Read Sangir KARARATUANG HUMOTONG 28 Bible Online

KARARATUANG HUMOTONG 28 - Sangir bible

KARARATUANG HUMOTONG 28

¹Ratu i Daud nẹ̌parenta tadeạu kal᷊awọu těmbonangu Israel apẹ̌tẹ̌tampung su Yerusalem. Kụ apan těmbonangu ghal᷊ipoho, mapapangkatu wanua, apan těmbonangu hěnto, apang měnanitị manga arětạ dingangu binatangu ratu ringangu manga ahuse — nimbụe apang gaghaghuwạ su istana, pěrwira, ringangu taumata mapapia e, kěbị e němpẹ̌tampung su Yerusalem.

² I Daud dimarisị su těngon sire ringangu nẹ̌bera, ”Manga anạ u sěmbaụku, daringihẹ̌ko! Seng marěngụ iạ piạ kapuluku měndarisị u wal᷊e tatapẹ̌ baugu Petim Pẹ̌dariandi, dararisikang u laedu MAWU Ruatang kitẹ. Iạ e seng bọu nẹ̌koạ dariahing ene waugu měndarisị bal᷊e sěmbaụ tampạ u maněmba si Sie.

³Kaiso MAWU e nẹ̌sěding u iạ mẹ̌koạ hal᷊ẹ̌ ene ual᷊ingu iạ e kai sěngkatau sordado kụ seng lawọ nakatedọu raha.

⁴MAWU Ruata kụ sẹ̌sěmbaěngu Israel, seng němile si siạ dingangu hěntoku e waugu mẹ̌parenta Israel sarang marěngụ-děngụ. Baugu měndiahi sěngkatau těmbonange i Sie němile hěnton Yehuda, ringangu wọu ghal᷊ipoho ene i Sie němile walagi amangku. Ringangu wọu kěbị dal᷊ohom balagʼi amangku e ene i Sie nakapěmile si siạ dingangu napakariding iạ datu su kaguwạu Israel.

⁵I Sie nẹ̌gěllịu anạ mal᷊awọ si siạ kụ bọu kěbị anạku ene i Sie němile si Salomo baugu pẹ̌parenta Israel, kararatuangu MAWU.

⁶MAWU e nẹ̌bera si siạ kere ini, ’I Salomo anạ u e sarung měmangung bal᷊e waugu Iạ. I sie seng Takụ nipile makoạ anạ-Ku ringangu Iạ sarung makoạ i amange.

⁷Kereu i sie mamben těngadẹ̌ tatapẹ̌ tụtuhụ patikụ toratẹ̌ dingangu manga tita-Ku e kerẹewe kẹ̌koateng e orasẹ̌ ini, Iạ sarung manoghasẹ̌ kararatuange sarang marěngụ-děngụ.’ ”

⁸Mase angkuěng i Daud tuhụ e, ”Kụ orasẹ̌ ini e, ei kawanuaku, su těngon Duata i kitẹ dingangu su těngon pẹ̌sasombangengu patikụ tau Israel, umatu MAWU ini e, iạ mẹ̌dorong si kamene sěngapang botonge dumaringihẹ̌ kal᷊awọu titam MAWU e Ruatang kitẹ. Ual᷊ingu kawe kerene ute i kamene tatapẹ̌be mạnaghuang banua kụ mapia e ini ringangu mapakailasu ene su manga pal᷊ahitenu ini e, waugu sarang marěngụ-děngụ.”

⁹Mase si Salomo i Daud nẹ̌bera, ”Anạku, kěnangko Ruata nạung sẹ̌sěmbaěng i amangu, akụ e kere Ruatanu. I kau hinong mẹ̌tangkiang si Sie ringangu katul᷊idẹ̌ e ore lai naung masěllahẹ̌ e. Batụu i Sie e masingkạ u kal᷊awọu tiněnna ringangu ěnningu naung i kitẹ e. Kereu i kau e mẹ̌deạ si Sie, i Sie e sarung kaẹ̌bakengu, katewe kamagengu i kau e maněntang i Sie, i Sie sarung tawe manarimạ i kau sarang marěngụ-děngụ.

