Read Sangir KARARATUANG HUMOTONG 29 Bible Online

KARARATUANG HUMOTONG 29 - Sangir bible

KARARATUANG HUMOTONG 29

¹ Mase nẹ̌berạ e Ratu i Daud su kěbị taumata kụ němpẹ̌tampung sene, ”Wọu kal᷊awọu ahusẹ̌ku e, seng i Salomo e nipilen Duata. Kaiso i sie tumanịu wědang mangudạ dingangu mahal᷊ị ěbạ e, arawe hal᷊ẹ̌ ini e kawe tumanịu masěllahẹ̌. Kutẹu lai iwangung kawe wal᷊inewe istana waugu taumata, kaiso kawe wal᷊e waugu MAWU Ruata.

²Kakakoạ u wal᷊e ene ringangu manga apal᷊iwụ e seng takụ niriahi ringangu kạguwạu takụ ikaumal᷊ẹ̌ e. Iạ e seng něndiahing bul᷊aeng, sal᷊aka, pěrunggu, uase, kalu, manga watu maral᷊ěgadẹ̌ dingangu manga watum paramata, watụewe awạ e mẹ̌dẹ̌dal᷊ahaghi waugu manga ral᷊ěgahẹ̌ dingangu watum marmarẹ̌.

³Katewe ual᷊ingu kakěndagẹ̌ku e su Wal᷊en Duataku ene, iạ seng něnarakang lai sal᷊aka ringangu wul᷊aeng bọu arětạ tataghuanengku e hala:

⁴bul᷊aeng kal᷊ěnggihange něngalembo wọu 100 su toěnge, dingangu sal᷊aka sahị e mangawe 240 su toěnge waugu ipěhaweng darěndung u Wal᷊em MAWU e, ringangu waugu manga apal᷊iwụ kụ hinong hal᷊ěkangu apang mapapandene. Kụ i sai lai wědang mapulu měngonggọu sasěmbane su MAWU e ringangu naung mal᷊uasẹ̌?”

⁶Tangú těmbonangu apang ghal᷊ipoho, těmbonangu apam bansa, apang pěrwira ringangu masasingkạ u arětạ tataghuaneng ratu e mạnodẹ u i sire lụěnning u l᷊ai mapulu měnongkạ.

⁷Mase i sire lai něngonggọu kěbị ini e waugu pẹ̌kakoạ Bal᷊em MAWU ene: bul᷊aeng 170 su toěnge lawọ, dingangu sal᷊aka 340 su toěnge lawọ, pěrunggu maraning 620 su toěnge, ringangu uase 3.400 su toěnge lawọ.

⁸Taumata kụ měnẹ̌naghuang manga watu paramata e něnarakang u ene si Yehiel mědeạu itaho su ral᷊ungu kasẹ̌ su Wal᷊em MAWU. (I Yehiel ute kai sěngkatau wọu hěnton Lewi wọu ghal᷊ipohong Gerson.)

⁹Kawanua e něngonggọ dingangu naung mal᷊uasẹ̌ su MAWU ringangu i sire e mal᷊uasẹ̌ ual᷊ingu seng mal᷊awọ nisěmban sire e. Datu i Daud mal᷊aing mal᷊ua-luasẹ̌.

¹⁰Su těngon taumata l᷊awọ ene Ratu i Daud nẹ̌dalo MAWU. I sie nẹ̌bera, ”O MAWU Ruata kụ sẹ̌sěmbaěng i Yakub i upung i kami, dalo si Kau sarang marěngụ-děngụ!

¹¹ I Kau e enẹ e kasěllahe, ringangu kawasa. I Kau e mawantugẹ̌ masaria ringangu masěllahẹ̌. Patikụ sạbarang su l᷊angị dingangu su dunia e kai tataghuanengʼU. I Kau e ratu mawantugẹ̌, kawasan patikụ e.

¹²Kěbị kakakalạ dingangu wiahẹ̌ tạ konsange kai wọu anunʼU asal᷊e; kal᷊awọu sabarange su kawasanʼU ringangu katoghasẹ̌ dingangu pẹ̌paparentanʼU e; i Kau kawasa mapakariadin sai-sai e makoạ taumata ghaghuwạ dingangu matoghasẹ̌ e.

¹³Kụ ini e, o Ruatang kami, i kami e makitarimakasẹ si Kau ringangu i kami e mẹ̌dalo arengʼU e mawantugẹ̌.

¹⁴Iạ dingangu kawanuaku ini mamben těngadẹ̌ tawe makaonggọ u apa-apa si Kau, batụu kěbị-kěbị e kai ghaghěllịʼU dingangu apang kewe nionggọ i kami ini e mal᷊aing tataghuanengʼU.

¹⁵I Kau e masingkạ, o MAWU, u mẹ̌sul᷊ungu manga i upung i kami, i kami e mal᷊aing dimal᷊engu pẹ̌bawiahẹ̌ ini kere rumarěnta, ringangu kere tau l᷊iwụ. Pẹ̌bawiahʼi kami e mẹ̌sul᷊ungu kěngkau napaghohẹ̌, dingangu i kami e tawe mal᷊iwirẹ̌ bọu papate.

