun nioro waugu pẹ̌děndiagạ manga tukadu pasěllangeng.

⁴³ Bọu ene napul᷊ẹe patikụ taumata sarang bal᷊eng sire sěmbaụ-sěmbaụ. Kerene lai i Daud napul᷊ẹ baugu mẹ̌kakělla ral᷊ohom bal᷊ene.