¹⁰Pẹ̌tahěndungko pakapia u MAWU e seng němile si kau waugu mapararisị u wal᷊e nitani waugʼi Sie. Kụ pẹ̌koạ e ene ringangu naung gẹ̌guwạ.”

¹¹Bọu ene i Daud něnarakangu antagu koạ u wal᷊e, waugu ghodoěngu Wal᷊en MAWU si Salomo, manga gudange, kal᷊awọu kamare ringangu Huang Limembong Kasusiange, tampạ u ampungu rosa.

¹²I Daud mal᷊aing něnarakangu kal᷊awọu karakine kụ seng niěnnane waugu manga rělahẹ̌ dingangu manga kamarẹ̌ mangělikụ e, ringangu waugu manga gudangu apal᷊iwụ u Wal᷊em MAWU ene, ringangu manga gudang tampạ u pěndaresoěngu manga ghaghěllị baugu MAWU.

¹³Nisarakange lai karaking hal᷊ẹ̌ u pěmmamahiạ manga imang dingangu tau Lewi, mạanung manga hal᷊ẹ̌ kụ hinong hal᷊ẹ̌kang i sire, kụ kai hal᷊ẹ̌ i sire su Wal᷊em MAWU ringangu pẹ̌papadul᷊iang kěbị apal᷊iwụ u pẹ̌kakal᷊iomaneng.

¹⁴I sie něngonggọu manga tatualagu kereapa měhal᷊ẹ̌ bul᷊aeng dingangu sal᷊aka koateng manga apal᷊iwụ,

¹⁵baugu makoạ sol᷊o ringangu ral᷊aede,

¹⁶baugu makoạ manga meda wọu sal᷊aka, ringangu waugu makoạ apang meda wul᷊aeng tampạ u pěnadiaěngu borotẹ̌ baugu Ruata.

¹⁷Kerene lai patikụ atoru kal᷊awọu wul᷊aeng sahị kụ hinong ipakẹ pẹ̌koạ porokẹ̌, mangko ringangu ketelẹ̌, kal᷊awọu sal᷊aka ringangu wul᷊aeng kakoạ manga l᷊amạ,

¹⁸kal᷊awọu wul᷊aeng sahị kakoạ pananěmbaěng tampạ u pěnanutungang buwụ dingangu waugu ipẹ̌koạ kareta waugu manga tul᷊adang malạekatẹ̌, papanide kạbawingkahẹ̌ su wowom Petiʼm Pẹ̌dariandim MAWU.

¹⁹Mase Ratu i Daud nẹ̌bera, ”Kěbị ene e kạtataho su ral᷊ungu ol᷊ang kụ seng niwohẹ natuhụewe kere su laahạ kụ seng nionggọ u MAWU e hala si siạ mědeạu pakịkoạ.”

²⁰Bọu ene Ratu i Daud nẹ̌bera kapia si Salomo ahuse, ”I kau e hinong měngiaking dingangu mẹ̌tumbahani. Tětạ e hal᷊ẹ̌ ene ringangu kumbahang matakụ u manga apa. MAWU Ruata sẹ̌sěmbaěngku e sarung mẹ̌tul᷊ung i kau. I Sie tawe měněntang i kau. I Sie sarung tumaking si kau e sarang hal᷊ẹ̌ u mauadipẹ̌.

²¹Pẹ̌gaghelaru hal᷊ẹ̌ u pẹ̌kakal᷊iomaneng su ral᷊ungu Wal᷊em MAWU e seng nitantu su tal᷊oarang manga imang dingangu tau Lewi. Mělahal᷊ẹ̌ewe apang masasingkạ su hal᷊ẹ̌ u sěmbaụ-sěmbaụ e sarungbe mẹ̌tul᷊ung i kau ringangu naung mal᷊uasẹ̌, dingangu apan těmbonange ringangkeweng patikụ kawanua e sarung dumaringihẹ̌ parentanu.”