Read Sangir KARARATUANG HUMOTONG 21 Bible Online

KARARATUANG HUMOTONG 21 - Sangir bible

KARARATUANG HUMOTONG 21

¹Setange mapulu manilakạ tau Israel; ual᷊ingu ene, i sie měngologẹ̌ si Daud tadeạu pẹ̌koạ pěndarol᷊ẹ̌.

²Tangú nẹ̌berạ e i Daud si Yoab, dingangu kal᷊awọu pěrwiran sordadone, ”Pẹ̌koạko pěndarol᷊ẹ̌ su kasěllahu Israel sarang manga weọ e, ual᷊ingu iạ e mẹ̌deạu makakasingkạ kai pira kal᷊awọu kawanuang Israel.”

³Angkuěng i Yoab, ”Mal᷊owọko MAWU e mapẹ̌dal᷊embong kawanuang Israel sarang 100 su sul᷊ene kal᷊awọe wọu kal᷊awọi sire orasẹ̌ ini e. Lẹ̌adateng, bal᷊inewe seng nal᷊ahẹ u i sire e nẹ̌samal᷊ẹ si Tuangku e? Unụ e harusẹ̌ měndol᷊ẹ̌? Hědong ual᷊ingu pẹ̌sasal᷊a ěndaị ene tangú patikụ bansa e piněnal᷊udẹ̌ aị e!”

⁴Arawe ratu e tatapẹ̌be mạngumpaedẹ̌ parentane ene, kụ i Yoab nakoạ sarang kasěllahu Israel, sarang manga weọ e, wọu ene nẹ̌sul᷊e sarang Yerusalem,

⁵dingangu něhabarẹ̌ su Ratu i Daud, lětạu pěndarol᷊ẹ̌ ene. Kal᷊awọu manga esẹ kụ botonge makoạ sordado e 1.100.000 su kataune su Israel, dingangu 470.000 su kataune su Yehuda.

⁶Arawe hěnton Lewi ringangu hěntom Benyamin tawe nasowa su ral᷊unge. I Yoab tawe něndol᷊ẹ̌ su tal᷊oaran sire, batụu i sie mạdiri měndal᷊engu titan datu ene.

⁷Duata e tawẹ karal᷊uase su pěndarol᷊ẹ̌ ene, dingangu i Sie měhukungu tau Israel.

⁸Bọu e nẹ̌kal᷊iomanengke i Daud su Ruata, angkuěnge, ”O Ruata, iạ kai apạ e kawarạdosa! Ampungeko iạ, u kakanoạku e enẹ e kal᷊ongonge.”

⁹MAWU e něhengetang su Nabi i Gad, kụ nakoạ laikị su tal᷊oaran Daud dingangu MAWU e,

¹⁰”Dakọ e ringangu pẹ̌berako si Daud, u Iạ e něngonggọu pileku e tatěllu haghine si sie. Balạewe apa pileěnge mang Takụ koateng.”

¹¹Bọu ene i Gad nakoạ e sarang anung Daud, kụ něhabaru tatanatam MAWU ene, angkuěnge, ”Sudẹ e pileěng i Tuangku:

¹²Banua ini hombangengu karal᷊unusẹ̌ su ral᷊ungu 3 taung, arau i Tuang tụtal᷊ang sẹ̌sahusuangu sekẹ karěngụu těllu wul᷊ang, arau kasěllahu wanua ini těllu ěllo karěngụ e aloěngu MAWU ringangu peda-Ne kere sahindạ dingangu malạekatʼE nẹ̌bawa papate suapan tampạ. Pakasahẹko sahěllo ini e kai apạe hinon takụ iul᷊ị su MAWU e.”

¹³I Daud simimbang, ”Aduh, nasilakạ iạ! Kaiso sul᷊ungu iạ e i hukungu taumata, mạpiangbe iạ i hukungu MAWU, u kai masěllahẹ̌ kakěndagʼE ore tatal᷊ěntụʼE.”

¹⁴Tangú MAWU e naparěntan sahindạ su tau Israel, hakịu 70.000 su kataune su tal᷊oaran sire e nate.

¹⁵Bọu e MAWU rimolohu malạekatẹ̌ sěngkatau mẹ̌deạu panilakạ Yerusalem. Arawe su tempong malạekatẹ̌ e seng maraning tampạu pěndal᷊indaěng gandung tataghuaneng i Arauna tau Yebus, MAWU e němal᷊ui putusangʼE waugu pěhukung bansa ene. I sie nẹ̌bera su malạekatẹ̌ ene, ”Seng kapapiane! Pangẹ̌do!”

