Read Sangir KARARATUANG HUMOTONG 23 Bible Online

KARARATUANG HUMOTONG 23 - Sangir bible

KARARATUANG HUMOTONG 23

¹ Piạ i Daud seng maghurang-gurang i sie něhengkẹ i Salomo nakoạ datung Israel.

²Ratu i Daud něnampungu patikụ těmbonang u Israel, manga imang dingangu tau Lewi,

³mase i sie něndekeng kěbị manga esẹ apan tau Lewi, umure těllung pul᷊o taung taraị, kěbị kal᷊awọe 38.000 su kataune.

⁴Bọu e 24.000 su kataune sutal᷊oaran sire e nipěhal᷊ẹ̌ e waugu pěngal᷊uang hal᷊ẹ̌ su Wal᷊en MAWU, 6.000 waugu měngangurusẹ̌ hal᷊ẹ̌ u kantorẹ̌ dingangu kal᷊awọu hal᷊ẹ̌ u pěngadilang,

⁵4.000 su kataune, waugu hal᷊ẹ̌ u pěndal᷊ukadẹ̌ dingangu 4.000 su kataune lai waugu ipẹ̌dalo MAWU ringangu pakakasu musikẹ̌ kụ apan seng nisadia.

⁶I Daud nẹ̌pahiạu tau Lewi su ral᷊ungu těllung kamonaěng tuhụ hěnton sire, kụ kai ghal᷊ipohong Gerson, i Kehat, dingangu i Merari.

⁷I Gerson piạ anạ e esẹ darua: i Ladan dingangu i Simei.

⁸Manga anạ i Ladan esẹ e těllung katau: i Yehiel, i Zetam dingangu i Yoël.

⁹I sire e kai těmbonangu ghal᷊ipohong hěnton Ladan. (I Selomit, i Haziel dingangu i Haran ute kai manga anạ i Simei esẹ).[32]

¹⁰Manga anạ i Simei esẹ i sire ěpạ tuhụ dangẹ u umurʼi sire e kai: i Yahat, i Ziza, i Yeus dingangu i Beria. Hěnton Yeus dingangu i Beria e mahal᷊i wue, kụ i sire niěnnau kai ghal᷊ipoho sěmbaụ.

¹²I Kehat piạ anạ e esẹ ěpạ u katau: i Amram, i Yizhar, i Hebron dingangu i Uziel.

¹³ I Amram ute kai i amang i Harun děduang Musa. (I Harun děduang hitene sarang marěngụ-děngụ e seng nitani waugu apěngurusẹ̌ manga apal᷊iwụ u pẹ̌kakal᷊iomaneng, měnutung buwụ baugu MAWU, mẹ̌tangkiang MAWU ringangu měngal᷊amatẹ̌ kawanua su arengu MAWU.

¹⁴Manga anạ i Musa esẹ e ěllang u Mawu e narekeng kere su ral᷊ungu hěnton Lewi.)

¹⁵I Musa piạ anạ e manga esẹ duang katau kụ i Gersom dẹ̌duang Eliezer.

¹⁶Nakoạ kere těmbonangu manga anạ i Gersom ute i Sebuel.

¹⁷I Eliezer piạ anạ e esẹ kětạeng sěmbaụ, kụ arenge i Rehabya. Arawe i Rehabya piạ anạ e mal᷊awọ-lawọ.

¹⁸I Yizhar, anạ i Kehat karuane, piạ anạ e esẹ arenge i Selomit; i sie kai těmbonangu ghal᷊ipoho.

¹⁹I Hebron, anạ i Kehat katěllune, piạ anạ e esẹ ěpạ u katau: i Yeria anạ e i akang, bọu e i Amarya, i Yehaziel dingangu i Yekameam.

²⁰I Uziel anạ i Kehat kaěpạ e, piạ anạ e esẹ darua: i Mikha kaiakanenge ringangu i Yisia.

