Read Sangir KARARATUANG HUMOTONG 9 Bible Online

KARARATUANG HUMOTONG 9 - Sangir bible

KARARATUANG HUMOTONG 9

¹Kěbị tau Israelẹ̌ e narol᷊ẹ̌ timuhụ balagu sěngkatau-sěngkatau e. Dol᷊ẹ̌ ene e nakětạ su ral᷊ungu bukẹ̌ u Mararatung Israel. Kere hukumang baugu manga rosan sire, kawanuang Yehuda e nihengkẹ sol᷊ong pinamembangeng.

² Bọu tal᷊oaran sire e kahumotong-motongange nẹ̌bal᷊ị sol᷊ong ěntana tataghuaneng i sire su manga soa e kai ral᷊ohon jamaatẹ̌, manga imang, tau Lewi ringangu manga mẹ̌tatangkiang Bal᷊em MAWU.

³Sěmbahageang bọu hěntong Yehuda, i Benyamin, i Efraim dingangu i Manasye nẹ̌sul᷊e ringangu nẹ̌tanạ su Yerusalem.

⁴Kai arěgang 690 balagẹ̌ bọu hěnton Yehuda kụ nẹ̌tanạ su Yerusalem, nasowa pal᷊ahěntong manga anạ i Yehuda kụ arenge i Peres, i Syela ringangu i Zerah. Pal᷊ahěntom Peres lẹ̌ahakeng i Utai. Běhị u pal᷊ahěntong Utai bọu wawa taraị ute i Utai, i Amihud, i Omri, i Imri, ringangu i Bani. Pal᷊ahěntong Syela e lẹ̌ahakeng i Asaya. I sie e kai matimadu walagẹ̌. Pal᷊ahěnton Zerah lẹ̌ahakeng i Yeuel.

⁷Taumata apang hěntom Benyamin kụ mạtanạ su Yerusalem kal᷊awọe 956 su walage. Matatimadu apam balagʼi sire e kai: I Salu anạ i Mesulam, pulung i Hodawya, i upung i Hasenua karua hawenge I Yibnia anạ i Yeroham I Ela anạ i Uzi, pulung i Mikhri I Mesulam anạ i Sefaca, pulung i Rehuel, i upung i Yibnia karua hawenge.

¹⁰Manga imang tuhụ e ini e mạtanạ su Yerusalem: I Yedaya, i Yoyarib dingangu i Yakhin I Azarya anạ i Hilkia, i upunge marangẹ e kai Mesulam, i Zadok, i Merayot dingangu i Ahitub. (I Azarya e kai těmbonangu sawohị u Wal᷊em MAWU.) I Adaya anạ i Yeroham; i upung marangẹ e ute i Pasyhur dingangi Malkia. I Masai anạ i Adiel; i upunge marangẹ e ute kai i Yahzera, i Mesulam, i Mesilemit, i Imer.

¹³Manga imang kụ nakoạ matimadu walagẹ̌ e kěbị ute 1.760 su kataune. I sire e seng nasasi mẹ̌koạ kal᷊awọu haghing munara su Wal᷊em MAWU.

¹⁴Taumatang Lewi tuhụ e ini e mạtanạ su Yerusalem: I Semaya anạ i Hasub, i upunge marangẹ ute kai i Azrikam dingangu i Hasabya wọu hěnton Merari I Bakbakar, i Heres dingangu i Galal I Matanya anạ i Mikha; i upunge marangẹ ute kai i Zikhri dingangu i Asaf I Obaja anạ i Semaya; i upunge marangẹ ute kai i Galal dingangu i Yedutun I Berekhya anạ i Asa, pulung i Elkana, i sie mạtanạ su ěntanan soan Netofa.

¹⁷Manga l᷊ukadu Wal᷊em MAWU kụ mạtanạ su Yerusalem dingangu manga walagʼi sire ute kai: i Akub, i Talmon, i Ahiman dingangu i Salum těmbonangu lukadẹ̌.

¹⁸Sarang ěllo ini taumata wọu hěnton sire e nipěmunara pinělukadẹ̌ Tukadu Pasěllangengu Ratu[16] su sěmběkan dakị. Kal᷊imona, taumata wọu hěnton sire nioro pinělukadẹ̌ manga tukadu pasěllangeng nẹ̌timona sol᷊ong pẹ̌darasengang u tau Lewi.

¹⁹Apan nioro pinělukadẹ̌ tukadu sasuěkang sol᷊ong Tentam MAWU e ute kai i Salum dingangu taumata apang hěnto sěmbaụ dingange, kụ kai hěntong Korah. (I Salum e kai anạ i Kore pulung i Ebyasaf). Nạung kangerẹ i sire e kai němpẹ̌koạ hal᷊ẹ̌ ene piạ i sire nẹ̌tangkiang su manga tentam MAWU e.

²⁰I Pinehas anạ i Eleazar — mal᷊owọko MAWU e maněntanudẹ̌ si sie! — nạung bọu nakoạ tuměllang i sire e.

²¹I Zakharia anạ i Meselemya mal᷊aing měndal᷊ukadu tukadu pasěllangeng u Tentam MAWU e.

