Read Sangir KARARATUANG HUMOTONG 25 Bible Online

KARARATUANG HUMOTONG 25 - Sangir bible

KARARATUANG HUMOTONG 25

¹Baugu měngangahạ pẹ̌kakal᷊iomaneng e, Ratu i Daud dingangu manga těmbonangu tau Lewi e němile manga ghal᷊ipohong Lewi e apan tuhụ e ini: i Asaf, i Heman dingangu i Yedutun. I sire nioro piněhabaru tatanatan Duata, iwẹ̌bawa su musikẹ̌ u kěcapi, gambus dingangu simbal. Baugu měngangahạ pẹ̌kakal᷊iomaneng dingangu hundugu pẹ̌kakal᷊iomaneng sěmbaụ-sěmbaụ e, nipile apang kamonaěng kere ini:

²Anạ i Asaf manga esẹ i sire ěpạ kụ: i Zakur, i Yusup, i Netanya ringangu i Asarela. Pangahạ i sire ute kai i Asaf, kụ měhabaru tatanata wọu anun Duata, kereu i pěmunaran datu.

³Anạ i Yedutun manga esẹ i sire ěnnung: i Gedalya, i Zeri, i Yesaya, i Simei, i Hasabya ringangu i Matica. Su ahạ i amang i sire e, i sire něhabaru tatanata wọu anun Duata lẹ̌ahakengu musikẹ̌ u kěcapi, ringangu i sire e nẹ̌kantarị u kakantarị daralo ore lai tatarimakasẹ su MAWU.

⁴Manga anạ i Heman esẹ i sire mapul᷊o ěpạ: i Bukia, i Matanya, i Uziel, i Sebuel, i Yerimot, i Hananya, i Hanani, i Eliata, i Gidalti, i Romamti-Ezer, Yosbekasa, Maloti, Hotir dingangu i Mahaziot.

⁵I Heman ute kai nabin datu e. MAWU e něngonggọu manga anạ esẹ i sire mapul᷊o ěpạ ene e ringangu manga anạ bawine e i sire těllu si Heman, ual᷊ingu MAWU e seng nẹ̌diandi waugu měngonggọu kal᷊aianeng mawantugẹ̌ e si sie.

⁶Patikụ anạ i Heman ene e měmpẹ̌nẹ̌nalangu musikẹ̌ u simbal, kěcapi ringangu gambus lẹ̌ahakeng i amang i sire e waugu tumol᷊e atoru pẹ̌kakal᷊iomaneng su Wal᷊em MAWU. I Asaf, i Yedutun dingangu i Heman nakaěbạ parenta sěndal᷊engu tatualagẹ̌ bọu anun datu e.

⁷I sire ruam pul᷊o ěpạ manga esẹ anạ i sire ene ringangu manga anạ u sěngkataun sire e kai mapapandeng musikẹ̌ kụ nawihing mapia. I sire kěbị e kal᷊awọe 288 su kataune.

⁸Baugu měnantu wihingu munara e, i sire kěbị e něnawụ lotẹ̌ — baewe mangudạ arau lai maghurang, baewe seng piạ ěbạ e natimu, arau apam buhụ e mạnětạ mạngěndung.

⁹I sire 288 ene nipahiạ su ral᷊ungu 24 su kamonaěnge tuhụ balagu sěmbaụ-sěmbaụ. Apang kamonaěnge kal᷊awọe 12 su kataune lẹ̌ahakengu sěngkatau. Kụ ini e pẹ̌tatol᷊eěngu areng i sire e tuhụewe pěnanawụ lotẹ̌: 1. I Yusup bọu walagi Asaf — 13. I Subael 2. I Gedalya — 14. I Matica 3. I Zakur — 15. I Yeremot 4. I Yizri — 16. I Hananya 5. I Netanya — 17. I Yosbekasa 6. I Bukia — 18. I Hanani 7. I Yesarela — 19. I Maloti 8. I Yesaya — 20. I Eliata 9. I Matanya — 21. I Hotir 10. I Simei — 22. I Gidalti 11. I Azareel — 23. I Mahaziot 12. I Hasabya — 24. I Romamti-Ezer