Read Sangir KARARATUANG HUMOTONG 26 Bible Online

KARARATUANG HUMOTONG 26 - Sangir bible

KARARATUANG HUMOTONG 26

¹Seng ini e pẹ̌gaghaghelaru munara waugu tau Lewi měndal᷊ukadẹ̌ Bal᷊em MAWU. Bọu ghal᷊ipohong Korah e nitěbọ i Meselemya anạ i Kore wọu walagʼi Ebyasaf.

²I sie piạ anạ e manga esẹ pitung katau narol᷊ẹ̌ tuhụ umure: i Zakharia, i Yediael, i Zebaja, i Yatniel,

³i Elam, i Yohanan, i Elyoënai,

⁴ Bọu ene nitěbọ i Obed-Edom. I sie nial᷊amatengu Ruata ringangu anạ e manga esẹ ual᷊ung katau kụ narol᷊ẹ̌ tuhụ umurẹ̌: i Semaya, i Yozabad, i Yoah, i Sakhar, i Netaneel,

⁵i Amiel, i Isakar dingangu i Peuletai.

⁶I Semaya anạ i Obed-Edom kaiakanenge piạ anạ i sire manga esẹ ěnnungu katau: i Otni, i Refael, i Obed, i Elzabad, i Elihu ringangu i Semakhya; kěbị-kěbị e taumata patebone su ral᷊ungu ghal᷊ipohon sire, batụu i sire e kai wawahani, něngalembọete i Elihu rẹ̌duang Semakhya.

⁸Baugu munarang pěndal᷊ukadẹ̌ ene e ghal᷊ipohong Obed-Edom něngonggọu manga esẹ bawahani i sire 62 su kataune.

⁹Ghal᷊ipohong Meselemya něngonggọu wawahani 18 su kataune.

¹⁰Bọu ghal᷊ipohong Merari nitěbọ i Hosa. I sie piạ anạ e manga esẹ ěpạ u katau: i Simri (i sie wal᷊inewe anạ i akang kaiso nihengkẹ nakoạ pangahạ e kahiang amange),

¹¹i Hilkia, i Tebalya ringangu Zakharia. Kěbị kal᷊awọe 13 su kataune ral᷊ohom bal᷊eng Hosa kụ nakoạ lukadu Wal᷊em MAWU.

¹²Manga lukadu Wal᷊em MAWU nipahiạ su ral᷊ungu pirang kamonaěng tuhụewe ghal᷊ipohone. I sire nionggotangu l᷊ai hal᷊ẹ̌ su ral᷊ungu Wal᷊em MAWU kerẹewe lai tau Lewi wal᷊ine e.

¹³Apang gal᷊ipoho baewe ghal᷊ipoho ghěguwạ arau lai ghal᷊ipoho rararodọ e, němpěnawụ lotẹ̌ mědeạu makakasingkạ u su tukadu pasěllangeng sude i sire e hinong harusẹ̌ měmpěmunara.

¹⁴I Selemya nakaěbạ tukadu pasěllangeng sěmběkan dakị. I Zakharia anạ e, kụ sěntiniạ mạngonggọu sasasa mapia e, nakahombang tukadu pasěllangeng sěmběkan sawěnahẹ̌.

¹⁵I Obed-Edom nakahombang tukadu pasěllangeng sěmběkan timuhẹ̌ dingangu manga anạ e nakahombang gelaru měndiagạ manga gudangu apal᷊iwụ.

¹⁶I Supim dẹ̌duang Hosa e nakahombang tukadu pasěllangeng sěmběkam bahẹ dingangu tukadu pasěllangeng Syalekhet kụ kaěbakeng su ral᷊eng sụsaka. Munaran diagạ niatorẹ̌ kerene sarang hanesẹ̌ piạ u mẹ̌děndiagạ su tukadu pasěllangeng.

¹⁷Su apang ěllo su sěmběkan dakị e piạ měndal᷊ukadẹ̌ ěnnungu katau, su sěmběkan sawěnahẹ̌ ěpạ u katau ringangu su sěmběkan timuhẹ̌ e ěpạ u katau. Manga gudang u apal᷊iwụ e mal᷊aing nitakinangu ěpạ u katau: Duang katau waugu apang gudang.

