Read Sangir KARARATUANG HUMOTONG 24 Bible Online

KARARATUANG HUMOTONG 24 - Sangir bible

KARARATUANG HUMOTONG 24

¹ I Harun piạ anạ e manga esẹ ěpạ u katau: i Nadab, i Abihu, i Eleazar, dingangu Itamar. I Nadab dẹ̌duang Abihu nate kal᷊imona wọʼi amang i sire kụ tawẹ apa anạ e. Ual᷊ingu ene i Eleazar dingangu Itamar manga anạu sěngkataun sire e nakoạ imang. I Daud němahiạ hěnton Harun su ral᷊ungu pirang kamonaěng tuhụ hal᷊ẹ̌ i sire e. Su hal᷊ẹ̌ u měkẹ̌kamonaěng ene i Daud lẹ̌ontol᷊ang i Zadok hěnton Eleazar dingangi Ahimelekh hěntong Itamar.

⁴Hěntong Itamar nipahiạ nakoạ ual᷊ung kamonaěng, arawe hěntong Eleazar nakoạ mapul᷊o ěnnung su kamonaěnge, u su ral᷊ungu hěnton Eleazar kai něngalembong kal᷊awọe manga esẹ těmbonangu apam bal᷊e.

⁵Ual᷊ingu ene waebe su ral᷊ungu hěntong Eleazar arau lai su ral᷊ungu hěnton Itamar kai piạ manga mapapangkatu Wal᷊em MAWU ringangu manga těmbonangu agama, kụ pẹ̌gaghaghelaru hal᷊ẹ̌ e niral᷊eng u pěnanawụ lotẹ̌.

⁶Hěntong Eleazar dingangu Itamar mẹ̌dẹ̌darol᷊osẹ̌ měnawụ lotẹ̌, mase areng i sire niwohẹ u sěngkatau tulị i sire arenge i Semaya anạ i Netaneel tau Lewi. Kěbị ene nikoạ su těngon datu ringangu kal᷊awọu manga sawohị e; Imang Zadok, i Ahimelekh anạ i Abyatar ore lai manga těmbonangu apam bal᷊e ghal᷊ipohong imang dingangu těmbonangu apam bal᷊e ghal᷊ipohong Lewi.

⁷Seng ini e nomoru pẹ̌tatuhukangu hal᷊ẹ̌ kinareạ bọu sawụu lotẹ̌ baugu 24 su kamonaěnge ene: 1. Yoyarib — 13. Hupa 2. Yedaya — 14. Yesebeab 3. Harim — 15. Bilga 4. Seorim — 16. Imer 5. Malkia — 17. Hezir 6. Miyamin — 18. Hapizes 7. Hakos — 19. Petahya 8. Abia — 20. Yehezkiel 9. Yesua — 21. Yakhin 10. Sekhanya — 22. Gamul 11. Elyasib — 23. Delaya 12. Yakim — 24. Maazya

¹⁹Areng i sire ene niwohẹ tuhụ bihing i sire waugu sumuẹ̌ su Wal᷊em MAWU kụ nẹ̌koạ munarang pẹ̌kakal᷊iomaneng kụ seng nipatong Harun i upung i sire, natuhụewe kere su parentam MAWU, Ruatang Israel.

²⁰Su l᷊iung ene su ral᷊ungu hěnton Lewi e wědang lai nasowa těmbonangu apam balagẹ̌ tanaẹ ini: I Yehdeya, hěntong Amram bọu wěhị u hěnton Subael; Yisia, hěntong Rehabya; i Yahat, hěntong Yizhar bọu wěhị u hěntong Selomot; i Yeria, i Amarya, i Yehaziel dingangi Yekameam manga anạ i Hebron mẹ̌tẹ̌tatuhụ umure; i Samir, hěntong Uziel wọu wěhị u hěnton Mikha; i Zakharia, hěntong Uziel bọu wěhị u hěnton Yisia anạ u sěmbaụ i Mikha; i Mahli, i Musi ringangu i Yaazia hiten Merari.

²⁷I Yaazia piạ anạ e manga esẹ tatěllu: i Syoham, i Zakur dingang i Hibri.

²⁸I Mahli piạ anạ e manga esẹ darua arenge i Eleazar dingangi Kish. I Eleazar tawẹ apa anạ e manga esẹ, arawe i Kish piạ anạ e esẹ sěngkatau nisěbạ si Yerahmeel.

³⁰Anạ i Musi manga esẹ těllung katau: i Mahli, i Eder dingangu i Yerimot. Seng ene e kal᷊awọu walagẹ̌ su ral᷊ungu hěnton Lewi.

³¹Baugu wihingu munaran sire e, apan těmbonangu walagẹ̌ e ringangu tuarine esẹ sěngkatau e něnawụ lotẹ̌ kerẹewe kẹ̌koateng u manga anạ u sěngkataun sire, kụ kai manga imang hěnton Harun. Pěnanawụ lotẹ̌ ene nisahidiangu Ratu i Daud dingangi Zadok, i Ahimelekh dingangu manga těmbonangu apam balagẹ̌ bọu ghal᷊ipohong manga imang dingangu wọu ghal᷊ipohon tau Lewi.