Read Sangir KARARATUANG HUMOTONG 20 Bible Online

KARARATUANG HUMOTONG 20 - Sangir bible

KARARATUANG HUMOTONG 20

¹ Musungu mal᷊ěhubẹ̌ e tuhụ e, su tempong manga ratu wiasane rumal᷊eng mẹ̌sekẹ, i Yoab napasěbangu patikụ sordadone kụ němul᷊aho wanuang Amon. Su tempo ene Ratu i Daud tẹ̌bewe su Yerusalem, kụ mạdiri tumol᷊e. I Yoab dingangu sordadone něliwung soang Raba, bọu e něngalo kụ napakagholọ u soa ene.

²Bọu ene i Daud, diměnta kụ něhuwo apal᷊iwụ pul᷊aho e lawọ-l᷊awọ bọu soa ene. Bọu tal᷊oarang manga apal᷊iwụ ene piạ makotan datu i Amon. Makota ene wěhạ e mangawe 34 su kilone (kg) ringangu piạ dal᷊ẹ̌gahe paramata sěmbaụ. I Daud něngal᷊ạ paramata ene ringangu něnangẹ u ene su makotane sẹ̌sane.

³Bọu ene i Daud něhengkẹ tumanạu soang Raba ene, ringangu něnihasa si sire něhal᷊ẹ̌ dingangu lahaghari, pacolẹ̌, dingangu wal᷊iung. Hal᷊ẹ̌ ene kinoạ e lai su manga soang Amon lai wal᷊ine. Bọu ene i Daud, dingangu kal᷊awọu sordadone nẹ̌sul᷊e sarang Yerusalem.

⁴Tawe nararěnnạ samuring ene e nạběsẹe lai sekẹ dumokạ tau Pilistin su Gezer. Su ral᷊ungu pẹ̌sasekẹ sěmbaụ ene su Sibkhai tau Husa e němate ansuang sěngkatau arenge i Sipai. Tangú tau Pilisting ene e kinawatạko l᷊ai.

⁵ Su ral᷊ungu pẹ̌sasekẹ bal᷊ine e rimokạ tau Pilistin, i Elhanan anạ i Yair němate si Lahmi anau sěngkataung Goliat tau Gat. Pul᷊un dal᷊eang i Lahmi ene kạguwạ e kere kalu apal᷊iwụ u kakahiwuang.

⁶Su ral᷊ungkem pẹ̌sasekẹ bal᷊ine lai su Gat piạ ansuang sěngkatau kụ tal᷊imědon limane ěnnungu wua suapan takiahe ringangu kamokọu laede ěnnungu wua suapang laede. I sie kai hěntong ansuang nạung kal᷊imona.

⁷I sie nẹ̌baheaun tau Israel, kụ ual᷊ingu ene i sie nipaten Yonatan, anạ i Simea tuhang i Daud.

⁸I sire těllu nipaten Daud dingangu wuntuange ene e kai hentong ansuang su Gat.