Read Sangir KARARATUANG HUMOTONG 17 Bible Online

KARARATUANG HUMOTONG 17 - Sangir bible

KARARATUANG HUMOTONG 17

¹Samurin Datu i Daud nangindunụ su istanane, piạ su sěhěllo i sie nẹ̌kui su Nabi i Natan dingangu nẹ̌bera, ”Kakělla, iạ ini e matanạ su istana kụ nikoạ bọu kalun cěmarang Libanon, arawe Petim Pẹ̌dariandim MAWU e kětạeng su ral᷊ungu tenta!”

²I Natan simimbang, ”Koạ e kal᷊awọu karakin Tuang, batụu Ruata e mẹ̌tul᷊ung si Tuang.”

³Arawe su hěbi ěndaị ene Ruata e něhengetang si Natan,

⁴”Dakọko ringangu pěhabarẹ̌ko su ěllang-Ku i Daud tatanata-Ku e ini, ’Bal᷊inewe i kau e kụ sarung měndarisịu wal᷊e waugu Iạ e.

⁵Nanětạ bọu tau Israel Takụ niliwirẹ̌ bọu Misirẹ̌ sarang orasẹ̌ ini e bẹ̌dang tawẹ běke Iạ natanạ su ral᷊ungu wal᷊e sěmbaụ. Iạ e měngkate mẹ̌pẹ̌palilị dingangu mạtanạ su tenta sěmbaụ.

⁶Karěngụu pẹ̌papalilị-Ku ringangu tau Israel tawe nakịbal᷊o Iạ e su manga pangahạ apan Takụ nipile, apa sěbapẹ̌ e i sire tawe něndarisị u wal᷊e sěmbaụ bọu kalun cěmarang Libanon baugu Iạ e.’

⁷Ual᷊ingu ene, i Natan, pěhabarẹ̌ko su ěllang-Ku i Daud u Iạ e MAWU Kụ Limembong Kawasa e, něhengetang si sie, ’I kau e sen Takụ nial᷊ạ bọu pělahal᷊ěkangu e měngahạ domba su wimbaenge, ringangu Takụ nikoạ datu waugu umatẹ̌-Ku Israel.

⁸Iạ e seng nẹ̌tul᷊ung i kau waẹbe sarang apa i kau e, ringangu kal᷊awọu sekẹu e Takụ upuang su tempong i kau e mẹ̌sekẹ. I kau sarung Takụ ipakasěsahẹ̌ kere kal᷊awọu pangahạ e kụ kasariaěnge su dunia.

⁹Baugu umatẹ̌-Ku Israelẹ̌ e seng Takụ nisạdia tampạ baugu makoạ banuan sire tadeạu i sire makapẹ̌biahẹ̌ mal᷊enehẹ̌ tawẹ u relaing měnahaghe. Nanětạ bọu rarěntan sire sarang ěntana ini e nạung kal᷊imona, těntal᷊ang i sire ren tawẹ datun sire e, i sire e nialoěngu taumata kụ puluang su katatingkaịe. Kaiso hal᷊ẹ̌ ene semben tawe saụ nariadi. Iạ e nẹ̌diandi u sarung měmatạ kal᷊awọu sědụ i kamene, ringangu Iạ e sarung měngonggọu pal᷊ahěnto si kamene.

¹¹Kamagengu seng midatingu tempong papatenu kụ i kau e seng ilěbing su pěndal᷊ẹ̌bingang i upungu e, sěngkatau wọu ahusu e sarung Takụ i hengkẹ makoạ datu. Seng i sie e sarung měndarisịu wal᷊e-Ku. Kararatuange sarung Takụ i pakatoghasẹ̌, dingangu sarang marěngụ-děngụ sěngkatau wọu hitene sarung mẹ̌parenta kere sěngkatau ratu.

¹³ Iạ e sarung makoạ i amange ringangu i sie sarung makoạ ahusẹ̌-Ku. Iạ sarungbe tatapẹ̌ mẹ̌koạ mapia si sie tuhụewe kere su kědo-Ku. Riandi-Ku e si sie sarungbe Takụ umpaedang, bal᷊inewe kere Takụ nikoạ si Saul kụ seng Takụ nisuhudẹ̌ bọu kal᷊aianenge tadeạu i kau e wotongewe makoạ datu.