¹⁶I Daud nakasilo malạekatẹ̌ ene, tụtěllạ su tal᷊oarang langị dingangu dunia. Dingangu peda su l᷊imane, malạekatẹ̌ ene seng sadia mapakawinasang Yerusalem. Tangú i Daud dingangu manga těmbonangu manga kawanua, kụ su tempo ene něluheng pakeange karong tatialang nẹ̌sasěsilẹ̌, němul᷊angeng sarang ěntana.

¹⁷I Daud nẹ̌kal᷊iomaneng, angkuěnge, ”O Ruata, seng iạ e nẹ̌sal᷊a. Seng iạ e něngorong pěndarol᷊ẹ̌ ene. Bansa ini e mamben tawẹ sal᷊ane! O MAWU, Ruataku, hukungke iạ dingangu walagẹ̌ku, kaiso apakarauko silakạ masaria ini e wọu umatʼU.”

¹⁸Mase mạlaekatʼu MAWU e něngoro si Gad apẹ̌bera si Daud u i sie hinong sumaka sarang tampạ u pěndal᷊indaěng gandung tataghuaneng i Arauna ringangu pěndarisị pananěmbaěng baugu MAWU e sene.

¹⁹Tangú nẹ̌buạ e i Daud natakụ kere su titaʼm MAWU kụ nihabarẹ̌ si sie wọʼi Gad.

²⁰Su tampạ u pěndal᷊indaěng gandung ene i Arauna ringangu manga anạ e ěpạ u katau manga esẹ kạpẹ̌lindane gandung. Nakasilo malaẹkatẹ̌ ene, anạ i Arauna ěpạ u katau ene nahuntal᷊ang němpẹ̌kěmbuni.

²¹Piạ i Arauna nakasilo su Ratu i Daud diměnta, i sie nẹ̌sombang i Daud kụ nẹ̌tumpěkuhẹ̌ su těngone.

²²Angkuěng i Daud si sie, ”Iạ mapulu měmětị pananěmbaěng su tampạ ini waugu MAWU, tadeạu sahindạ ini e měngědo. Ual᷊ingu ene wal᷊ụ e ěntana ini e si siạ. Paul᷊ịko kai pira arěgane, hědo iạ měmaehẹ̌.”

²³”Ah, měngkate al᷊ạ Tuang,” angkuěng i Arauna, ”dingangu koạ e apang tuhụ pěndang i Tuang e mapia. Ini e kal᷊awọu sapi waugu sasěmba tẹ̌tutungang, dingangu waugu kalune i Tuang botonge mẹ̌pakẹ u kal᷊awọu pẹ̌pal᷊ẹ̌ tatahidaěng ini e. Měngkate lai pěngal᷊ạ gandung baugu sasěmba. Iạ e měngonggọ u patikụ ene e kụ ta wahal᷊uasu i Tuangku e měmaehẹ̌ ene.”

²⁴Arawe ratu e simimbang, ”Kumbahang, iạ e mapulu měmělling arẹ̌gane natimu. Iạ mạdiri maněmba su MAWU e apan tataghuanengu arau walạewe apa kụ takụ kaěbakeng měngkate kerene.”

²⁵Tangú i Daud němaehu roitẹ̌ bul᷊aeng 600 su kal᷊ěpane si Arauna waugu tampạ ene.

²⁶Mase i Daud něndarisị u pananěmbaěng sěmbaụ sene baugu MAWU, ringangu naněmbang sasěmba tẹ̌tutungang dingangu sasěmbang pẹ̌darame. Bọu e i sie nẹ̌kal᷊iomaneng kụ MAWU e rimaringihẹ̌ kakal᷊iomanenge ene kụ napal᷊intụ u putung bọu l᷊angị piněnutung manga sasěmba su wowom pananěmbaěng ene.

²⁷Mase MAWU e něngoro malạekatẹ̌ e kapia pẹ̌nuhi pedane su homane, kụ malạekatẹ̌ e timuhụ parentam MAWU ene.

²⁸Piạ i Daud nakasilo u MAWU e rimaringihẹ̌be kakal᷊iomanenge ual᷊ingu sasěmba ene, tangú i sie naněmba kapia sasěmba su pananěmbaěng ene.

²⁹Su tempo ene Tentaʼm MAWU nikoạ i Musa e su wanua l᷊inggi, ringangu pananěmbaěng baugu sasěmba tẹ̌tutungange wědang ene su tampạ u pẹ̌kakal᷊iomanengang su Gibeon.

³⁰Arawe i Daud tawe wahani sarang paị ene mědeạu mẹ̌bisaran Duata, watụ u i sie matakụ u pedang malạekatu MAWU e.