¹⁸Su tampilu wal᷊e su sěmběkam bahẹ e, nipělọ e lukadẹ̌ ěpạ u katau su raral᷊engang dingangu lukade ruang katau su tampile ene hala e.

¹⁹Kerene pẹ̌gaghaghelaru munarang lukadẹ̌ e su ghal᷊ipohong Korah ringangu ghal᷊ipohong Merari.

²⁰Taumata lai wal᷊ine e su ral᷊ungu hěnton i Lewi e nipělěngkanengu wawaěng mawěhạ baugu pěndiagạ arětạ, apal᷊iwụ u Wal᷊em MAWU dingangu waugu gudang tampạ u pěndaresoěngu manga ghaghěllị baugu Ruata.

²¹I Ladan ute kai anạ i Gerson esẹ e; i sie napal᷊intụ u ghal᷊ipoho pirang kamonaěng, nal᷊aụ lai ghal᷊ipohong Yehiel anạ e.

²²Manga anạ i Yehiel, kụ i Zetam dingangi Yoël, nionggotangu wawaěng piněnahimata manga gudang dingangu manga roitu Wal᷊em MAWU.

²³Hěntong Amram, i Yizhar, i Hebron dingangi Uziel mal᷊aing nakahombang bageangu munara.

²⁴I Sebuel wọu ghal᷊ipohong Gersom, anạ i Musa, ute kai měnanahimata arětạ, apal᷊iwụ u Wal᷊em MAWU.

²⁵I sie kai piạ běhị u pamili ringangi Selomit bọi Eliezer anạ u sěngkataung Gersom. Běhịu hěntong Eliezer sarang Selomit ute kai kere ini: i Eliezer, i Rehabya, i Yesaya, i Yoram, i Zikhri, i Selomit.

²⁶I Selomit dingangu manga anạu sěngkataune nipěngumbalaěng baugu patikụ laonggọ kụ isěmban Datu i Daud, kahiam manga těmbonangu apam bal᷊e, těmbonangu apang ghal᷊ipoho ringangu apang pěrwira mararangẹ e.

²⁷Kal᷊awọu manga laonggọ ene sěmbahageang kai wọu apal᷊iwụ hampasẹ̌ kụ kinaěbakeng i sire su ral᷊ungu pẹ̌seketang dingangu apang kụ nisěmban sire waugu ipakẹ těntani su ral᷊ungu Wal᷊em MAWU.

²⁸Hatede, i Selomit dingangu walage piạ bawawaěnge isarakang baugu ipakẹ tani su ral᷊ungu Wal᷊em MAWU e narekeng lai sasěmba kụ limiun Nabi Samuel kụ seng nisarakangu Ratu i Saul, kahiang Abner anạ i Ner, dingangu kahiang Yoab anạ i Zeruya.

²⁹Pal᷊ahiten Yizhar, kụ i Kenanya ringangu manga anạ e, nighěllirangu munarang hal᷊ẹ̌ u pěmohekangu wanua ringangu manga hal᷊ẹ̌ u kạadilẹ̌ e su Israel.

³⁰Kal᷊awọu urusangu agama ringangu urusangu hal᷊ẹ̌ u pẹ̌paparenta su Israel sěmběkam bahẹ bọu Sal᷊ụ u Yordan nisarakang si Hasabya ringangu su 1.700 su kataune manga anạ u sěngkataune: kěbị-kěbị e mang i sire apang kewe su horone hiteng Hebron.

³¹Těmbonangu hiteng Hebron ute kawe i Yeria. Su taung kaěpạ u pul᷊one su parentan Datu i Daud nikoateng pěnanẹ̌suiang hal᷊ẹ̌ u hiten Hebron. Su ral᷊ungu pananẹ̌sui ene ute nal᷊ahẹ u sutal᷊oaran sire e piạ manga sordado wawahani kụ mạtanạ su Yazer su wanuang Gilead.

³²Kal᷊awọu urusangu hal᷊ẹ̌ u agama ringangu pẹ̌paparenta su Israelẹ̌ e sěmběkan dakị wọu Sal᷊ụ u Yordan — kụ kai wanuang hěnton Ruben, Gad dingangu sěmbahageang bọu hěnton Manasye — nisarakang su 2.700 su kataune těmbonangu walagi Yeria, kěbị e taumata su horone kụ nipilen Datu i Daud.