Read Sangir KARARATUANG HUMOTONG 5 Bible Online

KARARATUANG HUMOTONG 5 - Sangir bible

KARARATUANG HUMOTONG 5

¹ I Ruben ute kai anạ i Yakub kaiakanenge. Kutẹu ual᷊ingu i Ruben kawe seng nakaturạ kawantugu sěngkatau wọu rokạ i amange, tangú hakẹ̌ u kal᷊aiakange nisawụ kụ nighěllị si Yusup. Manimbe kerene, katoghasenge wọu tal᷊oarang pal᷊ahěnton Yakub bal᷊inewe ghal᷊ipohong Yusup kaiso kawe ghal᷊ipohong Yehuda. Sarang kahumotong-motongange nakoạ datung kal᷊awọu umatu Israel e kai wọu ghal᷊ipohong Yehuda ene.

³I Ruben anạ i Yakub kaiakanenge, piạ anạ e esẹ i sire ěpạ: i Henokh, i Palu, i Hezron dingangi Karmi.

⁴ Seng ini e pẹ̌tatatuhụ u pal᷊ahěntong Yoël: Semaya, Gog, Simei, Mikha, Reaya, Baal dingangi Beera. I Beera ute kai těmbonangu hěnton Ruben piạ i sie nisamẹ kahian Tiglat-Pileser, datung Asyur, kụ niwawa sol᷊ong pinamembangeng.

⁷Su ral᷊ungu salakěboěng kạbawohẹ lai těmbonangu ghal᷊ipoho tuhụ e ini su ral᷊ungu hěnton Ruben: i Yeiel, i Zakharia,

⁸dingangu i Bela anạ i Azas, pulung i Sema wọu ghal᷊ipohong Yoël. Hěnton Ruben mạtanạ su Aroër dingangu su wanua nanětạ bọu Aroër mětẹ̌timona sawěnahẹ̌ sarang Nebo ringangu Baal-Meon.

⁹I sire mạnaghuang binatang mal᷊awọ-l᷊awọ su wanuang Gilead. Ual᷊ingu ene, i sire nẹ̌tanạ su wanua su sěmběkan dakị sol᷊ong kěhu l᷊inggi naěmpahẹ̌ karaune kere Sal᷊ụ u Efrat.

¹⁰Su tempon Datu i Saul, hěnton Ruben dimokạ dingangu němatạ tau Hagri su sěmběkan dakị wọu Gilead, bọu e kimaiang banua ene.

¹¹Su sěmběkan sawěnahẹ̌ banuang hěnton Ruben, mạtanạ hěntong Gad su ěntanam Basan sarang Salkha karaune su sěmběkan dakị.

¹²Bọu hěntong Gad ene i Yoël kai i upung u ghal᷊ipoho su horone, ringangu i Safam kai ghal᷊ipoho nomorẹ̌ karuane. I Yaenai ringangi Safat ute kai i upungu manga ghal᷊ipoho wal᷊ine su Basan.

¹³Taumata wal᷊ine su ral᷊ungu hěntong Gad nasowa su ral᷊ungu ghal᷊ipoho pitu tuhụ e ini: Mikhael, Mesulam, Syeba, Yorai, Yakan, Ziya ringangu i Eber.

¹⁴I sire pal᷊ahěntong Abihail anạ i Huri. Pẹ̌tatuhụ u salakěboěng i sire wọu wawa taraị ute kai kere ini: i Abihail, i Huri, i Yaroah, i Gilead, i Mikhael, i Yesisai, i Yahdo, i Bus.

¹⁵Těmbonangu manga ghal᷊ipoho ene ute kai i Ahi anạ i Abdiel pulung i Guni.

¹⁶I sire natanạ su wanuang Basan dingangu Gilead, dingangu manga soa su wanua ene ore lai su kasěllahu wal᷊an děmpugẹ̌ su Saron.

¹⁷Salakěboěng ini nikoạ su tempong Yotam datung Yehuda, ringangu Yerobeam datung Israel.

¹⁸Su ral᷊ungu hěnton Ruben, Gad dingangu hěnton Manasye su sěmběkan dakị wọu Yordan piạ u 44.760 su kataune sordado nanarang dingangu seng mal᷊awọ ěbạ e su hal᷊ẹ̌ u mẹ̌pakẹ u kěllung, peda ringangu naěnakeng.

¹⁹I sire mẹ̌sẹ̌sekẹ dụdokạ hěntong Yetur, Nafis dingangu Nodab, kụ kal᷊awọu hěnto su ral᷊ungu wansang Hagri.

²⁰Manga sordado tamai ene mạngimang su Mawu Ruata ringangu makịtul᷊ung si Sie, tangú Ruata e rụdaringihẹ̌ dorong i sire ringangu něngonggọu kal᷊auntu si sire waugu tau Hagri ene ringangu apạeweng sěndal᷊eng i sire.

²¹Ual᷊ingu pẹ̌sasekẹ ene e nariadi ual᷊ingu kapulun Duata e, tangú mal᷊awọ dokạ nipaten sire e. I sire lai něnaweng 100.000 su kataune, ringangu něhampasẹ̌ onta 50.000 su waụ e, domba 250.000 ringangu kalide 2.000 su waụ e. Bọu ene i sire nẹ̌banua su wanua ene sarang tempone tau Israelẹ̌ e nitaweng dingangu niwawa sol᷊ong tampạ u pinamembangeng.[6]

²³Sěmbahageang bọu hěntom Manasye mạtanạ su wanuang Basan sarang sawěnahẹ̌ karaune sol᷊ong Baal-Hermon, Senir, dingangu Wul᷊udu Hermon. Kakạděngụe i sire kakạl᷊awọe.

²⁴Seng ini e manga těmbonangu ghal᷊ipohon sire: i Hefer, i Yisei, i Eliel, i Azriel, i Yeremia, i Hodawya dingangu i Yahdiel. I sire kěbị e kai manga sordadong mal᷊ahasa.

²⁵Tau Israel tawẹ satiane su Mawu Ruata kụ sẹ̌sěmbaěngu manga i upung i sire e. I sire naněntang i Sie ringangu němpẹ̌kẹ̌kal᷊iomaneng su manga mahan duatam manga wansa kụ seng nitokol᷊u Ruata wọu wanuang Kanaan.

²⁶ Ual᷊ingu ene Mawu Ruata e něnganoạ naungʼi Pul datung Asyur, tangú tamaị e i sie něngalo wanua ene. I Pul mal᷊aing ikẹ̌kasingkạ kai mẹ̌sul᷊ung i Tiglat-Pileser. Bọu e hěnton Ruben, Gad, dingangu hěntong Manasye kụ su sěmběkan dakị wọu Sal᷊ụ u Yordan nihengkẹ e kere kinataweng kụ bọu ene niwembang sol᷊ong Halah, Habor, Hara ringangu sol᷊ong tampạ sěmbaụ maranin Sal᷊ụ u Gozan. Sene i sire mạtanạ dingangu něngindunụ sarang orasẹ̌ ini.