²¹I Merari piạ anạ e manga esẹ darua arenge i Mahli ringangu i Musi. I Mahli piạ anạ e manga esẹ duang katau kụ i Eleazar dẹ̌duang Kish,

²²arawe i Eleazar nate tawẹ apa anạ e manga esẹ; kětạeng manga anạ e wawine nẹ̌kawingu anạ u tamahuari ringang i sire e kụ kai manga anạ i Kish.

²³I Musi anạ i Merari karuane, piạ manga anạ e esẹ těllung katau: i Mahli, i Eder dẹ̌duang Yeremot.

²⁴Ene e kai manga arengu hěnton Lewi kụ mạbawohẹ tuhụ arengu těmbonangu ghal᷊ipoho ringangu ral᷊ohom bal᷊ene sěngkatau-sěngkatau. Umurʼi sire e 20 su taunge taraị dingangu nakaěbạ hal᷊ẹ̌ e su Wal᷊em MAWU.

²⁵I Daud nẹ̌bera, ”MAWU Ruatang Israel seng něngonggọu karal᷊enehẹ̌ suapan taumata-Ne, ringangu i Sie hala nẹ̌tanạ su Yerusalem sarang marěngụ-děngụ.

²⁶ Ual᷊ingu ene Tentaʼm MAWU e ringangu kal᷊awọu apal᷊iwụ kụ nipakẹ baugu pẹ̌kakal᷊iomaneng seng ta wahal᷊uasu lai pikul᷊angu lai tau Lewi.”

²⁷Iwal᷊a su kal᷊awọu parentan Daud pěngěnsueěnge, kěbị tau Lewi e mạengu umbure seng nidatingu 20 su taunge, harusẹ̌ pakirol᷊ẹ̌ baugu pěhal᷊ẹ̌.

²⁸ I sire hinong pěnongka manga imang hiteng Harun su ral᷊ungu měngurusẹ̌ pẹ̌kakaliomaneng su Wal᷊em MAWU, mẹ̌padul᷊i manga rělahe ringangu manga huange su Wal᷊em MAWU ene, ore lai měndiagạ tadeạu patikụ sạbarang kụ seng nitani waugu MAWU e tawe wotonge mal᷊amuhụ.

²⁹I sire mal᷊aing pakiwal᷊oěng u hal᷊ẹ̌ tamai ini: borotẹ̌ kụ nisěmba su Mawu e, tapoěng kụ nipakẹ baugu sasěmba su MAWU e, kukisẹ̌ manipị nikoạ tawẹ kabọ e, sasěmba tinapa, ringangu tapoěng nikaugu lanan zaitun. I sire lai harusẹ̌ mẹ̌timbang dingangu měngukurẹ̌ kal᷊awọu sasěmba kụ iwawa sarang Bal᷊em MAWU.

³⁰Su l᷊iung ene i sire harusẹ̌ mẹ̌kantarị baugu mẹ̌dalo MAWU apang kamal᷊ukadẹ̌ dingangu apang hěbi;

³¹kerene lai suapan tempo kamagengu piạ sasěmba kụ itutung baugu MAWU su ěllon Sabatẹ̌ e su tempong pěmamantugẹ̌ Bul᷊ang Buhu, dingangu su pẹ̌mamantugẹ̌ ěllo lai wal᷊ine e. Mạanung kal᷊awọu tau Lewi e kụ harusẹ̌ mẹ̌karadiahang apang kal᷊aěllo, selain nikoateng tiahane. Baugu sarang marěngụ-děngụ tau Lewi e harusẹ̌ mẹ̌koạ hal᷊ẹ̌ ene.

³²I sire mal᷊aing nighěllirangu wawawaěng baugu mẹ̌padul᷊i Tentam MAWU ore lai Wal᷊em MAWU ringangu waugu montolẹ̌ su manga anạu sěngkataun sire e, kụ kai manga imang hěnton Harun mẹ̌koạ pẹ̌kakal᷊iomaneng su tampạ ene.