²²Kěbị apan nipile waugu mělukadẹ̌ manga tukadu pasěllangeng e kal᷊awọe 212 su kataune. I sire kinarol᷊ẹ̌ timuhụewe manga kampong tampạ pẹ̌tatanakeng i sire e. I upung i sire marangẹ e nionggotangu manga diabatang ene e kahian Datu i Daud dingangu Nabi i Samuel.

²³Nanětạ bọu ene i sire ringangu pal᷊ahěnton sire tatapẹ̌be nakoạ měndariagạ tukadu pasěllangengu Wal᷊em MAWU.

²⁴Piạ tukade ěpạ u waụ: sěmbaụ su sěmběkan sawěnahẹ̌, sěmbaụ su timuhẹ̌, sěmbaụ su sěmběkan dakị ringangu sěmbaụ su sěmběkam bahẹ. Su apan tukadẹ̌ ene e pẹ̌pěllokang tau Lewi pẹ̌sěngkatau mạkoạ těmbonangu lukadẹ̌.

²⁵Manga anạu sěmbaụ i sire apang mạtanạ suapang kampong mạontol᷊ẹ̌ si sire mẹ̌dẹ̌darol᷊osẹ̌, sěnsul᷊e — su ral᷊ungu pẹ̌sěngkamisa rěngụ e.

²⁶Arawe těmbonangu lukadẹ̌ i sire ěpạ e těbe mědẹ̌darol᷊osẹ̌ mělukadẹ̌. I sire e kai masasingkạ pěngumbalaěng baugu manga kěbị huange su Wal᷊em MAWU e ringangu kal᷊awọu sạbarang mạdaresọ sene.

²⁷I sire mạtanạ maraning Bal᷊em MAWU e watụ u i sire harusẹ̌ mělukadẹ̌ bal᷊e ene ringangu měnope manga tukadu pasěllangenge apang kamal᷊ukadẹ̌.

²⁸Sěmbahageang bọu tau Lewi ewe lai wal᷊ine e pẹ̌ngumbalaěng baugu manga apal᷊iwụ baugu mẹ̌kal᷊iomaneng. Seng i sire e měndarekenge su tempon nipasěbang dingangu su tempom pěnul᷊eěng.

²⁹Sěnggạ e wue tangu pẹ̌ngumbalaěng baugu manga apal᷊iwụ u pẹ̌kakal᷊iomaneng dingangu waugu tapoěng, anggorẹ̌, lanang zaitun, kamania ore lai manga rampa.

³⁰Arawe pěngumbalaěng baugu mělaụ u manga rampa ene ute kai manga imang.

³¹Pěngumbalaěng su hal᷊ẹ̌ u mẹ̌koạ sasěmba nitapa[17] e ute kai sěngkatau tau Lewi arenge i Matica, anạ i Salum kaiakanenge bọu hěntong Korah.

³²Taumata wọu hěntong Kehat, pạngumbalaěng baugu měndiahim borotẹ̌ sadiaěng[18] baugu MAWU e suapang ěllong Sabatẹ̌.

³³Sěmbahageang bọu tau Lewi wal᷊ine e nakoạ mẹ̌kakantarị su Wal᷊em MAWU e. Matatimadu walagʼi sire e měmpẹ̌tẹ̌tanạ su ghodoěng piram baụ su Wal᷊em MAWU. I sire tawe nighělirangu hal᷊ẹ̌ i sire wal᷊ine, batụu i sire e kawe mělẹ̌hal᷊ẹ̌ ěllo ringangu hěbi.

³⁴I sire apan nisěbạ dasị ute kai manga matatimadu walagu tau Lewi tuhụewe wěhị u pal᷊ahěnton sire e. I sire e kai manga těmbonange kụ mạtanạ su Yerusalem.

³⁵I Yeiel něndarisị soang Gibeon, bọu e nẹ̌tanạ sene. Kawinge isẹ̌sẹ̌bạ si Maakha,

³⁶ringangu anạ e esẹ i akang arenge i Abdon; bal᷊inẹ e wue arenge i Zur, i Kish, i Baal, i Ner, i Nadab.

³⁷I Gedor, i Ahyo, i Zakharia ringangu i Miklot,

³⁸i amang i Simea. Pal᷊ahěnton sire e mạtanạ su Yerusalem dingangu manga walagẹ̌ bal᷊inẹ e kụ hěnto sěmbaụ dingangi sire e.

³⁹I amangu Ratu i Saul isẹ̌sẹ̌bạ si Kish dingangu i tetẹ e isẹ̌sẹ̌bạ si Nerẹ̌. I Saul piạ anạ e manga esẹ i sire ěpạ: i Yonatan, i Malkisua, i Abinadab, dingangu i Esybaal.[19]

⁴⁰I Yonatan piạ anạ e manga esẹ arenge i Meribaal,[20] i amang i Mikha.

⁴¹I Mikha piạ anạ e manga esẹ i sire ěpạ: i Piton, i Melekh, i Tahrea ringangu i Ahas.

⁴²Anạ i Ahas arenge i Yoada piạ anạ e manga esẹ i sire těllu: i Alemet, i Azmawet dingangu i Zimri. Běhị u pal᷊ahěnton Zimri ute i Moza,

⁴³i Bina, i Rafa, i Elasa, ringangu i Azel.

⁴⁴I Azel piạ anạ e manga esẹ i sire ěnnung: i Azrikam, i Bokhru, i Ismael, i Searya, i Obaja ringangu i Hanan.