Read Sangir KARARATUANG HUMOTONG 19 Bible Online

KARARATUANG HUMOTONG 19 - Sangir bible

KARARATUANG HUMOTONG 19

¹Tawe nararěnnạ wọu ene, i Nahas, datung Amon naněntangu dunia, kụ i Hanun ahuse nakoạ datu.

²Bọu ene něhengetangke Ratu i Daud, ”I Nahas, ute kai hapịku satia, kụ iạ hinong kerene lai waugi Hanun, anạ e.” Ual᷊ingu ene i Daud, něndingọ u rarolohang sarang banuang Amon, baugu pěhiborẹ̌ si sie su papateng amange. Piạ i sire e nahumpạu Amon,

³manga těmbonangu wanua ene němpẹ̌bera su Ratu i Hanun, ”Kumbahangbe i Tuang mẹ̌tiněnnang Daud něndingọu rarolohange ene, ual᷊ingu i sie mapulu měngadatẹ̌ si amang i Tuang! I sie něndolohi sire ene ramahi tabidạ u mananitị baugu i pananẹ̌sui wanuang kitẹ, tadeạu makapul᷊aho!”

⁴Ratu i Hanun, něnamẹ manga rarolohang i Daud ene, něngul᷊ụ manga wianggụ i sire e, němpamotọ pakeang i sire e kere nandụu pěnadẹ̌, dingangu nangoro si sire pinakapul᷊ẹ.

⁵Kaiso i sire e mamea mapul᷊ẹ, kụ i sire e nakoạ sarang Yerikho. Piạ e hal᷊ẹ̌ ene nihabarẹ̌ su Ratu i Daud, i sie timanata tadeạu manga rarolohang ene e katanạ su Yerikho sarang manga wianggụ i sire e seng saụ timuwo kapia.

⁶Bọu ene Ratu i Hanun dingangu tau Amon, nakahěngangke u kakanoạ i sire e kai nakakakariadin Daud e simědụ si sire. Ual᷊ingu ene i sire e něndingọ u sal᷊aka 34.000 su kilone, sarang banuang Mesopotamia su Wowone, ringangu sarang Maakha, ringangu Zoba su Siria, waugu pěnewa karetan sekẹ 32.000 su waụ e ringangu sordado piạ kawal᷊one. Tangú riměntạ e sordadong datu i Maakha, ringangu kal᷊awọu karetan sekẹ nisewa ene, ringangu nẹ̌daseng su rěduhu Medeba. Tau Amon mal᷊aing diměnta wọu patikụ soan sire mẹ̌deạu mẹ̌sekẹ.

⁸Piạ i Daud nakaringihẹ̌ hal᷊ẹ̌ ene, i sie něndolohi Yoab, dingangu kal᷊awọu sordadone tamai pẹ̌tumbahani pěndokạ sekẹ.

⁹Tau Amon simẹ̌bang kụ něngatorẹ̌ barisang i sire su těngon tukadu pasěllangengu Raba, i něngen soan sire, arawe mararatu kụ seng diměnta mẹ̌deạu montol᷊ẹ̌ si sire e, němpěngatorẹ̌ barisang i sire e su wimbaenge.

¹⁰I Yoab nakasilo u i sie e nahepesu wuntuangu sědụ su těngone, ringangu su l᷊ikude. Ual᷊ingu ene i sie němile sordadong Israel kapiaěnge dingangu naměllọ i sire e nipẹ̌těngong manga sordadon Siria.

¹¹Lembone wọu sordadong Israel nisarakange si Abisai tuarine, kụ nangatorẹ̌ barisang i sire nipẹ̌těngon sordadong Amon.

¹²I Yoab nẹ̌bera su tuarine, ”Kamagengu iạ e seng tawe makaumal᷊ẹ̌ mẹ̌těngon sordadon Siria e, lighạko rěnta pětul᷊ungu iạ. Arawe kamagengu i kau e seng tawe makatahang mẹ̌těngon sordadong Amon e tangú iạ e hẹ̌don duměnta mẹ̌tul᷊ung i kau.

¹³Pakatahang bue! Mahiko i kitẹ e reng mẹ̌tawakal᷊i mẹ̌tumbahani waugu wansang kitẹ e ringangu waugu manga soan Duatang kitẹ e. Karimạko MAWU e měndal᷊engu apang kapulu-Ne.”

¹⁴I Yoab dingangu wuntuange timiol᷊ẹ̌ něngalo, hakịu sordadon Siria e timal᷊ang.

¹⁵Piạ e tau Amon nakasilo sordadon Siria timal᷊angu wadang i sire e, i sire mal᷊ain timal᷊ang bọu anung Abisai kụ simohọ sarang dal᷊ungu soa. Bọuten nanekẹ tau Amon, i Yoab napul᷊ẹ sarang Yerusalem.

¹⁶Tau Siria e seng nakahěngangu i sire seng niwatạ u tau Israel. Tangú i sire nẹ̌kui těntaran sire kụ bọu wanua su sěmběkan dakị wọu Sal᷊ụ u Efrat, ringangi něndolohu sordadone ene, pinẹ̌sekẹ su kawasang pangahạ e i Sobakh mol᷊ensekẹu wuntuangu sekẹ i Hadadezer datun Zoba.

¹⁷Nakaringihẹ̌ hal᷊ẹ̌ ene, i Daud něnampung kal᷊awọu wuntuangu Israel, bọu ene, limiu Sal᷊ụ u Yordan dingangu něhundugẹ̌ barisange nẹ̌těngon tau Siria. Tangú nẹ̌sekẹ e i sire,

¹⁸ringangu sordadon Siria e, nisekehe kahian sordadong Israel. I Daud dingangu wuntuange napakawihuang 7.000 su kataune měngangul᷊ing karetan sekẹ dingangu 40.000 su kataune sordado rụdal᷊engu laedẹ̌. I Sobakh mol᷊ensekẹ u Siria ene mal᷊aing nipate.

¹⁹Piạ e manga ratu ene kụ pinẹ̌kawasaěng i Hadadezer nakasilo u i sire seng niwatạ u sordadong Israel, i sire nẹ̌dorong nẹ̌dame ringangi Daud, dingangu nẹ̌suba si sie. Bọu ene tau Siria e selaing mạdiri maontol᷊ẹ̌ su tau Amon.