¹⁴Ahusu Takụ nipile ene sarung Takụ koateng datu waugu umatẹ̌-Ku ringangu kararatuang-Ku sarang marěngụ-děngụ, ringangu anạ pulunge mẹ̌bẹ̌bawělasẹ̌ e sarung mẹ̌parenta kere sěngkatau ratu.’ ”

¹⁵I Natan naul᷊ị si Daud, kal᷊awọu apan seng nilahẹu Ruata si sie.

¹⁶Bọu e simuẹ̌ e Ratu i Daud, sarang dal᷊ungu Tentaʼm MAWU. I sie naiang dingangu nẹ̌kal᷊iomaneng, ”O MAWU Ruata, iạ dingangu walagẹ̌ku e tawe hinone měnarimạ kal᷊awọu kapia kụ nitodẹu si siạ karěngụu ini.

¹⁷I Kau katewe mundangu nẹ̌koạ něngalembo wọu ene; i Kau e seng nẹ̌diandi su hal᷊ẹ̌u hiteku e waugu tempo sarung damahi e. I Kau mal᷊ạ katewe niẹ̌bạu iạ e kere sěngkatau masěllahẹ̌.[29]

¹⁸Apa l᷊ai takụ i kapẹ̌bera si Kau e o MAWU, Ruata? I Kau e masingkạ u patikụ mạanung ěllangʼU e ini, kaiso i Kau e nẹ̌gěllịu pěngangadatẹ̌ e si siạ.

¹⁹Ual᷊ingu kapulu-Nu e sẹ̌sanu ringangu waugu pandungangku e i Kau e nẹ̌koạ patikụ kakanoạ masěllahẹ̌ ini e, ringangu mal᷊ahẹ.

²⁰Kẹ̌tạembeng i Kau e Ruata, tawẹ apa kụ deng mẹ̌sul᷊ung i Kau. I kami e masingkạ u hal᷊ẹ̌ ene, watụ u sen takụ nihabarẹ̌ deng bẹ̌dang kal᷊imona-mona.

²¹Su patikụ dunia e tawẹ apa wansa kere Israel. Israel kai wansa mang sěmbaụ kụ niliwiru wọu pẹ̌tatahamawuang mẹ̌deạu makoạ umatʼU e hala. Kal᷊awọu kakanoạ masěllahẹ̌ dingangu makạdal᷊inaụ kụ kinoạu e waugi sire nakateleng arengʼU e su kasěllahu dunia. I Kau e napasẹ̌bangu umatʼU e wọu Misirẹ̌ e ringangu napakatal᷊angu manga wansa wal᷊ine e su tempong umatʼU e tamai němpẹ̌sekẹ.

²²Tau Israel sen kinoạʼU umatʼU e hala sarang marěngụ-děngụ. Dingangu i Kau e, o MAWU nakoạ Duatan sire.

²³Orasẹ̌ ini o MAWU Ruata, mal᷊owọko manoghasẹ̌ sarang marěngụ diandi kụ niweranʼU mạanung batangengku ringangu pal᷊ahiteku e. Mal᷊umbạko reng měndal᷊engu apan seng kinẹ̌donʼU ene.

²⁴Suapan tampạ taumata sěntiniạ mang hanesẹ̌ mẹ̌mantugẹ̌ arengʼU ringangu mẹ̌bẹ̌bera u, ’MAWU Kụ Limembong Kawasa e ute kai Ruatan tau Israel.’ Baugu sarang marěngụ-děngụ sěngkatau wọu hiteku e sarung mẹ̌parenta kere sěngkatau ratu.

²⁵Iạ e mẹ̌tumbahanim batangeng mapakahumpạu kakal᷊iomaneng ini e si Kau, o Ruata, batụu kai i Kau sẹ̌sanu e seng něhabarẹ̌ si siạ u anạ pulungku mẹ̌bẹ̌bawěllasẹ̌ sarung koatengu e ratu waugu wansa ini.

²⁶I Kau e MAWU, kai Ruata, ringangu hal᷊ẹ̌ kụ mal᷊ěnggihẹ̌ ene e seng niriandi-Nu e si siạ.

²⁷Ual᷊ingu ene, iạ e, mal᷊owọko měngal᷊amatẹ̌ hiteku e tadeạu sarang marěngụ-děngụ e i sire tatapẹ̌be makạpěndang kakěndagʼU. U i Kau e seng něngal᷊amatẹ̌ umatʼU, o MAWU, tangu i sire sarungbe tatapẹ̌be al᷊amateng sarang marěngụ-děngụ.”