Read Sangir KARARATUANG HUMOTONG 22 Bible Online

KARARATUANG HUMOTONG 22 - Sangir bible

KARARATUANG HUMOTONG 22

¹Tangú i Daud nẹ̌bera, ”Su tampạ ini e hinong pamětikang Bal᷊em MAWU Ruata. Dingangu su pananěmbaěng ini e tau Israel hinong maněmban sasěmba tẹ̌tutungang i sire e waugu MAWU.”

²Ratu i Daud, něngoro piněnampung kal᷊awọu tau l᷊iwụ kụ mạtanạ su wanuang Israel, bọu ene i sie napěhal᷊ẹ̌ i sire. Sěnggạ bọu tal᷊oaran sire e němakang batu waugu měmětị Bal᷊em MAWU.

³Baugu ipẹ̌koạ paku ringangu henselẹ̌ baugu manga tukadu pasěllangengu Wal᷊em MAWU e, i Daud něngomol᷊ẹ̌ uase, l᷊awọ-l᷊awọ. I sie lai něnampungu kal᷊aukangu tambaga ringangu timběha mawira mal᷊awọ, hakịu seng tawe katimbang.

⁴Bọu tau Tirus dingangu Sidon i sie timanatang kalun cěmarang Libanon, diọ natimu.

⁵I Daud někoạ kěbị ene ual᷊ingu i sie mẹ̌tẹ̌tiněnna kerei: ”Iạ hinong měndiahing apang gausang baugu pamamětị pěmangunang u Wal᷊em MAWU e. U i Salomo ahusẹ̌ku e wědang mangudạ dingangu mahal᷊i ěbạ e, arawe Wal᷊em MAWU e kụ sarung pětikange ene e hinong mawantugẹ̌ dingangu timeleng su kaguwạu dunia.” Tangú kal᷊imonang i Daud naněntang u dunia, i sie něndiahing kakoạ bal᷊e mal᷊awọ.

⁶I Daud nẹ̌kui ahuse i Salomo, ringangu nẹ̌parenta si sie waugu pěndarisị bal᷊e waugu MAWU Ruata kụ sẹ̌sẹ̌mbaěng u tau Israel.

⁷ Angkuěng i Daud si Salomo, ”Anạku, seng marěngụ iạ mapulu měndarisị bal᷊e sěmbaụ baugu měngadatẹ̌ MAWU Ruataku.

⁸Arawe MAWU e něhengetang, uade iạ tumanịu masau mẹ̌sekẹ dingangu seng němate taumata l᷊awọ. Ual᷊ingu ene i Sie tawe mapakawalang iạ e měndarisị bal᷊e waugʼi Sie.

⁹Maningbe kerene, i Sie seng nẹ̌diandi kere ini si siạ: ’I kau sarung makaěbạ ahusu esẹ sěngkatau kụ sarung mẹ̌parenta kụ tawẹ sangkural᷊ange apa, u Iạ e sarung mẹ̌tul᷊ung i sie hakịbeng tawẹ apa sědụ kụ sumekẹ si sie. I sie sarung isěbạ si Salomo e,[31] watụ u karěngụe i sie mẹ̌pẹ̌parenta, Iạ sarung mẹ̌gěllịu karal᷊ěmpị dingangu karal᷊enehẹ̌ su patikụ Israel.

¹⁰Ahusu ene e kụ sarung měndarisị u wal᷊e waugu Iạ. I sie sarung makoạ anạ-Ku ringangu Iạ makoạ i amange. Kal᷊aianeng kararatuangu Israel sarung tatapẹ̌ su hěntone waugu sarang marěngụ-děngụ.’ ”

¹¹Bọu ene angkuěng i Daud kapia, ”Orasẹ̌ ini e anạku, karimạko MAWU Ruatanu e sěntiniạ mẹ̌tul᷊ung i kau. Dingangu karimạko i kau e makaumal᷊ẹ̌ bue měmětị bal᷊e waugu MAWU e kerẹewe seng niriandi-Ne.

¹²Dingangu karimạko MAWU Ruatanu e měngonggọu kapelesa ringangu makahěngang baugu mẹ̌parenta Israel tuhụewe su manga tita-Ne.

¹³ Kereu i kau e mararingihẹ̌ su patikụ tita kụ nionggọ u MAWU e si Musa waugu kawanuang Israel, i kau e sarungbe makaual᷊i ene. I kau e hinong maiaking dingangu wahani. Kumbahang matakụ balạewe tumatěngo apa.

¹⁴Su hal᷊ẹ̌ u Wal᷊em MAWU e iạ seng nẹ̌tawakal᷊i kahěnga-hěngang baugu měnampungu 3.400 su toěnge wul᷊aeng dingangu něngalembo wọu 34.000 su toěnge sal᷊aka. Su l᷊iung ene e piạ lai pěrunggu ringangu uase kụ semben tawe ikarekeng kal᷊awọe. Kalu ringangu watu e mal᷊aing seng takụ niriahi, kai i kau e harusẹ̌be lai pěnambang ene.

¹⁵I kau e piạ mělahal᷊ẹ̌ u e mal᷊awọ-lawọ, piạbeng mělẹ̌hal᷊ẹ̌ su pěngangal᷊iang batu, piạbeng basẹ̌ u kalu, tukangu watu, ringangu mal᷊awọ kahěngang apang mararading dingangu pande měhal᷊ẹ̌

¹⁶bul᷊aeng, sal᷊aka, pěrunggu ringangu uase. Kụ lighạ e pěnětạ! Mal᷊owọko MAWU e mẹ̌tul᷊ung i kau.”

¹⁷Mase i Daud něngoro patikụ pangahạ u Israel apaontol᷊ẹ̌ si Salomo.

¹⁸Angkuěnge u, ”MAWU Ruatanu e seng nẹ̌tul᷊ung i kamene, ringangu něngonggọu pẹ̌darame ore karal᷊enehẹ̌ su kasěllahu wanua. I sie seng nakakariading iạ e nakawatạ patikụ bansa kụ nạung kal᷊imona e mạtanạ sini. Ini e i sire seng nẹ̌tumpěkuhẹ̌ su těngong kamene ringangu su těngong MAWU.

¹⁹Kụ, mal᷊owọko i kamene e mẹ̌tangkiang MAWU Ruatang kamene e ringangu kaguwạu naung ore lai kasěllahu watangeng i kamene. Pěnětạ e pěmangung bal᷊e waugu MAWU, tadeạu Petiʼm Pẹ̌dariandi-Ne ringangu patikụ apal᷊iwụ bal᷊ine e kụ nipakẹ tani waugu mẹ̌kakal᷊iomanenge wotonge ipělọ sene.”