¹⁶O MAWU, Ruatang kami, kal᷊awọu apal᷊iwụ maral᷊ěgadẹ̌ ini e itampung i kami e sini waugu měndarisị u wal᷊e sěmbaụ baugʼU e tadeạu i kami e měngadatẹ̌ arengʼU e susi. Arawe kěbị ene itarimạ i kami e wọu anu-Nu hala e ringangu kai tataghuanengʼU e lai.

¹⁷Iạ e masingkạ u i Kau e mẹ̌manikạ naungu apan taumata e ringangu i Kau lẹ̌lahimpuluangu taumata kụ matilang naunge. Dingangu katatul᷊idu ral᷊ungu naung ore naung mal᷊uasẹ̌ takụ isěmba kěbị tamai ini e si Kau. Iạ e seng nẹ̌sahidi kereapa umatʼU kụ nẹ̌tampung sini nẹ̌bawa sasěmban sire si Kau ringangu naung mal᷊uasẹ̌ e.

¹⁸O MAWU Ruata kụ isẹ̌sěmbang Abraham, Ishak dingangu i Yakub, i upung i kami, karimạko i Kau měndiagạ tadeạu umatʼU e tatapẹ̌ kụkěndagʼi Kau e kere orasẹ̌ ini e ringangu tul᷊ungko tadeạu i sire sarang karěngụ e satia si Kau.

¹⁹Gěllịko ahusẹ̌ku e si Salomo, ěnning kụ kahěnga-hěngang baugu tumuhụ kal᷊awọu parenta-Nu ringangu waugu mamětị bal᷊eng pẹ̌kakal᷊iomanengang ene kụ dariahine e seng takụ nikoạ.”

²⁰Bouten nẹ̌kal᷊iomaneng kerene, i Daud nẹ̌bera su taumata l᷊awọ kụ nẹ̌tampung sene, ”Pẹ̌daloko MAWU Ruatanu!” Tangú kěbị taumata ene němpẹ̌dalo MAWU, Ruata kụ sẹ̌sěmbaěng i upung i sire. Bọu e i sire němpẹ̌tumpěkuhẹ̌ baugu měngadatẹ̌ MAWU e ringangu ratu.

²¹Ěllo tuhụ e, i sire němpěmotọ binatang mědeạu isěmba kere sasěmba su MAWU, bọu ene ipahiạ su kal᷊awọu kawanua. Sul᷊iung ene piạ sapi esẹ sěhiwu, domba esẹ sěhiwu dingangu domba kawuhuang sěhiwu kụ potokange ringangu tongkateng tinalung su wowom pananěmbaěng. I sire mal᷊aing naněmbang anggorẹ̌ kụ něnal᷊udẹ̌ manga sasěmba ene.

²²Su ěllo ene lai i sire kimaěng dingangu něnginung dingangu ral᷊uasẹ̌ su těngom MAWU. Bọu e waugu karua sul᷊ene i sire napạsěpụ i Salomo nakoạ kere ratu. Su arengu MAWU, i sire e nělanisẹ̌ si sie nakoạ datun sire e ringangu i Zadokẹ̌ e nakoạ imang.

²³ Tangú kere ghaghanti si Daud i amange, i Salomo naawị kal᷊aianenge kụ nạung nitantung MAWU. I sie kai ratu mapia kụ lẹ̌adatengu kasěllahu tau Israel.

²⁴Kal᷊awọu mapapangkatu mẹ̌paparenta ringangu sordado e sarangkewe manga ahusʼi Daud bal᷊ine e mal᷊aing něngakung kawasang Salomo kere sěngkatau ratu e.

²⁵MAWU e napakariading kal᷊awọu kawanua e rụdal᷊inaụ u Ratu i Salomo e ringangu napakariadin datu e něngalembong kahuagate wọu patikụ datu kụ i sai-saing nạung mal᷊aing bọu naratu kụ nẹ̌parenta su Israel.

²⁶I Daud anạ i Isai e nẹ̌parenta kasěllahu Israel

²⁷ ěpạ u pul᷊o su taunge karěngụ e. Su Hebron i sie něparenta karěngụ u pitu taung dingangu těllum pul᷊o těllu su taunge su Yerusalem.

²⁸I sie kalạ dingangu lẹ̌adateng kụ naminsul᷊u singongone seng maghurang-gurang. Ahusʼi Salomo esẹ e naratu něngaweng si sie.

²⁹Běkeng pẹ̌bawiahu Ratu i Daud bọu tětạ e sarang pěngěnsueěnge seng niwohẹ su ral᷊ungu bukẹ̌ u Nabi i Samuel, Nabi Natan dingangu Nabi i Gad.

³⁰Su ral᷊ungu bukẹ̌ ene niwěke hal᷊ẹ̌ u pẹ̌paparentane, kawasane, ringangu kal᷊awọu apan nariadi su watangenge waugu Israel dingangu kal᷊awọu kararatuang mạngělikụ su Israel.