Read Sangir KARARATUANG HUMOTONG 18 Bible Online

KARARATUANG HUMOTONG 18 - Sangir bible

KARARATUANG HUMOTONG 18

¹Tawe nararěnnạ i Daud bọu e nangalo ringangu namatạ tau Pilistin dingangu němul᷊aho soang Gad, dingangu manga soa rarodọ mạngělikụ e.

²I Daud mal᷊aing namatạ tau Moab, hakịu i sire nẹ̌samal᷊ẹ dingangu němaehẹ̌ gaghěllị si sie.

³Bọu ene i Daud namatạ si Hadadezer, datu su Zoba, maranim banuang Hamat su wahageangu Siria. Su tempo ene, i Hadadezer kai su raral᷊engang mẹ̌deạu měngawasa wanua maraning ul᷊un Sal᷊ụ u Efrat.

⁴I Daud němul᷊aho karetan sekẹ 1.000 su waụ e, ringangu něnaweng sordado piạ kawal᷊one 7.000 ringangu sordado rụdal᷊engu laedẹ̌ 20.000 su kataune. I sie napakapeạu patikụ kawal᷊o e, sul᷊iung sěmbahageang, kapapiane waugu karetan sekẹ 100 su waụ e.

⁵Tau Siria wọu Damsyik něndingọu sordado tadeạu pẹ̌tul᷊ung Datu i Hadadezer, kaiso i Daud namatạ si sire, ringangu napakapaten sire 22.000 su kataune.

⁶Bọu ene i sie něndarisị u manga pẹ̌darasengangu sordado su ral᷊ungu wanuan sire ringangu i sire nẹ̌samal᷊ẹ ore lai němaehẹ̌ gaghěllị si sie. MAWU e nangonggọu kal᷊auntu si Daud, walạewe suapam pẹ̌seketange.

⁷Manga kěllung bul᷊aeng kụ nipakẹ u sordadong Hadadezer nipul᷊ahon Daud kụ niwawa sarang Yerusalem.

⁸ Su l᷊iung ene i Daud mal᷊aing něngal᷊ạ bul᷊aeng kal᷊aukangu tambaga mal᷊awọ-l᷊awọ bọu Tibhat dingangu Kun, manga soa kụ nạung kal᷊imona e su kawasang Hadadezer. (Su tempo tuhụ e kal᷊awọu wul᷊aeng kal᷊aukangu tambaga ene nipakẹ i Salomo waugu mẹ̌koạ tampạu akẹ, dingangu manga rihi, ringangu manga apal᷊iwụu pẹ̌kakal᷊iomaneng su Wal᷊em MAWU.)

⁹Datu i Tou wọu Hamat, nakaringihẹ̌ u i Daud, seng namatạ kal᷊awọu sordadong Hadadezer.

¹⁰Tangú i sie něndolohi Yoram ahuse apělẹ̌habaru adatẹ̌ su Ratu i Daud, dingangu apẹ̌bẹ̌berang sal᷊amatẹ̌ su pěmamatạ e ene, batụu i Hadadezer seng sěntiniạ mẹ̌sẹ̌sekẹ dingangi Tou. I Yoram diměnta su anung i Daud apidu nẹ̌bawa poroseěng bul᷊aeng, sal᷊aka, ringangu kal᷊aukangu tambaga ringangu timběha mawira.

¹¹Datu i Daud něnarakangu sasěmba ene ghaghěllị su MAWU mědeạu i pakẹ su ral᷊ungu pẹ̌kakal᷊iomaneng. Kerene lai kinoạ e ringangu manga apal᷊iwụ bul᷊aeng dingangu sal᷊aka kụ nihampase wọi Hadadezer dingangu manga wansa kụ niwatạ e, kere manga kawanuang Edom, Moab, Amon, dingangu Pilistin dingangu Amalek.

¹² I Abisai (i ninange i sẹ̌sẹ̌bạ si Zeruya) němatạ dingangu němate 18.000 su kataune tau Edom su Wal᷊ang Asin

¹³bọu ene napararisị u manga raseng u sordado e su kasěllahu Edom. Tangú nẹ̌subạ e tau Edom e su Ratu i Daud. MAWU e něngonggọu watạ si Daud suapạeweng i sie mẹ̌sekẹ e.

¹⁴Kerene i Daud, nẹ̌parenta kasěllahu Israel dingangu něndiagạ tadeạu kawanuane hanesẹ̌be kẹ̌koateng su kạadile ringangu kẹ̌koatengbe pakapia.

¹⁵Seng ini e manga mapapangkatẹ̌ mararangẹ e nihengkẹ i Daud: Mol᷊ensekẹu ghal᷊ipohong sordado e: I Yoab, tuhang i Abisai. Mamamohẹ u Istana: I Yosafat anạ i Ahilud. Manga imang: I Zadok anạ i Ahitub dingangu Ahimelekh anạ i Abyatar. Mamamohẹu něgara: I Sausa.[30] Těmbonangu měndal᷊ukadẹ̌ batangengu ratu: I Benaya anạ i Yoyada. Manga ahusi Daud mạngumpaedẹ̌ diabatang mapia su ral᷊ungu pẹ̌paparenta.